Халықаралық дзюдо федерациясының жаңартылған рейтингіне көз жүгіртсек, мынадай бір қызықты дерекке қанық боламыз. Қазіргі кезде Грузияның ерлер құрама командасының үш бірдей мүшесі үздіктер тізімінде көш бастап тұр. Олар – Важа Маргвелашвили (66 кило), Варлам Липартелиани (100 кило) және Гурам Тушишвили (+100 кило). Егер дзюдо күресінде небәрі жеті салмақ дәрежесі бойынша жүлделер сарапқа салынатынын ескерсек, бұл жайтқа таңданбау мүмкін емес.
Тағы екі салмақта ресейлік Роберт Мшвидобадзе (60 кило) мен испаниялық Николаз Шеразадишвили (90 кило) шашасына шаң жұқтырмай келеді. Атақтары алысқа жайылған қос балуан өзге елдердің намысын қорғап жүргенімен, олардың ұлты грузин екенін барша жанкүйер жақсы біледі. Екеуі де Грузияның тумасы. Гори қаласында туып-өскен Мшвидобадзе бұл күндері Орынборда тұрып жатыр. Тбилисидің тумасы Шеразадишвили 14 жасында ата-анасымен бірге Пиреней түбегіне қоныс аударған екен. Бүгінгі таңда екеуі де орасан зор табысқа қол жеткізіп отыр. Роберт Мшвидобадзе – 2018 жылғы әлем чемпионатының күміс жүлдегері, 2017 жылғы Еуропа чемпионы. Николаз Шеразадишвили – 2018 жылғы әлем чемпионы және Еуропа чемпионатының қола жүлдегері.
Әлемдік рейтингте көш бастап тұрған Грузия дзюдошыларының да бағындырған белестері зор. Важа Маргвелашвили – әлем чемпионатының екі дүркін қола жүлдегері, Еуропаның үш дүркін жүлдегері. Варлам Липартелиани – Рио Олимпиадасының күміс және әлем чемпионатының бес дүркін жүлдегері, Еуропаның үш дүркін чемпионы. Гурам Тушишвили – әлем және Еуропаның екі дүркін чемпионы.
Жоғарыда есімдері аталған әлемдік рейтингтің көшбасшыларынан бөлек, үздік ондықтың қатарына Грузияның тағы екі өкілі еніп отыр. Олар – Амиран Папинашвили мен Лаша Шавдатуашвили. 60 кило салмақтағы Амиран үшінші орынды еншілесе, 73 кило салмақтағы Лаша төртінші тұғырға табан тіреді. Сондай-ақ Лухими Чхвимиани (60 кило, 12-орын), Бека Гвиниашвили (90 кило, 14-орын), Ушанги Маргиани (90 кило, 18-орын), Баграти Ниниашвили (66 кило, 25-орын), Левани Матиашвили (+100 кило, 24-орын) және Гала Заалишвили (+100 кило, 25-орын) сынды марқасқалардың өнерлері көпшіліктің көңілінен шығуда. Бұл жігіттердің барлығы да «ТОП-25» дзюдошының санатына қосылып отыр. Тағы бір айта кетерлік жайт, әлем және Еуропаның екі дүркін чемпионы, дүниежүзілік додада бес рет жүлдегерлер қатарынан көрінген Украинаның мақтанышы Георгий Зантария да сол елдің тумасы. Оны да естен шығармаған жөн. Міне, бар-жоғы 3,8 миллионға жетер-жетпес халық тұратын жер аумағы алақандай ғана Грузиядан осындай дүлдүл дзюдошылар шығып отыр.
Бәлкім, Грузия балуандарының бұл табысына бекер таңданып отырған болармыз. Себебі Кеңес Одағы дәуірінде-ақ олар өздерінің мықтылығын мойындатқан. Келмеске кеткен КСРО құрама командасы сапында өнер көрсеткен талай грузин жігіті Олимпия ойындары мен әлем чемпионаттарында жеңіс тұғырына көтерілгенін көзіқарақты көрермендер ұмыта қойған жоқ. 1964-1992 жылдар аралығында КСРО (ТМД-ны қоса алғанда) дзюдошылары 25 жүлде (5 алтын+6 күміс+14 қола) алса, соның 11-і (3+2+6) аталмыш елдің өрендерінің еншісінде.
Тәуелсіздікке қол жеткізгеннен кейін Грузия құрамасы Олимпия ойындарында 3 алтын, 2 күміс және 3 қоланы олжалады. Дүние жүзінің барлық командаларын қоса алғанда, осы көрсеткіш жағынан олар 13-орында нық тұр. Ал 1993-2018 жылдар аралығындағы әлем чемпионаттарында Қап тауының қырандары 28 мәрте (3+10+15 қола) жеңіс тұғырына көтерілді. Одан бөлек, дүние жүзі және құрлық біріншіліктерінің командалық сайысында олардың сан мәрте бас жүлдені олжалағанын да айта кету абзал. Міне, рухы биік грузиялықтардың дзюдошылар додасында қол жеткізген табыстары осындай.
Ал ерлердің әлемдік рейтингіне қайта оралсақ, қазіргі кезде «ТОП-10» дзюдошының қатарында Ресей мен Жапония балуандарының қарасы мол. Ресейліктердің – 9, жапондардың 8 саңлағы үздіктер санатында. Сонымен қатар Грузия, Моңғолия, Израильдің – 5, Оңтүстік Корея мен Голландияның – 4, Қазақстан, Бразилия, Әзербайжанның – 3, Испания мен Сербияның – 2, Өзбекстан, Молдова, Украина, Швеция, Канада, Косово, Иран, Бельгия, Германия, Түркия, Венгрия, Куба, Португалия, Египет, Ирландия, Чехия және Аустралияның 1 өкілі дәл сондай құрметке бөленіп отыр.
