Birge, TazaQazaqstan акциясына қазақстандықтар атсалысуда

Премьер-Министр А.Мамин 2019 жылғы 20 шілдеде Қоянды су қой­масында бастаған акцияға 1,2 мыңнан астам адам қатысып, 10 тоннадан астам қоқыс жиналған-ды. Ал елордадағы сенбілік барысында Есіл және Қарасу өзендерінің, Вячеслав су қоймасы мен Майбалық көлінің жағалаулары тазартылды. Аталған іс-шараға 5 мыңнан астам адам қатысты. Экологиялық акцияның қатысушылары Есіл және Қарасу өзендерінің жағалауын әуе­жайдан Қарағанды трассасына қарай, Майбалық көлін, Вячеслав су қой­масының жағалау маңындағы аумағын тазалап, 16 тоннаға жуық қоқыс жинады.

Сенбілікке елордадағы министрлік, қалалық әкімдік және басқармалардың өкілдері, еріктілер де көптеп қатысты. Нұр-Сұлтан қаласындағы экологиялық акцияны қолдаушылардың қатарында Үкімет басшысы Асқар Мамин, Пре­мьер-Министрдің орынбасары Гүлшара Әбдіқалықова бастаған үкімет мүшелері бар.

Атап айтқанда, Экология, геология және табиғи ресурстар министрі Мағзұм Мырзағалиев, Ақпарат және қоғамдық даму министрі Дәурен Абаев, Еңбек және халықты әлеуметтік қорғау министрі Бердібек Сапарбаев, Денсаулық сақтау министрі Елжан Біртанов, Білім және ғылым министрі Асхат Айтмағамбетов болды. Нұр-Сұлтан қаласының әкімі Алтай Көл­гі­нов аталған шараға белсенді қатысқан барша астаналықтарға алғыс айтты.

Сондай-ақ Үкімет басшысы бар­лық облыс әкімдерін экологиялық бас­таманы жалғастыруға шақырған бола­тын. Айта кетейік, бүгінде ЭКО-Челлендж қозғалысына өңір тұр­ғындары жаппай атсалысуда. Мә­селен, Атырауда Жайық өзенінің жа­ғалауын қоқыстан тазарту науқаны өтті. Санитарлық тазалыққа 8 мыңға жуық қала және қала маңындағы ауылдық округ тұрғындары, соның ішінде мемлекеттік мекемелер мен кәсіпорын, өнеркәсіп ұжымдары, сондай-ақ еріктілер тобы қатысып, 37-ден астам техника жұмылдырылды. Нәтижесінде 17 тонна қоқыс жиналды. Сонымен қатар Ақмола облысында 44 мыңнан астам адамның қатысуымен өткен акция аясында Қопа көлі мен Қылшықты өзенінің жағалауы және өңірдегі басқа да тоғандар мен су арналарының маңы қоқыстан арылды. Шығыс Қазақстан облысындағы 19 қала мен ауданда бір мезетте өткен акцияға 33 мыңнан астам тұрғын жиналып, демалыс орындарының аумағын тазалады. Осылайша 800 тоннадан немесе 3 206 текше метрден астам қоқыс шығарылды. Ал алматылықтар Көк­жайлау шатқалын тазарту бо­йынша #TazaAlmaty экологиялық акция­сының алғашқы кезеңін баста­ды. Челленджге қатысушылар ұзын­дығы 5 шақырым болатын шатқалға соқпақ жолмен көтеріліп, жол бойындағы қоқыстарды жинады. Айтулы ша­раға Қарағанды облысының 20 мың­нан астам тұрғыны қатысса, солтүс­тікқазақстандықтар да 200-ден ас­там көл жағалауын қоқыстан тазарт­ты. Теріскейдегі экологиялық акцияға 14 мыңнан астам облыс тұр­ғыны қа­тысты. Облыстық экология де­пар­та­менті жетекшісінің міндетін атқарушы Азамат Бектасовтың ай­туынша, акция аясында 126 мың тонна қоқыс жинал­ды. Нәтижесінде 350 мың шаршы метр аумақ тазаланды.

Айта кеткен ләзім, алдағы уа­қыт­та Қазақстан мектептері мен бала­бақ­шаларында экологиялық тәр­бие­ге арналған қосымша сабақ енгі­зілмек. Экология, геология және та­биғи ре­сурстар министрлігі Білім жә­не ғы­лым министрлігімен бірлесе оты­рып, барлық мектеп пен балабақ­ша­да экологиялық сағат енгізуді жос­пар­лап отыр. Еліміздің бас экологы М.Мыр­зағалиевтің айтуынша, тазалық ұғымын санаға бала жастан бастап сіңіру керек.