«Азаматтарға арналған үкімет» мемлекеттік корпорациясының орталық филиалы директорының орынбасары Мұхтар Еркебұланның айтуынша, 2019 жылдың 1 қаңтарынан бастап міндетті әлеуметтік медициналық сақтандыру жүйесі іске қосылғаннан кейін кәсіпкерлікпен тіркеусіз айналысатын адамдарды медициналық қызмет түрлерімен қамту үшін Бірыңғай жиынтық төлемдер енгізілді.
– БЖТ-ны төлеушілер жүйеге қатысу өтіліне байланысты жинақтаушы зейнетақы жүйесіне қатыса алады және базалық зейнетақы төлемін ала алады. Бірыңғай жинақтаушы зейнетақы қорындағы өзінің зейнетақы жинағын толықтырумен қатар, БЖТ төлеушілер үшін еңбек өтілі бекітілгендіктен, базалық зейнетақыны жоғарылаған мөлшермен алуына болады. Сонымен қатар еңбек қабілеттілігінен, отбасы асыраушысынан айырылу, жүктілік және босану, бала асырап алу және бала күтімі жағдайларында әлеуметтік жәрдемақы ала алады, – деді М.Еркебұлан.
«Азаматтарға арналған үкімет» мемлекеттік корпорациясы басқарма аппаратының қаржы-экономикалық департаментінің директоры Данияр Сқабылов қаралып отырған тариф жобасы корпорацияның ұсынатын қызметтері аясында әзірленгенін, олар «БЖЗҚ» АҚ, «МӘСҚ» АҚ, «МӘМС» КЕАҚ мемлекеттік кіріс органына сомаларды уақытылы өңдеуге және аударуды жүзеге асыруға мүмкіндік беретінін айтты.
– Корпорациямыз – «бір терезе» қағидасы негізінде жеке және заңды тұлғаларға мемлекеттік қызметтерді көрсету саласындағы қызметті жүзеге асыратын бірыңғай провайдер. Қоғамдағы мемлекеттік монополияға кіретін қызметтердің бағасын Ұлттық экономика министрлігінің Табиғи монополияларды реттеу, бәсекелестікті және тұтынушылардың құқықтарын қорғау жөніндегі комитет қадағалайды. Осы орайда міндетті әлеуметтік медициналық сақтандыру қорына – 40%, Мемлекеттік әлеуметтік сақтандыру қорына – 20%, Бірыңғай жинақтаушы зейнетақы қорына – 30% және резиденттің тұрғылықты жері бойынша тиісті бюджетке – 10% жарна аударылатынын айта кеткен жөн, – деді Сқабылов.
Квазимемлекеттік орган БЖТ сомаларын бөлуге және аударуға байланысты бір тапсырыстың құнын – 63 теңге мөлшерінде, қате орындалған жағдайда қайтарым сомасын – 978 теңге шамасында белгілеу ұсынылып отыр.
Корпорация өкілдері БЖТ төлеушілер үшін табыс салығы және әлеуметтік төлемдердің ең төменгі мөлшерлермесі белгіленгенін атап өтті. Қала мен ауыл тұрғындарының кірістеріндегі айырмашылықты ескере отырып, елорда, республикалық, облыстық маңызы бар қала тұрғындарына оның мөлшері 1 АЕК-ті немесе 2 525 теңгені, ал басқа елді мекендердің тұрғындары үшін – 0,5 АЕК-ті немесе 1 262,5 теңгені құрайды.
