Бәрімізді тең еткен Тәуелсіздік!

Жұма, 18 қаңтар 2013 7:35

Мен ұйғыр халқының қаламгер қызымын. Сонымен бірге, өзімді қазақ елінің төл перзенті деп есептеймін. Сол себептен де тәуелсіздігімізге тәу етемін. Бәріміздің ортақ үйіміз – Қазақстан атты Отанымыз жайында тебірене толғанамын. Ғасырлар бойы ұрпақтардың арманы болып келген тәуелсіздік! Баршаның жүрегін жібіткен, көңілін көкке көтерген тәуелсіздік! Мезгілсіз үзілген демдердің, төгілген қанның бодауына бостандық болып атқан арайлы таң,

Жұма, 18 қаңтар 2013 7:35

Мен ұйғыр халқының қаламгер қызымын. Сонымен бірге, өзімді қазақ елінің төл перзенті деп есептеймін. Сол себептен де тәуелсіздігімізге тәу етемін. Бәріміздің ортақ үйіміз – Қазақстан атты Отанымыз жайында тебірене толғанамын. Ғасырлар бойы ұрпақтардың арманы болып келген тәуелсіздік! Баршаның жүрегін жібіткен, көңілін көкке көтерген тәуелсіздік! Мезгілсіз үзілген демдердің, төгілген қанның бодауына бостандық болып атқан арайлы таң, бақыт шұғыласы болып шарпыған дербестік. Сен біз үшін ардақтысың, еркін серпіп қаққан қанатыңа көк Туың мен Елтаңбаңды қондырған алып самұрықсың… Осылайша, зеңгір аспанды әуезді әнге бөлеген шаттықтың сазды үнісің! Сен ақынның жүрегінде тербелген, өлеңінде жырланған шабыт шалқарысың… Сені қанша толғасам да, сені қанша биікке көтерсем де аздық етеді. Өйткені, сен – аңсап жеткен, сағынып қауышқан Тәуелсіздіксің!..

Тәуелсіздіктің жиырма бір жылы барысындағы еліміздегі оңды өзгерістерді, өмірге келген керемет жаңалықтарды ауызға алып, қағазға түсірер болсақ, көлемді-көлемді кітап жазуға тура келеді. Өйткені, бұл шежірелі жылдардың бізге шертер сыры аз емес. Бір ғана 2010 жылдың өзінде әлемдік деңгейде өткен Саммиттің өзі Қазақстан үшін қаншалықты мәртебе?! VII Қысқы Азия ойындарының мемлекетіміздің Алматы мен Астана секілді әсем қалаларында өтуінің өзі, біздің де санатқа кіріп, санаға қосылғандығымыздың айқын көрінісі. Әрі осы ұлы дүбірде мерейіміздің асып, дәрежеміздің өсе түскені тіпті де қуаныш үстіне қуаныш болды. Ал ЭКСПО халықаралық көрмесін өткізу құқын жеңіп алуымыз тіпті ерен табысымыз десек, асыра айтқандық емес.

Сонау тәуелсіздіктің алғашқы жылдарында бір қоғамнан енді бір қоғамға ауысқан сәтте халықтың дағдарып, әрі-сәрі күй кешіп, эко­номикалық тоқырауды бастары­нан өткізгені бар еді. Алайда, тәуел­сіз­діктің алдында ондай-ондай болымсыз жағдайлар жолымызға кедергі бола алған жоқ. Жаңаша ой­лауға, үйлесімді шешім қабылдауға үйретті. Кеңестік кездің қайта құру науқаны әбден тұралатып кет­кен жүдеу шақтың жұтаң тір­лі­гін өзгерту ендігі жерде ер-аза­мат­тардың мойнына түсті. Бұл, әсі­ре­се, Қазақстанның Президенті, қиын кезде халқына көшбасшы бол­ған Нұрсұлтан Назарбаевтың міндетіне айналды. Шынын айтсақ, таусылмайтын ауырлықтарды же­ңіп шығар жол тауып еді. Жақ­сы бастамаларға жұмылдыра біл­ді. Сөзі дана, қимылы ширақ, ақыл-парасаты алысты болжаған Ел­басы ауыр күндердің азабын артта қалдырып, жарқын болашаққа ұлы көшті бас­та­ды. Тарих – қателікті, қасақана бұр­малауды кешірмейді. Кезінде қан­дай бір кереғар пікірлердің болғанына қарамастан, нағыз шындық мойындалып, Елбасы еңбегіне елі сенді, ертеңгі күнге үмітпен қарады.

