Қаланың ең басты байлығы – адамдар, оның жас тұрғындары. Ақтөбенің 150 жылдық бедерлі белесі көптеген тарихи тұлғалар шаһардың мәртебесі мен даңқын көтере түсті. Осы орайда бүгінгі мереке жас буын үшін туған жердің тарихын тереңнен танып, оның жаңа да жарқын беттерін жазуға, Ақтөбені бұрынғыдан да ажарлы әрі әсем қалаға айналдыру үшін берілген таптырмас мүмкіндік деп білеміз, – деді Ақтөбе облысының әкімі Оңдасын Оразалин 150 жылдыққа арналған салтанатты рәсім кезінде.
Ақтөбе қаласында тек соңғы 3-4 жылдың төңірегінде ауқымды құрылыс жұмыстары атқарылды. Айталық, қазіргі күні қала көркін одан әрі түрлендіре түскен көптеген заманауи әлеуметтік-тұрмыстық және мәдени нысандар бой көтерді. Бұған дейін «Нұр Ақтөбе» және «Батыс» массивтерінің орны құлазыған қу дала болғаны ешкімге де жасырын емес. Қаладағы құрылыс қарқыны жоғары екені осы деректің өзінен де айқын көрінеді. Алдағы 10-15 жылдың бедерінде Ақтөбе қаласы тұрғындарының саны 1 миллион адамға жетеді деп күтілуде. Сөз жоқ, бұл – биік меже.
Бүгінгі кезде алға қойылған әлеуметтік мақсаттарға қол жеткізу және Ақтөбе қаласының ажарын одан әрі аша түсу үшін жан-жақты жұмыс жүргізілуде. Оның дені Ақтөбе қаласының 150 жылдық мерейлі датасына дейін атқарылғаны да үлкен мерей. Бүгінгі таңда Ақтөбе өз тұрғындарының саны жөнінен еліміз бойынша бесінші орында тұр. Қала тұрғындарының саны 500 мыңдық межеге жақындап қалғанын айтқан жөн. Қазақстанда халқының саны 1 миллионнан асқан үш мегаполис бар екені мәлім. Бұдан бес-алты жыл бұрын Елбасы Нұрсұлтан Назарбаевтың тапсырмасына сәйкес Ақтөбені еліміздегі агломерация орталығының біріне айналдыру әрі тұрғындары санын 1 миллионға жеткізу міндеті қойылды.
Соңғы жылдары қала халқының ішкі көші-қон және табиғи өсім есебінен тез өсе түсуі Ақтөбе қаласы аумағында «Астана» және «Алматы» деп аталған аудандардың құрылуына себепші болды. Ақтөбе қаласының соңғы бас жоспары бұдан үш жыл бұрын қабылданды. Соған сәйкес қазіргі кезде ауқымды жұмыс жүргізіліп келеді. Жаңа тұрғын үй массивтерінің пайдалануға берілгені соның дәлелі. Тұтастай алғанда, қалада қосымша тағы да алты шағын аудан ірге көтермек.
Ақтөбенің «Батыс-3» деп аталатын жаңа құрылыс алаңында жоба бойынша 100 мың адам тұрады. Тұрғындардың санын өсіре отырып, мұнда негізінен көпқабатты үйлер салу тәжірибесі қолданылуда. Бұл үшін жылу, электрмен қамту және газдандыру жөнінде арнайы жобалар түзілген. Сондай-ақ аталған ауданда биыл шыға бастағанына жүз жыл толып отырған еліміздің бас басылымы «Egemen Qazaqstan»-ның бұрынғы редакторы, публицист-ғалым Сақтаған Бәйішев атындағы университеттің оқу қалашығы тұрғызылмақ. Бір сөзбен айтқанда, Ақтөбе аймағында құрылыс қарқыны жоғары.
Өткен жылы мұнда 850 мың шаршы метр тұрғын үй бой көтерсе, биыл оның көлемі 1 миллион шаршы метрге жеткізілмек. Ақтөбенің 2016 жылы қабылданған бас жоспары 2030 жылға дейін есептелген. Осы уақытқа дейін қаланың өнеркәсіптік, аграрлық және логистикалық аумағын бір-бірімен өзара үндес тығыз бірлестікте одан әрі нығайта түсу көзделген. Сондай-ақ бас жоспарға сәйкес темір жол вокзалы терминалының жаңа құрылысын бастау ұйғарылған.
Ақтөбе қаласының 150 жылғы қарсаңында шаһардың ескі аудандарын қайта жаңғырту жолдары белгіленді. Мұндай ауқымды жұмыстарға бюджет қаражаты жұмсалса, оның мөлшері тым қомақты болмақ. Сондықтан оған инвесторлық қаражат көздерін тарту көзделген. Сонымен бірге жергілікті атқарушы органдар құрылыс компанияларымен ынтымақтастықтың өзге де нұсқаларын қарастыруда. Айталық, облыс орталығында ескірген, апатты жағдайдағы үйлерді сүріп тастап, оның орнына жаңа көпқабатты үйлер салу үрдісі басталып кетті. Бұл жауапты да күрделі істер инвесторлардың қатысуымен атқарылады. Оның бастауында «Керемет үй» ЖШС компаниясы тұр.
Ақтөбе қаласының 150 жылдығы қарсаңында абаттандыру мен көгалдандыру жұмыстары жан-жақты жүргізілгені де тұрғындарға лайықты тарту болды дей аламыз. Соның ішінде Тұңғыш Президент атындағы саябақ маңында, «Қазақ халқына мың алғыс» стелласының қарсы бетінде арка тұрғызылуда. Әрине Ақтөбе қаласын көркейту мен абаттандыру мәселелері оның 150 жылдық мерейтойы шеңберімен шектеліп қалмақ емес. Бұған дейін аяқтап үлгермеген жобаларды алдағы қыркүйек айына дейін толық бітіру мақсаты қойылған.
Бүгінде еліміздегі болашағы зор, мүмкіндігі жоғары Ақтөбе қаласы мереке құшағында. Сондықтан сөз түйінінде Елбасы айтқандай, «Ажарың атқан таңдай ашыла берсін, арайлы Ақтөбе», демекпіз.
АҚТӨБЕ
