Фото: weproject.media
– «Жаңа кәсіптер атласының» мақсаты не? Оны кімдер дайындады?
– Еліміздегі еңбек нарығы мен білім беру жүйесінің арасында біраз үйлеспеушілік бар. Кезінде Кеңес өкіметіндегі жоспарлау комитеті зерттеулер жүргізіп, нәтижесінде 5-10 жылдық жоспар дайындайтын. Сол карта негізінде Еңбек министрлігі «Еңбек резерві» деген бағдарлама жасайтын. Ол келешекте қандай зауыт, фабрика ашылып, оған қанша маман қажет болатынын көрсететін үлкен карта еді. Осы есепке негізделіп Білім министрлігіне тапсырыс жасалатын болған. Яғни, бүгінгі біздің жүйедегі білім гранттары. 90-жылдары еліміз нарық экономикасына көшті. Ендігі кезекте кадрлар қажеттілігін нарық белгілейтін болды. Тапсырысты кәсіпорындар береді. Дегенмен, 30 жылда мемлекеттік тапсырыс жүйесі өзгеріссіз қалды. Үйлеспеушіліктің негізгі себебі – осы. Сондықтан жыл сайын жүздеген заңгерлер мен ондаған экономистер еңбек нарығында жұмыссыз қалады. Тағы бір мәселе – оқу орындары нарық сұранысына тез арада жауап бере алмайды. ЖОО-да жаңа мамандық ашу үшін бірнеше жылдар кетеді. Бүгінгі білім жүйесі әкімшілік моделмен ұйымдастырылады, бұл – дамуды тежейтін үлкен мәселе.
Ал «Жаңа кәсіптер атласының» мақсаты – қарапайым халыққа көмектесу. Бұл ой 2012 жылы басталған. «Болашақ» қауымдастығында 7 жыл қабылдау комиссиясының қатарында болғанымда талапкерлердің 70-80 пайызы болашақтарына сенімсіз еді. Мамандық таңдап, шешім қабылдайтын жеткілікті ақпарат жоқ. «Жаңа кәсіптер атласына» кіріспес бұрын барлық әдістемелерді қарап, сараладық. Англияның Еңбек министрлігі мен Оксфорд университетінің бірлесіп, 700-ге жуық мамандықты елдің әр ауданы бойынша зерттеген бағдарламасы бар. Нәтижесінде, келешекте қандай мамандықтың сұранысқа ие болып, керісінше қайсысы еңбек нарығында қажет болмайтынын анықтауға мүмкіндік береді. Мұндай бағдарламалар Канадада, Сингапурде де бар. Дегенмен олардың үлгісі бізге келе бермейді. Оған себеп – бағдарламалар жетілдірілген экономикалық жүйеге арналған. Біздің экономика құрылымы дара.
Мәскеуден бұл әдістемені оқып, зерттеу жүргізуге сертификат алып келдім. Тобымызда 12 әдіскер бар. Олар да арнайы дайындықтан өткен. Барлығымыз BTS Digital компаниясында жұмыс істейміз. Сонымен бірге Ресейден арнайы шақыртылған 5 маман бар. Өйткені біздің де тәжірибеміз жоқ. Сондықтан олар алғашқы жобаның басы-қасында. Бұдан кейінгі карталарды өзіміз жасамақпыз.
– «Жаңа кәсіптер атласының» ерекшелігі неде?
– Үлгі ретінде 2014 жылы Ресейде жасалған әдістемені алдық. Ал ол 2008 жылы Халықаралық еңбек ұйымы ұсынған Skills technology foresight әдістемесі бойынша жасалған. Карта мамандықтарды үш топқа бөліп, олардың алдағы уақытта сұранысқа ие боларын, не мүлде қажетсіз болып қалатынын анықтаған. Ең қызығы – үшінші топтағы сұранысқа енген жаңа мамандықтар елімізде тіпті оқытылмайды. Бұл қазіргі таңда оқу мерзімінің қысқарғанын көрсетеді. Оған еңбек нарығының өзгеруі себеп.
«Жаңа кәсіптер атласы» аясында еліміздегі тоғыз негізгі сала зерттеледі. Олар: ауылшаруашылық, тау-кен, мұнай-газ, құрылыс, қаржы, коммуникация және ақпараттық бағдарламалар, мемлекеттік басқару, білім, машина жасау. Осылайша, талапкерлерге, олардың отбасына еңбек нарығындағы тенденциялар туралы толық ақпарат бере аламыз. Ресей атласының бір кемшілігін байқадық. Олар 50 жылдық жоспарды Мәскеуге негіздеп жасап, өңірлік сұранысты ескермеген. Біз керісінше төменнен бастамақпыз. Әр облысты бөлек қарастырып, 10-15 жылмен шектелдік. Алғашқы жобаны ERG компаниясының тапсырысымен тау-кен саласынан бастадық. Хромтау қаласындағы Дөң тау-кен байыту комбинаты негізінде жасаймыз. 80 жылдық тарихы бар комбинатта 7000 адам жұмыс істейді.