Бүгінгідей зор табыстарға қол жеткізудің сыры – Прези­денті­міздің көрегендігі мен ба­тыл шешім қабылдайтыны. Қарамақ­қа жиырма бір жыл қысқа ғана уа­қыт. Ал Елбасының осы жиырма бір жылда атқарған шаралары, сіңірген еңбегі – ғасыр­дың жүгі. Ол осы мезгілдер ішін­де қаншалаған түйіні шие бол­ған мәселелерді шешті. Бостан­ды­ғымызды қорғау жолында бас қатырды, аянбай тер төкті. Ел бірлігі мен достықты нығайту жолында оңтайлы шешімдер жасап, тұтас халқымызды дер­бес­тіктің, дамудың жолына салып отырды. Өзгелердің ұйқысы тыныш болсын деп, өзі ұйқысыз кірпік айқастырмай, түндерді өткізді. Басқалар күліп жүрсін деп, өзі мұңға батты. Аласапыран заманның, әлемдегі алыс-жұ­лыс күндердің салқынына ұрын­дырмай, ұлы мұрат жолында күрескерлік рухпен мемлекетімізді басқарып келеді. Ел тілегін қабылдап, билікке келген кездегі қап-қара шашы тәуелсіздікке қызмет ету жолында қардай болып ағарды… Осының бәрі, түсінген адамға үлкен жауапкершілік екені белгілі.

Бір ғана Қысқы Азия ойын­дарындағы, әсіресе, Олим­пиададағы алған алтын мен күмістің саны, жаңарған рекордтардың көрінісі, спорттағы топ жарған жарық жұлдыздардың жарқырап көрінуі үлкен мақтаныш! Енді ғана тәуелсіздігін алып отырған біздің елдің, тарихы ұзын өзге елдердің терезесімен теңеліп, халықаралық ірі жұмыстарды сәтті орындап шығуы ғажайып қуаттылық деп білемін. Еткен еңбек, төккен тердің бодауы далаға кеткен жоқ. Мемлекетіміз әлемге танылды, Әнұранымыз құрлықтарда қалықтады.

