Бұл құралды еліміздің кез келген тұрғыны пайдалана алады. Арнайы плагиннің құрылғаны туралы «Әлеуметтік медициналық сақтандыру» КЕАҚ Ақпараттық жүйелерді дамыту департаментінің директоры Айдар Айтуев айтып берді.
– Бұл плагинді құрудағы мақсат қандай, халыққа берер пайдасы бар ма?
– Функционалды тұрғыдан алғанда, құрал өте қарапайым. Арнайы ресурсқа кіріп, әр тұрғын өзінің ЖСН нөмірін енгізсе болды, сақтандыру мәртебесін біле алады. Бүгінгідей барлық адам гаджет қолданатын заманда, бұл ыңғайлы әрі уақытты үнемдейді. Егер «сақтандырылған» деген жауап келсе, онда алаңдамауға болады. Ал егер жауап «сақтандырылмаған» болса, онда себебін анықтау керек. Мысалы, азаматтың «жалдамалы жұмысшы» деген мәртебесі бар және бұл үшін төлемді жұмыс беруші жасайды делік. Жүйе арқылы жұмысшы өзі жұмыс істейтін ұйымның өзі үшін медициналық сақтандыруға төлем жасағанын немесе жасамағанын анықтай алады.
– Еліміздің әрбір тұрғыны өзінің сақтандыру мәртебесін не үшін қадағалап отыруы керек?
– 2020 жылдың 1 қаңтарынан Қазақстанда МӘМС жүйесі іске қосылады. Осы уақытқа дейін барлығымыз МӘМС жүйесіндегі сақтандыру мәртебемізді анықтап алуымыз керек. Мысалы, адамға қандай да бір сырқат бойынша диагноз қойылды және оған медициналық көмек қажет болды. Егер ол сақтандырылмаған болса, онда бұл адамға құрамына учаскелік дәрігер, жедел көмек, шұғыл стационарлық көмек, әлеуметтік маңызы бар аурулар кезінде көрсетілетін медициналық көмек түрлері кіретін тегін медициналық көмектің кепілдік берілген көлемі (ТМККК) қолжетімді болады. Ал МӘМС пакеті бойынша берілетін медициналық көмек түрлері тек сақтандырылған азаматтарға ғана қолжетімді. Осылайша егер сіз МӘМС жүйесінде өзіңіздің сақтандыру мәртебеңізді анық білсеңіз, 2020 жылдан бастап өзіңізге қажетті барлық медициналық қызметтер спектрін ала аласыз.
– Бұл құралды пайдалану қолжетімді ме, яғни кез келген жерден қосылуға бола ма?
– Плагин әмбебап форматта жасалған. Ол кез келген сайтқа тіркеуге ыңғайлы. Осы мүмкіндікті пайдалана отырып, бұл мәселеге қызығушылық танытқан барлық сайт иелеріне айтарым: «Егер сіздер өз ресурстарыңызда плагинді орнатқыларыңыз келсе, «Әлеуметтік медициналық сақтандыру» КЕАҚ-қа өтініш жаза аласыздар. Байланыс үшін e-mail: p.andreev@fms.kz. Плагинді қарап көріп, зерделеу үшін «МСҚ» КЕАҚ-тың www.fms.kz ресми сайтын ашу керек.
Дайындаған
Думан АНАШ,
«Egemen Qazaqstan»
