Корей Республикасы елшілігінің мәдени орталығы мен Елбасы кітапханасы бірлесе ұйымдастырған бұл жолғы салтанатты жиын қос мемлекет арасындағы стратегиялық серіктестіктің мерейлі 10 жылдығына арналып отыр. Көрменің ашылуында сөз алған Елбасы кітапханасының директоры Әмірхан Рахымжанов мәдениет салалары бойынша ынтымақтастық байланыстарды нығайту бойынша өтіп жатқан кезекті жиынның маңызына тоқталды. Сондай-ақ ұлттық киім үлгілерінің конструкциясында, ұлттық нақышында, ою-өрнегінде кез келген ұлттың дүниетанымы жататынын, ұлттық құндылықты қастерлеу тұрғысынан қазақ пен корей ұлтының өзіндік ұқсас тұстары бар екендігін жеткізді. Ал Корей Республикасының Қазақстандағы Төтенше және өкілетті елшісі Ким Дэсик мырза аталған жиынның елдер арасындағы өзара түсіністікті нығайтуда орны айрықша екенін айтты.
Көрмеде дизайнер Квак Гончжу мен сәнгер Ро Чжухённің 10-нан астам ханбок костюмі және «Ханджи» корей қағазына түсірілген 45-ке жуық заманауи графикалық шығармасы ұсынылды. Туындылар болмыс пен адамға тән өмір құбылыстарын суреттеу арқылы көрерменге ой салуды көздейді.
Қарапайым әрі ұқыпты тігілген ханбок костюмінің шалғайы мол пішіліп, қолтығы мен жеңі кең әрі ұзын келеді. Еденге дейін төгілген көйлек етегі кестелі ою-өрнекпен әдіптелсе, кеуде тұсындағы бант бешпетке айрықша нәзіктік дарытқан. Жібек пен шілтердің үйлесімінен туған «Чогори» бешпеті мен «Чима» белдемшесінде кестеленген гүл мен көбелектер киімнің арнаулы мерекелік кешке тиесілі екенін аңғартады. Одан бөлек костюмдегі түс алуандығы символдық мәнге ие көрінеді. Мәселен, ерлердің бас киіміндегі қара түс шексіздік пен шығармашылық бастау ұғымын білдірсе, қызыл түс табыстың түсін аңғартқан.
«Корей ұлттық киіміндегі сызықтар іс-әрекетті ғана емес, қоршаған ортаға деген қарым-қатынасты көрсетеді. Бүгінгі көрмедегі шығармалар біздің өткенімізге, бүгініміз бен болашағымызға байланысты өмірдің маңызды кезеңдерін бейнелейді. Осы көрме арқылы сіздер де сауығудың өзіндік жолын, өз жолдарыңызды табасыздар деп сенемін», деді дизайнер Квак Гончжу. Оның айтуынша, жарты ғасыр бұрын күнделікті киім есебінде болған бұл костюмдер қазіргі күні үлкен мерекелер мен түрлі той күндері ғана киіледі. Әйтсе де заманауи дизайнерлер тобы ата-бабасынан мұраға қалған ұлттық киімдеріне эстетикалық тартымдылық сыйлап, жаңа үлгідегі мәдениеттің құрамдас бөлігі ретінде айқындауды жөн көріп отыр.