Тоғыз саланы және 17 өңірді жеке қарастырғанда әр саланың сұранысы есепке алынған нақты жоспар пайда болады. Алғашқы жобаның өзінде 18 сұраныстан шыққан, 14 өзгеріске ұшыраған, 13 жаңа мамандықты анықтай алдық. Атластың тағы бір мүмкіндігі оқу орындарының басшыларын зерттеуге шақырып, оларға да еңбек нарығындағы өзгерістерді көрсете аламыз. Осы негізде Дөң тау-кен байыту жанындағы Хромтау тау-кен техникалық колледжінің басшыларын шақырып, көрсеттік. Яғни, олар алдағы 5 жылда еңбек нарығындағы күтілетін өзгерістер туралы хабардар. Бүгіннен бастап қажетті шараларды қолға алады. Бұл жоғары оқу орындарына нақты жоспар жасауға мүмкіндік береді. Біздің тағы бір үмітіміз – сол саладағы адамдардың ортақ қауымдастық құруы. Ұжымдық энергияның күші мықты. Бір саладағы адамдарда ортақ бейне болуы керек, оны ортақ мүддеге бағыттау керек. Бұл демократиялық принципке негізделген, өйткені осы саладағы әрбір маманның пікірі есепке алынады. Ортақ идея болса, оған қауым сенсе, ол міндетті түрде іске асады. Қоғамның әрбір мүшесі соны қабылдап, әрқайсысы соған қатысты әрекет жасаса, ол үлкен ықтималмен орындалады.
– Жаңа мамандықтар елімізде оқытылмайды дедіңіз, кей кезде оларды арнайы курстарда оқып, үйренсе де болады. Бұл келешекте дипломның қажет еместігін көрсетпей ме?
– Бүгінде диплом құнсызданып жатыр. Google сияқты үлкен компаниялардан бастап дипломға емес, адамның қабілетіне қарайды. Жұмыс берушіге адамның дағдысы, қабілеті маңызды. Қазіргі таңда ЖОО-лар трансформациядан өтіп жатыр. Олар не оқу бағдарламасын қысқартуы керек, не қажетті дағдыларды оқытуы керек. Қазіргі еңбек нарығында білім емес, қабілет маңызды.
– Сұраныстан шыққан мамандық иелері енді қайда барады? Оларға қандай кеңес бересіз?
– Сұраныстан шығып қалған мамандық иелері уақыт жоғалтпай, жаңа ілім іздеуі керек. Элвин Тофллер деген атақты әлеуметтанушы «ХХІ ғасырдың наданы жазып, оқи алмаған адам емес, өз білгенін ұмытып, жаңаны үйрене алмаған адам» дейді.
– Ал ауыл-аймақтағы білім гранттарына тәуелді талапкерлер не істейді?
– Мамандықты грантқа байланысты таңдап түсуге болады, бірақ ол келешекте қажет пе, соны ойлану қажет.
– Сіздің ойыңызша, үнемі сұраныста болатын мамандық?
– Ешқашан сұраныстан шықпайтын мамандық – ұстаз. Адам баласы ешқашан өз қателерінен сабақ алмайды, үнемі оқытатын адам қажет.
– Кей азаматтар мамандық ауыстырудан сескенеді. Өзіңіз де қазір басқа саладасыз. Ондай азаматтарға қандай кеңес бересіз?
– Әлем тез әрі түбегейлі өзгеріп жатыр. Тез өзгергені сонша, адамдар оған дайын емес. Болашақта не боларын нақты ешкім айтып бермейді.
Саланы өзгерту де ешқашан кеш емес. Мен 36 жасымда мүлде басқа салаға ауысып кеттім. Мамандық ауыстырамын дейтіндерге көп үйренуге дайын болу керек дер едім. Осы ретте Элвин Тофллердің принципі көмектеседі. Үйрену керек, бірақ білгеніңді де ұмыта алу маңызды. Адам қалыптасқан түсінігі мен ұстанымдарын ұмыта алуы керек. Ең қиыны да – осы. Одан кейін білгеніңді қайта үйрену керек. Үнемі ізденісте болса, тіпті жақсы. Бірақ ең бастысы, қорықпай, қалыптасқан зонадан шығу керек. Адам бір орында тұрып қалса, дамымайды.
– Елімізде қай салада маман тапшылығы бар?
Сондықтан агрономнан басқа мамандарды көбейту керек. Одан кейін ұстаздар аз. Нұр-Сұлтанның өзінде 800 мұғалім жетіспейді. Үшінші – биотехнология мен медицина қатты дамып жатыр, осы салада үлкен серпіліс болады. Тасымалдау, логистика. жасанды интеллект, көлемді ақпараттар саласы да қарқынды дамуда. Осы саланы игеретін мамандар қажет. Ал елімізде шикізат өндірісі болғаннан кейін энергетика саласының мамандарына тапшылық байқалады.
– Талапкерлерге қандай кеңес бересіз?
– Әркімнің өз ерекшелігі бар. Соны неғұрлым ерте тапса, соғұрлым жақсы. Ол қарапайым болуы да мүмкін. Екіншісі – уақытты сол ерекшелікті дамытуға жұмсау керек. Оған қоса, ата-аналар мен балалардың арасында байланыс болуы керек. Өйткені ата-ана баласының барлық сабақтан жақсы болғанын қалайды. Ал кей кезде бала бір салаға негізделіп, оны дамытса, жақсы нәтиже көрсетеді. Шәкірттерді кез келген жағдайда, кез келген уақытта өмірдің соққысына дайын болатындай тәрбиелеу керек. Бүгінде зейін адамға қажет қасиетке айналды. Өйткені бүгіннің адамы бұл қасиетті жоғалтып алған. Қаншама ақылды адамдар осы зейіннің жетіспеуінен көп нәрседен қалыс қалды.
– Әңгімеңізге рахмет.