Айналасы жиырма бір жылдың ішінде қол жеткізген табыстарымыз «тек спортта ғана» десек, қа­телесеміз. Сан-салалы, салиқалы саясаттың, салмақты қадамдардың бәрінде әлеуеттілік көрінуде. Әлем елдері мойындап таңғалған, тамсанған қадамдарымыз өте көп. Халықаралық форумдар, әлемдік құрылтайлар, экономикамыздың қарыштап дамып отырғаны, қоғамның орнықтылығы мен тыныштығы жаһан жұртына үлгі-өнеге болып отырғанын әйгі­леуде. Еліміздегі ұлы дүбір сай­лаудың сәтті күнінде тағы да Нұр­сұлтан Назарбаевтың айқын басымдықпен ел тізгінін қолға алуы оның халық жүрегіндегі қалаулы адам екендігін көрсетеді. Бағбанның жеміс ағашын егіп, оның жемісін қолымен үзіп аузына салған кезіндегі жан рахаты секілді, Елбасы да ұлтын ұлықтады, халқын қадірледі, жолында жайылып жастық, иіліп төсек болды. Қартын қолтықтады, сә­биін жетеледі. Ал, соның бо­дауына ие болған жемісі – қазақ­стандықтардың риясыз сенімі. Бұл сенім – Қазақстанның бір­тұ­тастығының берекелі өмір, мерекелі көңілдің кепілі болуда. Ақыл-ойдың іске асып, іс-қимылдың батыл басталып, байыппен аяқталуының негізі деу­ге болады. Тарих қойнауына еніп, жылдардың шежіресіне қосылған сәтті күн – 2011 жылдың 3 сәуірі баршаның бағалаған бақытты сәті болып есімізде қалды! Ол күнгі көңіл-күйімізді айтып жеткізе алмаспыз. Өйткені, ол той – бірауыздылықтың, ортақ үйіміздің гүлденіп-көркеюіне деген құш­тар­лықтың, сүйіспеншіліктің тойы еді! Сәуірдің көктемге жалғасар сәтінде аспаннан ақ қауырсын қар жауып тұрды. Алматы басын Алатауға сүйеп, аяғын Іле өзе­ніне созып, терең тыныс алды. Әр көңілдің көкжиегінде осы­нау қалқып келіп, қас-кір­пі­гімізге қонып жатқан қар гүл­деріндей әсемдік көлкіді. Мен де Президентімізді қолдаған өз­ге диаспора өкілдері секілді, ұй­ғыр ұлтының бір қызы ретінде Елбасының халық сеніміне бөленгеніне шаттанып отырдым. Жүзіме қонған ақ қардан қуаныштан аққан көз жасым да еріп сырғып бара жатқанын айтқым келеді.

Келесі бір ел есінде, жұрт на­зарында қалған тарихи оқи­ға: VII Бүкіләлемдік ислам экономи­ка форумының сәтті өткені, әрі Қазақстанның Ислам Кон­ференциясы Ұйымына төрағалық етуі болды. Осы бас қосуда Ислам конференциясы Ұйымы ресми түрде Елбасының ұсынысымен Ислам Ынтымақтастығы Ұйы­мы­на өзгертіліп жаңа дәуірге бет бұрғаны көрінді. 57 мемлекет­тен келген қонақтар бір үстелдің басында, бір шаңырақтың астында жүздесіп, жылы шырайлы пікір алысты. Осы арқылы әлем қазақ жеріне көз тігіп, хал­қы­мызды таныса, ал Қазақстан ислам дүниесіне жақындап, жо­ғал­ғанымызды түгендеп, жүре­гі­мізге Алланы алып, алдағы күн­­дерге үмітпен қарай бастады. Жы­ғылғанға сүйеу, сүрінгенге де­меу болсын деген ақиқаттың ақ жолындағы шоғырланудың ғибраты мол, берері көп болды. Осынау алып адымдар, үлкен жобалардың әрқайсысы өзіндік мәнге, терең сырға толы. Әйтеуір, жұмыс таппаған жанның ермегі үшін емес, қайта биікке ұмтылу, біліктілікке жетудің қам-қарекеті! Бұл жер шарындағы жетістігі мол, дамыған озық 50 елдің қата­рына өтсек деген ниеттің нақты атқарылып жатқан игілікті істері деп білемін.

Алдағы кезеңдерде барымызды базарлы етіп, өзгерістер мен өркениетімізді бүкіл елге жет­кізетіндей, жетістігімізді су­реттейтін көркем әдеби еңбек­тер­дің жазылары шүбәсіз. Тіпті жаңа дәуірді, экономикалық, ру­ха­нияттық маңызды мәселелерді сөз еткен сүбелі еңбектер қазірдің өзінде жазылуда. Көкірегі даң­ғыл, көзі ашық жазудың жар­қын үлгілері болып жүрген қа­лам­герлер жаңа туындыларын жария етуде. Сол арқылы жиырма бір жылдың жақсылықтарын барша қазақстандықтарға білдіріп, көздерін жеткізіп, көңілдерін орнықтыруда. Еліміздегі ақпарат құралдары, қалам ұстаған қауым­ның үнін еркін естіртіп, ертеңге деген үміттеріне көрік басып қыздыра түсуде.

