Онда бас қосқан Қазақстанның және Ресейдің Қостанай облысымен іргелес Челябі, Қорған және Орынбор облыстарының жастары, қашаннан іргелес қонған, ынтымақтастықты дамытуға мүдделі екі елдегі қоғамдық ұйымдар өкілдері ізгілікке бастайтын еріктілік – волонтерлік қозғалыстар, осы орайдағы халықаралық бастамалар туралы ой-пікірлерін және еріктілік саласындағы үздік тәжірибелерін ортаға салды. Еріктілік көптеген елде кең қанат жайған, адамдардың қайырымды істері қоғамды ізгілендіреді.
– Еріктілер – нағыз батыр, патриот, мейірімді жандар. Осы залда отырған 1000 еріктінің әрқайсысы айналасына көмек қолын созуға даяр. Қоғамды қайырымды ететін өздеріңіз, – деді форумның пленарлық мәжілісінің модераторы, еліміздегі «Волонтерлер лигасы» қоғамдық қорының негізін қалаушы Қайыржан Меңдіғалиев.
Қазақстан Республикасының Тұңғыш Президенті – Елбасы Нұрсұлтан Назарбаев 2019 жылды Жастар жылы деп жариялады. Мерекесі де, міндеті де мол жылдың Жол картасы аясында өтіп отырған форумға қатысушыларды облыс әкімі Архимед Мұхамбетов құттықтап, жастар саясатына қатысты облыста біткен жақсы істерді атап өтті. Одан кейін Д.Абаев еліміздегі жалпы жастарға беріліп отырған мол мүмкіндіктерді тілге тиек етті.
– Тәуелсіздіктің алғашқы күнінен бастап, біздің мемлекет жастар ісін назардан тыс қалдырмады. Елбасы Нұрсұлтан Назарбаев «Болашақ» бағдарламасын іске қосты. Ол бойынша 13 мың қазақстандық жас шетелдердегі ең таңдаулы деген университеттерден білім алды. Ол қазір де жалғасын тауып отыр. Жастар жылы мемлекет жастардың жұмысқа орналасуы, кәсіпкерлікті бастап кетуі, оларды жеңілдікті баспанамен қамтамасыз ету, сапалы білім алулары үшін қомақты қаржы салып отыр. Жастар жылындағы осындай шаралар Қазақстандағы 4 миллион жастың 70 пайызын қамтитын болады. Қазір біз жаңа цифрландыру дәуірінің табалдырығын бастық, соның нағыз елшісі өздеріңіз боласыздар. Бүгінгі жастар өзінің игілікті, қоғамды дамытуға үлкен үлес болып қосылатын пайдалы ісін өзінің азаматтық ұстанымы арқылы көрсетеді. Сондай ізглікті істің бірі еріктілер қозғалысы қарқынды дамып келеді, – деді Абай Әскербекұлы.
Мұнан кейін форум қонағы, Ресей жастар ісі жөніндегі федералдық агенттігі жетекшісінің орынбасары Андрей Платонов волонтерлік жұмыстың елдерді ынтымаққа жалғайтын күш екеніне тоқталды.
– Мемлекеттік органдар еріктілермен бірге тізе қосып, қоғамдағы кедергілерді жеңеді, ең ауыр деген күрделі істердің шешімін табамыз. Қазір Ресейде ірі еріктілер ұйымдары бар. Олардың көшбасшылары адамдарды игі іске жұмылдырып қана қоймай, заңнаманы да жақсы біледі. Олардың бастамасымен нормативтік актілер толықтырылып, волонтерлік қызметтің кең қанат жаюына кедергілер азайды,– деді А.Платонов Ресейдегі жақсы тәжірибені ортаға салып.
Қазір еріктілер жұмысы экологиялық, патриоттық немесе құтқару секілді түрлі бағытта дамып келеді. Мысалы, осы форум алдында ғана көрші екі елдің аумағынан ағатын Тобыл өзенінің бойында «ЕСО – challenge Qostanai» экологиялық акциясы өткізілді. Ол облыстың Жітіқара, Қамысты, Денисов, Таран, Қостанай аудандарын, Лисаков, Рудный қалаларын қамтыды. Форум аясында Қостанай қаласында Ресей-Қазақстан жастарын біріктіретін Тобыл өзенінің жағалауын тазалайтын тағы да эко-акция өтті. Бұл жастар арасында экологиялық мәдениетті, еріктілікті дамытуға бағытталған игі жұмыстың бірі ғана болатын.
– Мұндай форумдардың жастарға берері көп. Жалпы, еріктіліктің өзі жастар үшін үлкен тәрбие құралы дер едім. Ол алдымен жастардың бос уақытын тиімді пайдалана білуіне, өз ұстанымын қалыптастыруға үйретеді. Мен кәсіпкермін. Ерікті болмасам да тұрмысы төмен жандарға көмектесіп жүремін. Жастар арасында еріктіліктің дамып келе жатқандығы әлеуметтік желілердегі жазылған жайлардан жақсы білінеді. Өзгенің қайғысын бөлісе білу, мейірімділік көрсету ең жақсы қасиеттің бірі болса, бүгінгі қоғамда ол еріктілік қозғалысы арқылы байи түседі, – деді жастар форумына Орал қаласынан келіп қатысқан Марина Биғалиева.
Бүгін жастар форумының жұмысы жалғасады.
ҚОСТАНАЙ
