Жуырда ғана табылған қыз-келіншектердің әшекей бұйымдары да ғұн кезеңінің технологиясынан хабар береді. «Әдетте алтыннан жасалған жәдігерлер сырттағы обалардан табылады, қаланың ортасында емес. Күлтөбеден табылған сирек кездесетін жәдігердің де ерекшелігі осында. Мұның жасалу үлгісі сақ дәуірінде басқаша болған, қосымша тастарды әшекейлеп бетіне жапсыру болмаған. Бұл ғұн, сармат кезеңдеріне жататын, II-III ғасырға тән алтындар қатарын толықтырып тұр. Әр кезеңге тән бірнеше алтын табылып отыр. Бізді қызықтырғаны – сұрақ белгісіне ұқсас сырға. Ол көбіне қыпшақтарға тән болған. Әрбір жәдігер ата-тегіміз бен салт-дәстүр ғұрпымыздан хабар береді», деді тарих ғылымдарының докторы, археолог Мұхтар Қожа баспасөз мәслихатында.
Сондай-ақ археологиялық қазба жұмыстары барысында араб графикасында жазылған, көлемі 10х20 см. келетін кітаптар хумдан пештің ішіндегі құланды қыштар арасынан табылған. Бүгінде Қазақстанның еңбек сіңірген қайраткері, суретші-реставратор Қырым Алтынбеков қазбадан табылған қос кітапты қайта қалпына келтіруге кіріскен. Кітаптың сақталған қалыңдығы –
1,2 см. Мұқабасы көк түсті көнмен қапталған кітаптың парақтары бір-бірімен жабысып қалған, ашуға келмейді. Жазуы оқылатын бірінші бетінен «Біз мұндайлардан емеспіз» деген сөйлемнің жобасы анықталыпты. Маманның айтуынша, жәдігерлер ағаш ұнтағынан жасалған секілді. «Көп еңбек етуіміз керек. Қайта қалпына келтіріп болған соң ішіндегі жазуларды толықтай оқып, зерттеуге мүмкіндік аламыз», деді Қ.Алтынбеков.
Айта кетелік, Күлтөбе қалашығындағы жұмыстар Қазақ ғылыми-зерттеу институты «ERG Kөmek» корпоративтік қорының қаржылық қолдауымен жүргізілуде.
Түркістан облысы