Соңғы жылдардың тізбегіне назар салатын болсақ, тізім молайып, қаламгерлер қатары зорайып келеді. Әр жанрдағы жаңа кітаптар көбейді. Осының бәрін классика деуге болмайтын шығар. Дейтұрғанмен, саннан сапа туындап, шөлдегенге сусын, ашыққанға азық болатын, рухани кедейліктен құтқаратын құнды кітаптар өмірге келіп жатыр. Қазақ әдебиеті туысқан ұлт әдебиетіне, соның ішінде ұйғыр әдебиетіне де қамқор, қолдаушы, қорғаушы болып өсіріп келеді. Ой еркіндігі, ізденудің ұтымды тәсілдері тек тәуелсіздіктің арқасында арман қанатына серпін беруде… Талантты қаламгердің еңбегі бағаланбай, тасада қалып жатқан жағдай жоқ. Сауатты оқырман өзіне керегін тауып, қажетіне жаратуда.

Жүзден аса ұлт өкілдері өмір сүріп отырған елімізде әдебиет, көркемөнер – достықтың алтын көпірі, халықтардың қарым-қатынас құралына айналуда. Өтпелі кезеңде әркім өзімен өзі болып, «Балапан басына, тұрымтай тұсына» кеткен кезден өттік. Бүгінгі таңда ұйғыр қаламгерлерінің еңбектері қазақ, орыс тілдеріне тәржімаланып, рухани сабақтастық қайтадан жандана бастады. Жақсы дүниелер жарық көріп жатыр.

Өз басыма келер болсам, бауырлас қазақ ақын-жазушылар арасынан ақылды аға, замандас, сырлас, қадірлі інілер тауып, тығыз шығармашылық байланыс орнатып отырмын. Айталық, елге белгілі ақындар Нұрлан Оразалин, Ғалым Жайлыбай, Жәркен Бөдешұлы, Маралтай Райымбек, Дәулетбек Байтұрсынұлы, Сәуле Үсенбаева, Любовь Шашкова секілді достарымыздың жылы лебізі, шынайы әдеби жан­ашыр пікірлері мені ылғи да алға қарай шабыттандырып отырады. Міне, осы қаламгерлермен бір шеп, бір бағытта тәуелсіз елдің еркін әдебиетін ерінбей зерттеп, өзімізше өрнектеп жазып жүрген жайымыз бар. Бізге осы мүмкіндікті берген басымызға қонған тәуелсіздік, Елбасының тура, әділ саясаты деп білемін. Қазақстанның толыққанды азаматымын, әрі ұстанған жолыма берік ақынмын. Шабытты шақтарымда нұрлы болашақты елестетемін, қаламым жаза бастағанда Елбасының тартымды тұлғасы көз алдыма келеді. Ол кісі бізге алтын шапақты алыс көкжиекті көрсетіп отырады… Көк аспан мен көк туымыз қосылып жайылып, зеңгір аспанмен астасып кеткендей… Байтақ даламызға атқан бақыттың таңы жарқырап жайнай бер!

Тәуелсіздік, біз сені қастер­лей­міз, сенімен мақтанамыз! Тәуелсіз еліміздің табысына­ қуанамыз. Ол қазаққа да, ұйғыр­ға да, осындағы орыс пен корейге де ортақ. Ендеше, ортақ құн­дылығымызды қастерлеп, кө­зі­міздің қарашығындай сақтай бе­рейік.

Патигүл МӘХСӘТОВА,

Қазақстан Жазушылар

одағының мүшесі, ақын.

АЛМАТЫ.

—————————–

Суретті түсірген

Ерлан ОМАРОВ.