Мұқтаж жанға көмек беріп, қиналғанға сүйеу болуды азаматтық міндет деп білген халқымыз қай заманда да жақсылықтың бағасын жоғары қояды. Бұл үрдіс бүгін де ұмыт қалған жоқ. Рамазан айында «Ембімұнайгаз» АҚ басқарма төрағасы Әнуар Жақсыбековтің ұжымға үндеу жариялап, бір күндік жалақы есебінен қамқорлыққа зәру отбасыларға қолұшын созуға шақырғаны да сол көпті көрген көрегендіктің белгісі. Қашанда игі істерге қолдау танытып жүретін ембілік мұнайшылар бұл бастамадан қалыс қалмады, бірауыздан қолдады. Сол бірліктің арқасында облыстың бес ауданындағы қамқорлыққа зәру отбасыларға тұрғын үйлер табысталды. Жаңа баспана кілтін иеленетіндерді таңдап-таразылау да оңайға соққан жоқ. Арнайы комиссия құрылып, екі апта бойы аудандардағы көмекке мұқтаж жандардың жағдайлары зерделенді, нәтижесінде сегіз отбасына үй сатып алып беру туралы шешім қабылданды.
Алғашқы баспананы Құрманғазы ауданының орталығы Құрманғазы ауылында алты бала тәрбиелеп отырған Виктор Кимнің отбасы еншіледі. Үш бөлмелі үйдің кілтін табыстаған «Ембімұнайгаз» АҚ басқарма төрағасы Әнуар Жақсыбеков: «Биыл наурыз айында Премьер-Министрдің орынбасары Гүлшара Әбдіқалықова мен Еңбек және халықты әлеуметтік қорғау министрі Бердібек Сапарбаев аймаққа арнайы сапарлары барысында ірі өндіріс орындарының басшыларымен, бизнес өкілдерімен кездесті. Сол кезде әлеуметтік жағынан аз қамтылған отбасыларды қолдап, тұрғын үй мәселелерін шешуге көмектесу мәселесі қозғалды. Осыған орай өзім жетекшілік ететін ұжымға Рамазан айы қарсаңында бір күндік жалақылары есебінен мұқтаж жандарға қолұшын созу жөнінде үндеу тастадым. Ембілік мұнайшылар менің үндеуіме бірауыздан қолдау көрсетіп, нәтижесінде біраз қаражат жиналды. Міне, ұжым бірлігінің арқасында 8 көп балалы отбасы баспаналы болып отыр», – деді. Бұған дейін басыбайлы баспаналары болмаған ауыл тұрғындары армандарының бір-ақ күнде орындалғандарына қуаныштарын жасыра алмады.
Екінші үй Исатай ауданындағы Исатай стансасында берілді. Көп балалы Бауыржан Сүлейменовтің отбасы барлық жағдайы жасалған жаңа пәтерге қоныс аударды. Он бала тәрбиелеп отырған Сүлейменовтердің шаңырағы осылайша шаттыққа толды. Ауыл әкімі Ұлболсын Хисым мұнайшылардың жақсылығына жергілікті тұрғындар атынан ризашылығын білдірді.
Исатай ауданының орталығы Аққыстау селосында да бұл күні қоныс тойы тойланды. Көп балалы Арман Оразақов денсаулығына байланысты жұмыссыз, жұбайы бала тәрбиесімен үйде отыр. Отбасының қиын жағдайын ескерген ембіліктер толық жөндеуден өткен үш бөлмелі баспананы тарту етті.
Облыс орталығынан шалғайда орналасқан Қызылқоға ауданы да «Ембімұнайгаз» компаниясының назарынан тыс қалған жоқ. Мұқыр ауылындағы үш балалы жалғызбасты ана Ақмарал Бәкішева мен Жамансор елді мекеніндегі жалғызбасты әке Есенбай Ерсайын жаңа қонысқа ие болды. Ақмарал бұған дейін ауылдағы апатты жағдайда тұрған ескі үйді паналап келсе, Ерсайын Есенбай екі кішкентай қызымен ағайындарының үйлерін жағалап жүрген.
Тұрғын үй тапсыру салтанаты Жылыой ауданы орталығы Құлсары қаласында жалғасын тапты. Бес баланы бір өзі тәрбиелеп отырған Г.Қарамолдиева мұнайшыларға алғысын айтып, қуаныштан жанарына жас алды.
Бір аптаға созылған қайырымдылық шарасы Мақат ауданында мәреге жетті. Көп балалы аналар Г.Әбденова мен А.Сейітова ембілік мұнайшылардың көмегімен жаңа үйге көшті. Пәтер кілтін табыстаған компания басшылығы барлық отбасыларға азық-түлік қорынан да көмек ұйымдастырды. Мұнайшылардың бұл сыйы жаңа үйге кірген отбасыларға ғана емес, ауылдастары үшін де қуанышты мерекеге айналды. Шашу шашып, қоныс тойға құтты болсын айтып келушілер қатары сиремеді. Ауыл-елдің арасын жақындатып, береке-бірлікке үндейтін мұндай қайырымдылық шараларының тәрбиелік мәні де зор екенін аңғардық.
АТЫРАУ
