Үкімет • 27 Маусым, 2019

Ресей аумағына өту тәртібі жеңілдейді

159 реткөрсетілді

Мәжіліс Төрағасы Нұрлан Нығматулиннің төрағалығымен өткен палатаның жалпы отырысында «2006 жылғы 3 қазандағы Қазақстан Республикасының Үкіметі мен Ресей Федерациясының Үкіметі арасындағы Қазақстан Республикасының және Ресей Федерациясының шекара маңындағы аумақтары тұрғындарының Қазақстан-Ресей мемлекеттік шекарасын кесіп өту тәртібі туралы келісімге өзгерістер енгізу туралы хаттаманы ратификациялау туралы» заң жобасы мақұлданды.

Н.Нығматулин отырыстың ашылуында сөйлеген сөзінде барлық депутаттық корпус атынан Арыс қаласында болған төтенше жағдайдан қаза болғандардың отбасыларына көңіл айтып, сонымен бірге зардап шеккендердің тезірек жазылып кетуіне тілектестік білдірді.

– Осы күндері бүкіл қазақстандықтар бір ел болып, бір халық болып жұмылып, Арыс қаласы тұрғындарына қолдан келген көмекті көрсетуде. Соның ішінде Мәжіліс депутаттары да бірінші күннен бастап осы оқиғадан тыс қалған жоқ. Депутаттар өздерінің бір күндік жалақысын арнайы көмек көрсету қорына аударды. Ал кешеден бастап бір топ депутатымыз халықпен кездесу үшін Арыс қаласына жол жүріп кетті. Баршамыз Арыс қаласының тезірек қалпына келіп, тұрғындар жағдайының тезірек жақсаруын тілейміз. Арыс, біз біргеміз, – деді Мәжіліс Төрағасы.

Жалпы отырыстың күн тәртібі бойынша Қазақстан Республикасының және Ресей Федерациясының шекара маңындағы аумақтары тұрғындарының Қазақстан-Ресей мемлекеттік шекарасын кесіп өту тәртібіндегі өзгерістер қамтылған заң жобасы бойынша Сыртқы істер министрі Бейбіт Атамқұлов баяндама жасады.

Министр бүгінде Қазақстан мен Ресей қарым-қатынастары мемлекетаралық байланыстардың эталоны болып отырғанын атап өтті. Мемлекеттердің ықпалдастығы ынтымақтастықтың барлық спектрі бойынша қарышты дамуымен айқындалуда. Қарқынды саяси диалог орнатылды. Терең экономикалық байланыстар құрылды.

Осы ынтымақтастықтың сәтті өрбуіне байланысты екі ел арасындағы мемлекеттік шекараны делимитациялау толығымен аяқталып, ал демаркациясы бойынша жұмыстар жалғасуда.

Б.Атамқұловтың баяндауынша, екі ел арасындағы шекара 7 500 шақырымнан асады және әлемдегі ең ұзын шекара болып есептеледі. Қазіргі уақытта Қазақстан-Ресей шекарасында 51 өткізу бекеті бар. Олардың 30-ы – автокөлік, 20-сы – теміржол және тағы біреуі өзен арқылы. Сонымен бірге шекара маңындағы тұрғындарға арналған 86 өткізу бекеттері жұмыс атқаруда. Олар аталған аймақтар тұрғындарының қолайлы қозғалысын, барыс-келісін тәулік бойы қамтамасыз етуде.

Бұл өз кезегінде екі елдің шекарасын бойлай қоныстанған халыққа ең жақын аудан, облыс орталықтарына барып-келуіне қолайлы жағдай туғызып отыр. Сонымен қатар шекарадан өтудің жеңілдетілген түрі туыстық байланыстардың үзілмеуіне де себепкер болуда.

Депутаттарға ратификациялау үшін ұсынылған келісімнің 3-қосымшасында көрсетілген Шекара маңындағы аумақтарда тұратын Қазақстан мен Ресей азаматтарының шекараны кесіп өтуі үшін жарамды құжаттар тізбесіне өзгерістер енгізіліп отыр.

– Қазақстанның ішкі заңнамасында азаматтарды тіркеу кітабының күшін жою­ына және мекенжай анықтамасының енгізілуіне орай аталған келісімге тиісті өзгерістер енгізу қажеттігі туындады. Бұл өзгерістер 2018 жылы 9 қарашада Петропавлда XV Өңіраралық ынты­мақ­тастық форумында қол қойылған хатта­мамен енгізілді. Қазіргі уақытта ауылдық аумақтардың барлық әкім­діктерінде интернет желісін қолдану арқылы мекенжай куәлігін беретін мүм­кіндік бар. Осыған байланысты бұл хаттаманы қабылдау Қазақстан-Ресей мемлекеттік шекарасының маңындағы аумақт­арда тұратын Қазақстан азаматтарының өту үдерісін жеңілдетуге және тәртіпке келтіруге мүмкіндік береді, – деді Сыртқы істер министрі.

Сонымен бірге Ресейдің Сыртқы іс­тер министрлігі 2019 жылы 12 сәуірде жол­­даған нотасында Ресей тарапы хат­та­­ма­ның күшіне енуі үшін қажетті мемле­­кетішілік рәсімдер аяқталғанын хабарлаған.

Депутаттар заң жобасын талқылай келе, тұтас қабылдады.

Жалпы отырыс барысында «Қазақстан Республикасының Азаматтық процестік кодексіне соттар жұмысының заманауи форматтарын ендіру, артық сот рәсім­дері мен шығындарын қысқарту мәселе­лері бойынша өзгерістер мен толық­тырулар енгізу туралы» және «1994 жылғы 15 сәуірдегі Кеден істеріндегі ынты­мақтастық және өзара көмек туралы келісімге өзгерістер енгізу туралы хаттаманы ратификациялау туралы» заң жобалары жұмысқа алынып, отырыс дәстүрлі депутаттық сауалдармен түйінделді.  

Баннер
Соңғы жаңалықтар

Кей өңірлерде ауа-райы өзгереді

Аймақтар • 12 Қазан, 2019

Ең қысқа әңгіме. Ислам Қабылұлы

Руханият • 12 Қазан, 2019

Сенаторлар сенбілікке шықты

Қазақстан • 12 Қазан, 2019

Оралда «LATYN FEST» жастар форумы өтті

Аймақтар • 11 Қазан, 2019

Ұқсас жаңалықтар