Сыртқы істер ведомствосының өкілі ел аумағына 50-ден аса зауытты көшіру жөнінде мәселе мүлде көтерілмегенін, бұған қоса ескі өндіріс орындарын ашу жөнінде бағдарлама жоқ екенін жеткізді.
– 55 зауыт салу туралы бағдарлама жоқ. Білуімше, бұл ақпаратты кейбір блогерлер What’sApp арқылы таратып жүр. Ресми түрде мұндай бағдарлама жоқ екенін хабарлаймыз. Ескі зауыттарды ешкім әкелмейді. Қытай елімен бірлескен комиссия жұмыс істейді, барлық жобалар іріктеліп таңдалады, тиісті мемлекеттік сараптамадан өткізіледі. Аталған жобалар жеке кәсіпкерлердің қатысуымен жүзеге асады. Ескі кәсіпорындарды әкелуге комиссия жол бермейді, – деді Е.Көшербаев.
Индустрия және инфрақұрылымдық даму вице-министрі Аманияз Ержановтың айтуынша, екі ел арасындағы индустрияландыру және инвестиция саласындағы байланысты шекті келісім аясында дамыту жоспарланған. Соның негізінде құны 27,5 млрд долларды құрайтын 55 бірлескен жоба іске асырылмақ.
– Бұл жобалар көлік құрастыру, құрылыс индустриясы, агроөнеркәсіп кешенін дамыту, химия және фармацевтикалық өнеркәсіп, мұнай-газ секторы сынды бірнеше бағытпен байланысты. Соның ішінде Индустрия және инфрақұрылымдық даму министрлігіне тікелей 27 жоба бекітілген. Олардың жалпы құны 19,6 млрд долларды құрайды. Осының нәтижесінде шамамен 15 мың жаңа жұмыс орны ашылады деп күтілуде, – деді А.Ержанов.
Вице-министр 55 жобаның ішіндегі 7-уі Ауыл шаруашылығы министрлігіне, 20-сы Энергетика министрлігіне, сондай-ақ тағы 1 жоба «Астана» халықаралық қаржы орталығына қарасты екенін айтты. Бұған қоса спикерлер осы арқылы отандық мамандардың біліктілігін көтеріп, шетелдік жұмыс күшінің санын азайту қарастырылған деп сендірді. Үкімет өкілдері аталған тізімнен перспективасы жоқ жобалар алынып тасталғанын да атап өтті. Мәселен, тамыздың соңында 7 жоба мақұлданбай қалған. Оған жұмыс қарқынының баяулығы себеп болыпты. Тиісінше олардың орнын құны 763 млн долларды құрайтын жаңа жобалар алмастырған.
Бұдан басқа отандық басым инвестициялық жобалар жайлы ақпараттың ашықтығын қамту мақсатында Сыртқы істер министрлігінің алаңында ақпараттық кездесулер өткізу көзделіп отырғаны айтылды. Осылайша қоғам ішіндегі дақпырт әңгімелерге тосқауыл қойылмақ.
Брифингте мәлім болғандай, Қазақстанға инвестиция тарту бойынша алдыңғы қатарда Нидерланд мемлекеті жайғасқан. Қызғалдақтар елі отандық экономикаға барлығы 87 млрд доллар құйған. Екінші сатыда 37 млрд доллар салған АҚШ орналасқан. 27 млрд доллар инвестиция құйған Швейцария үштікті тәмамдаса, Қытай 17 млрд доллармен 4-ші орында орналасқан.
