Курчатов қаласына жұмыс сапарының бірінші күні АҚШ Елшісі Уильям Х. Мозер «Байкал-1» зерттеу реакторлары кешенінде болды. Атом энергетикасын дамыту саласындағы және ядролық қаруды таратпау мәселелерін шешудегі қазақстандық-америкалық ынтымақтастық шеңберіндегі жобаларды жүзеге асыру барысымен танысты.
Атап айтқанда, БН-350 реакторының пайдаланылған ядролық отынын тасымалдау және сақтау жөніндегі бірегей жобаны іске асыру, объектілердің физикалық қауіпсіздігін қамтамасыз ету нәтижелері туралы да әңгіме қозғалды. Сондай-ақ зерттеу реакторларын төмен байытылған отынға конверсиялау бойынша ағымдағы жұмыстармен танысты.
Бұдан кейін дөңгелек үстел отырысында АҚШ Елшісі Уильям Х. Мозер АҚШ және Қазақстан ұйымдарының атом энергетикасын дамыту және таратпау мәселелерін шешу саласындағы 25 жылдық қызметінің нәтижелеріне жоғары баға берсе, Ұлттық Ядролық Орталықтың Бас диркторы Эрлан Батырбеков ынтымақтастықтың алдағы уақытта да жалғасатынына сенімділік білдірді. Сондай-ақ сынақ полигонында орналасқан «Тәжірибе алаңы» мен «Дегелең» алаңдарына жұмыс сапары өтті.
Раушан НҰҒМАНБЕКОВА,
КУРЧАТОВ
