ҚАЛПЫНА КЕЛТІРУ ЖҰМЫСТАРЫ ЖАЛҒАСУДА

Алматы облысының Ақсу ауданындағы табиғат апатының зардаптарын жою жөніндегі мемлекеттік комиссия жұмысы одан әрі жалғасуда. Оперативті штаб белгілеген барлық іс-шаралар өз уақытында және толық көлемінде жүзеге асуда, деп хабарлады Премьер-Министрдің баспасөз қызметі. Іздеу-құтқару жұмыстарының нәтижесінде соңғы тәулікте қаза болған тағы екі адамның денелері табылды. Қаза тапқандардың жалпы саны 40 адамға жетті. Аудандағы ахуал қалыпқа түсіп келеді. 18 наурыз күні кешке Қы­зыл­ағаш ауылына 1088 адам ора­лып, олар ауыл мектебі мен шатыр­лы қалашыққа орналас­тыр­ыл­ды. Қызылағашта көшені жарық­тан­дыру қалпына келтірілді. “Қаз­пошта” бөлімшесі зейнетақылар мен басқа да әлеуметтік төлем түр­лерін төлеуді жалғастыруда. Әділет басқармасы мен халыққа қызмет көрсету орталығы қызметкерлерінің күшімен 97 құжат қалпына келті­рілді. 26 құрылыс компаниясына үй салу үшін архитекторлық жобалар берілді. Бас жоспарға сәйкес жаңадан 467 үй салынады. Құ­ры­лыс жұмыстарына, арнаулы мамандардан тысқары, жергілікті тұрғындарды тарту ойластырылуда. Құрылыс екі ауысымда, тәулік бойы жүргізіліп, жұмыстар жаз кезеңінде аяқталмақ. Қызылағашқа Алматы облы­сының қалалары мен аудандарынан гуманитарлық көмектер жеткі­зі­лу­де. 19 наурызға қарасты қалпына келтіру жұмыстары үшін түрлі көздерден 2 миллиард 100 миллион теңге қаржылай және материалдық көмектер бөлінді. Оның ішінде Үкіметтің резервтік қорынан 600 миллион теңге, “Самұрық-Қазына” қорынан 500 миллион теңге қаржы қарастырылды. Осы мақсаттар үшін облыстық бюджеттерден 870 мил­лион теңге мақсатты трансферттер бағытталды. Төтенше оқиға зардаптарын жою жұмыстары Премьер-Министр Кәрім Мәсімовтің тұрақты бақы­лауында тұр.