Қоғам • 10 Желтоқсан, 2019

Студенттер жатақханасы: төлемақы құны көңілге қонымды ма?

523 рет
көрсетілді
5 мин
оқу үшін

Мемлекеттік жастар саясатының мақсатты негізде жүйелі жүр­гізілуі келешек кепілі саналатын жас буын өкілдерінің жеке тұл­ға ретінде қалыптасуына ықпал ететін басты факторлардың бірі екендігі белгілі. Осы ретте студент жас­тар қауымының назардан тыс қалмауы, әсіресе, олардың тұрмыстық жағдайына жете көңіл бөлініп отырғаны мемлекет тарапынан атқарылып отырған істердің әлеуетті қалпын айғақтайды. Қазақстан Рес­публикасының Тұңғыш Президенті ұсынған Бес әлеуметтік бас­таманың бір бағыты студенттердің тұрмыстық ахуалын жақ­сартуды меже тұтқаны және соған орай іске асырылып жатқан тындырымды шаралар осы тұжырымның жарқын мысалы.

Студенттер жатақханасы: төлемақы құны көңілге қонымды ма?

Бүгінгі таңда Білім және ғылым министрлігі сту­денттердің баспанамен қам­тылып, алаң­сыз білім алу мәселесін оңтай­ландыру мақ­са­тында біршама жүйелі жұмыс­тарды жүзеге асыруда. Оның негізгі өзегі – жа­тақхана салу мен бұрын са­лынған ғимараттарды жатақ­ханаға бейімдеп қайта жаң­ғыр­ту жұмыстарын жүр­гізуге мем­лекеттік тапсырыс қаражатын орналастыру. Осынау қажеттілікке орай, БҒМ «Қаржы орталығы» АҚ мемлекеттік тапсырыс­ты ор­наластыру қағидасын дайын­да­ған болатын. Аталған құ­жат­та ортақ мүдделі іске жеке­мен­шік секторды екіжақты оң­тайлылық жағдайында тарту шарт­­тылықтары мен оны жүзеге асыру тетіктері қарастырылған еді.

Ақпараттық насихат жұ­мыс­тарының пәрменді жүр­гізілуінің нәтижесінде бүгінде инвесторлар мен жеке кә­сіпкерлер студент жастар үшін жатақхана салу және бұрын басқа бағытта қолданыста бол­ған ғимараттарды жаңадан жаңғыртып бейімдеу шараларына кірісіп те кетті. Осы ретте олардың қолға алған іс­теріне әлеуметтік нысан деп қана қарамай, түсімі тұрақты, келешегі ілкімді бизнес-жоба тұрғысынан келулері көңілге қуаныш ұялатады. Шынайы сұраныс көлемін зерделеу ел көлемінде студенттер үшін 75 мың жатақхана орны қажет екендігін көрсетіп отыр. Сұ­раныс республиканың ірі қалаларымен қоса, облыстық маңыздағы қалаларды да қамтиды.

Студенттер жатақханасын салған немесе ғимаратты қайта бейімдеп жаңғыртқан инвестор, яки болмаса жеке кәсіпкер нысанды (жатақхананы) студенттер үшін қолданысқа енгізген соң мемлекет тарапынан 8 жыл бойы мемлекеттік тапсырыс­ты орналастыру тәсілімен қаржы төлемдері жүргізіледі. Төлем мөлшері пайдалануға тапсырылған және студенттер нақты орналасқан орынжайлар санына сай айқындалады. Жыл сайын әр орынжай үшін 122 айлық есептік көрсеткіші (АЕК), ғимаратты жатақхана ретінде реконструкцияланған жағдайда 47 АЕК көлемінде мемлекет қаржысы төленеді.

Бұрын студенттердің жатақ­ханада тұруының шектеу­лі төлемақысы олардың шәкірт­ақысының 15 пайызы­нан аспайтын мөлшерде белгілен­ген еді. Алайда құрылыс компа­ния­ларының өкілдері шыққан шығынның орнын толдыруды көздейтін бұл көрсеткіш бизнес­ке де, ЖОО-ға да меншік иесі ретінде жатақхананы тиімді басқару мүмкіндігін бермейді деп есептейді. Сол себепті, жатақхана ғимараттарында кәсіпкерлік бағытындағы шарттылықтарды қоса пайдалану жолдары да қарастырыла бастады. Үшінші бастама жүзеге асырыла бастағаннан бері 5404 орындық 22 нысан іске қосылды. Жаңадан іске қосылған жатақханалардың студенттер үшін бір ай тұру құны орташа есеппен 8,5 мың теңгені құрайды. Бұл ірі қалаларда білім нәрімен сусындап, студенттік шақтарын өткізіп, пәтер жалдап жүрген жастар үшін қолжетімді сомма. Мәселен, орынжай жаңадан іске қосылған Қазақ инженерлік-технологиялық университетінің жатақханасында – 15000 теңге, «ДиЛМАШ» ЖСШ – 4000 теңге, ал «RnR Group» ЖШС жатақханасында – 10000 теңге. Жатақханалар тұрмысқа қолайлы, жылы, жарық, тегін Wi-Fi, кітапханалармен, коворкинг орталықтармен жабдықталған, көпшілігінің санитарлық тораптары бұрынғыдай баршаға ортақ емес, бөлме ішінде орналасқан.

Осы орайда айта кетер жайт, жатақханадағы орындар көбіне орналасу құқы алғашқы кезекте мемлекеттік білім беру гранты негізінде оқуға түскен студенттерге, оның ішінде: жетім балалар мен ата-анасының қамқорлығынсыз қалған балалар, мүмкіндігі шектеулі балалар, толық емес отбасылар мен көп балалы аналардың балалары, зейнет жасындағы көп балалы отбасылардың балаларына жететін. Алға қойылған меже 2022 жылға дейін кемінде жатақханаларда 75 мың жаңа орынды енгізу, түйткілді мәсе­ленің шешімін тарқатып, заманауи жатақханада тұруға ниет танытқан барлық санаттағы студент жастардың тұрғын жайын шешеді деген сенім мол.

 

«Қаржы орталығы» АҚ

1