Парламент • 10 Желтоқсан, 2019

«Өңір» депутаттық тобының Қарағанды облысында көшпелі отырысы болды

24 рет көрсетілді

Сенаттың «Өңір» депутаттық тобы «Қарағанды облысындағы өнеркәсіп кәсіпорындарының өндіріс үдерістерін цифрландыру үлгісі» тақырыбы бойынша Қарағанды облысында көшпелі отырыс өткізді. Бұл туралы Парламент Сенатының баспасөз қызметі хабарлады.

Шараға Сенат депутаттары – депутаттық топтың мүшелері Михаил Бортник, Мұратбай Жолдасбаев, Сергей Ершов, Рашит Әкімов, Ерболат Мұқаев, Сергей Плотников, Ерік Сұлтанов, Қарағанды облысының әкімі Жеңіс Қасымбек, цифрлық даму, инновация және аэроғарыш өнеркәсібі министрінің орынбасары Аблайхан Оспанов, индустрия және инфрақұрылымдық даму министрінің орынбасары Аманияз Ержанов, облыстық мәслихат депутаттары және кәсіпкерлер қатысты.

Шараны ашқан «Өңір» депутаттық тобының жетекшісі Михаил Бортник Мемлекет басшысының экономиканы одан әрі цифрландыру бойынша міндет қойғанын еске сала отырып: «Цифрландыру - кәсіпорындар мен жалпы ел экономикасының бәсекеге қабілеттілігін қамтамасыз етудің маңызды шарты. Одан әрі өсу цифрландыру қарқынын жеделдетуге, экономиканың барлық секторларында цифрлық құралдарды белсенді енгізуге байланысты», деді.

Сенатор Қарағанды облысы сандық технологияларды енгізуде айтарлықтай жетістіктерге қол жеткізген жетекші индустриялық аймақ екенін атап өтті.

Қазақстан Республикасының индустрия және инфрақұрылымдық даму министрінің орынбасары А.Ержанов тау-кен өнеркәсібінің жүйе құраушы кәсіпорындарын цифрландыру аясында 283,3 млрд теңге сомасына 53 жобаны жүзеге асыру жоспарланғанын, оның ішінде 59,1 млрд теңгеге 22 жоба іске асқанын, 31 жобаны аяқтау көзделіп отырғанына тоқталды.

«Қазақмыс корпорациясы», «Алтыналмас АК», «Eurasian Foods Corporation» акционерлік қоғамдарының басшылары аталған кәсіпорындарда цифрландырудың жоғары деңгейіне қол жеткенін айтты, бұл өндіріс процестерін айтарлықтай оңтайландыруға мүмкіндік берді.

Сенаторлар С.Ершов пен Е.Сұлтанов экономиканың тиімділігі мен ұлттық экономиканың бәсекеге қабілеттілігін арттыру мақсатында барлық салаларды одан әрі цифрландырудың маңызды екеніне назар аударды.

Сенаторлар көшпелі отырыс аясында «Бемер арматура», «Recycling Company», «Eurasian foods», «Maker» кәсіпорындарында болып, өндіріс процестеріне сандық технологияларды енгізу барысымен танысты.

Отырыс қорытындысы бойынша ұсынымдар қабылданып, еліміздің Үкіметіне, орталық және жергілікті атқарушы органдарға жіберілетін болды.

Соңғы жаңалықтар

Италияда тоғыз жүлде алдық

Спорт • Бүгін, 10:10

Әр сала үздіктеріне құрмет танытты

Аймақтар • 05 Наурыз, 2021

Бағдат Мусин Шымкентке барды

Аймақтар • 05 Наурыз, 2021

Ұқсас жаңалықтар