Қоғам • 11 Желтоқсан, 2019

Халықты білікті заң көмегімен қамтамасыз ету қажет

190 рет
көрсетілді
2 мин
оқу үшін

Түркістанда Мәжіліс­тің Заңнама және сот-құ­қық­тық реформа коми­те­тінің көш­пелі отыры­сы өтті. Ха­лықты бі­лік­ті заң кө­мегімен қам­та­ма­сыз етуді мақ­сат еткен отырысқа облыс­тың, Шым­кент қала­сы­ның, сондай-ақ Жамбыл, Қызылорда облыс­та­ры­­ның заң және құ­қық қор­ғау саласы қыз­мет­кер­ле­рі қатысты.

Халықты білікті заң көмегімен қамтамасыз ету қажет

Жиынға басшылық еткен бейінді комитет төрағасы, Nur Otan партиясы жанындағы Құқықтық кеңесінің төрағасы, заң ғылымдарының докторы, профессор Нұрлан Әбдіров отырыстың мақсаты мен маңызына тоқталды. Сондай-ақ депутат өткен жылы Мемлекет басшысы қол қойған «Адвокаттық қызмет және заң көмегі туралы» Заңның жергілікті жерлерде жүзеге асырылуын назарға ала отырып, білікті заң көмегін көрсету жүйесін одан әрі дамыту, жетілдіру аясында заңнамалық жаңалықтардың практикалық маңызын түсіндіру, заң консультанттары институтын одан әрі жетілдіру, адвокатура мен құқық қорғау органдарының өзара іс-қимылын үйлестіру басты міндет екенін атап өтті. Ал Түркістан облысы әкімінің орынбасары Ұлан Тәжібаев халықтың заң құқықтарын білуде осындай басқосулардың маңызы зор екендігін айтты.

Еске сала кетсек, аталған Заңмен құ­ра­­­мын­да 6 адвокат, қоғамның 3 өкілі және отставкадағы 2 судья бар тәртіптік комис­сиялардың екі деңгейлі жүйесі көз­дел­ген, бұл азаматтардың шағымдарын объективті және жан-жақты қарастыруды, ашықтық пен айқындықты қамтамасыз етеді. 2020 жылдан бастап адвокаттардың, заң консультанттарының кәсіби жауапкершілігін міндетті сақтандыру енгізіледі, бұл сенім білдірушілерге білікті заң көмегін алуға және сапасыз заң көмегі көрсетілген жағдайда келтірілген зиянды өтеуге кепілдік береді. Сондай-ақ әлеуметтік және қаржылық қиын жағдайдағы азаматтар үшін адвокаттан немесе заң консультанттарынан, өзінің құқықтық жағдайын толық сүйемелдеумен ақысыз заң көмегін алу көзделген.

Жыл бойы осы және басқа заң талап­та­ры­ның орындалу деңгейіне қатысты арнайы мониторинг жүргізілген. Отырыс барысында осы мониторингтің қорытындысы жарияланып, ашық пікірлер мен ұсыныстар айтылды. Оның барлығы алдағы уақытта Парламент Мәжілісінде өтетін Үкіметтік сағатта және келесі жылға жоспарланған Парламенттік тыңдауда тақырыпқа арқау болмақ.

 

Түркістан облысы