Жас отаудың тойы өткен соң, тіршілік басталды. Гүлданаға ауылда заңгерлік жұмыс жоқ. Не істейді? Ауылға келін болып түсіп, қалаға қайта кетемін дегенді қалай айтады? Намысы бар жігіт Нұрлан да келіншегінің соңынан қалаға кетемін деп айтпайтынын біледі. Екі жасқа тығырықтан шығудың бір-ақ жолы бар еді. Бұл – ауылда өзінің ісін ашу болатын. Ауылда қалған жастардың көбі малды кәсіп етеді. Бірақ Нұрланның негізгі қызметі болған соң, мал өсіруге мүмкіндік жоқ еді. Гүлдана үйде отырып, көп ойланды. Ол кәсіпкерліктің қызмет көрсету түріне тоқтады. Ауылда қоғамдық монша жоқ. Ал саламатты өмір салтының өзі тазалықтан басталмай ма? Гүлдана жолдасына монша салуға бекінетінін айтты. Ал оның жөн-жобасын білу қазір аса қиындық тудырмайды. «Атамекен» кәсіпкерлер палатасының «Бастау» оқу курсына барып оқыды да, кәсіпкерлік негізінің барлығын біліп алды.
– Менің бастамам «Атамекен» кәсіпкерлер палатасының аудандық филиалындағы мамандарға ұнады. Ол үшін кәдімгідей құрылыс жүрмейді, қай жерге қаласаң, сол жерге қоя саласың. Ол үшін бумаланған құжат жинаудың керегі жоқ. Монша қашанда, қайда да болса керек. Келін болып түскен ауылым маған рахметін айтып жатыр, – дейді Гүлдана.
Гүлдана Кузайбинаға «Атамекен» кәсіпкерлер палатасының аудандық филиалы кредит алуға көмектесті. Ол жеңілдетілген мемлекеттік бағдарлама аясында 1 млн 600 мың теңге алып, оған модульдік монша құрды. 2000 тұрғыны бар Москва ауылдық округі үшін моншаның жетілдірілген бұл түрі жақсы жаңалық болды. Моншаның рахатын ауылдастары көріп отыр.
«Келіннің – аяғынан, қойшының – таяғынан» деген осы. Ауылға саламатты өмір салтының көрінісін әкелген жас келін жақында ғана шекесі торсықтай ұл тауып, аяқ-қолын бауырына алып жатыр. Ауылға аяғы құтты келіндер түсіп тұрса, ауылдастардың қуанышы да, сүйініші де мұнымен тоқтамас.
Қостанай облысы,
Қостанай ауданы
