Руханият • 14 Мамыр, 2019

Ерлік туралы деректі фильм

983 рет көрсетілді

Елордадағы Қазақстан Рес­публикасы Қарулы Күштерінің Әскери-тарихи музейінде Ауған со­ғысының аты аңызға айналған ар­дагері, арнайы мақсаттағы 177-жасақ командирі Борис Тө­кенұлы Керімбаев туралы деректі фильмнің премьерасы өтті.

Мәдениет және спорт министрлігінің тапсырысы бойынша «Қазақфильм» киностудиясы түсірген фильмнің көрсе­тіліміне Қорғаныс министрі Нұр­лан Ермекбаев, Мәдениет және спорт ми­нистрі Арыстанбек Мұхамедиұлы, Парла­мент депутаттары мен қоғам қай­­рат­­керлері, Ауған соғысының арда­герлері қатысты. 

Ел ішінде «Қара майор» атанып кеткен тұлға жайындағы толықметрлі деректі туын­дының сценарий авторы және тең ре­­жиссері – Әсет Ерназаров пен Ғазиз Насыров.

Режиссерлердің айтуынша, атал­ған туын­дыны түсіру барысында негі­зінен архив материалдары мен соғыс ар­дагерлерінің естеліктеріне басым­дық беріліпті. «Өйткені Ауған соғы­сының ардагерлері әлі де арамызда жүр. Сол себепті де фактілер мен оқи­ғаларды сөйлетуде барынша дәлдік пен дәйек­тілікке назар аудардық» деп атап өтті режиссер Әсет Ерназаров. 

Көрсетілім соңында Ауған соғысы­ның ардагерлері фильмді түсірген шығар­ма­шылық топ­қа өз ризашылығы мен алғыс сезім­дерін білдіріп, командир Борис Керімбаев пен Ауған­стандағы қызмет­тері жайлы тұшымды естеліктерімен бөлісті. Өскелең ұрпаққа батасын беріп, Ота­нымызда мәңгілік тыныштық пен бейбіт өмірдің орнауын тіледі. Осылайша, фильм премьерасына жиналған Ауған соғысы ардагерлері мен әскери қызметкерлер, жалпы көрермен залдан риза болып тарқасты.

Соңғы жаңалықтар

Ұқсас жаңалықтар