Конгрессмендер президентке билікті шектен тыс қолданды және Конгресс жұмысына кедергі келтірді деген айып тағуда. Саясаткерлер екі мәселені дауысқа салып, алғашқы айып бойынша 230 адам импичментті қолдап, 197-сі қарсы болды. Конгресс жұмысына қатысты айыппен 229 конгрессмен келісіп, 198-і қарсы болды. Өкілдер палатасы бұл шешімді Сенатқа жіберді. Ендігі кезекте сот процесі басталады. Мұнда Конгрестегі өкілдер айыптаушылар болса, сенаторлар алқа билер ретінде қатысады. Істі жүргізу АҚШ-тың Жоғарғы сотына міндеттелген. Импичмент жариялануы үшін сенаторлардың үштен екісінің келісімі керек, бұл шамамен 67 дауысты білдіреді. Осы жерде Конгрестің жоғарғы палатасындағы 100 орынның 53-і республикашыларға тиесілі екенін ескерсек, импичменттің жариялануы екіталай. Ал демократтар бұл істі соңына дейін жеткізетініне сенімді. Алайда АҚШ заңына сәйкес, президенттің келесі сайлауға қатысуға құқы бар.
Конгрестегі демократтар бұл іске жақсылап дайындалған сыңайлы. Олар өткен дүйсенбіде 658 беттен тұратын баяндама дайындап, таратты. Құжатта президентті пара алды, Украина мемлекет басшысын АҚШ-тың бұрынғы вице-президенті Джо Байденге қатысты тергеу бастауға үгіттеді деген айыптар көрсетілген.
Бұған дейін Конгрестің Заң комитеті билікті шектен тыс пайдалану мен құрылым жұмысына кедергі келтіру деген тармақтарымен келіскен болатын. Бұл жердегі билікке қатысты дау биыл 25 шілдедегі Украина президенті Владимир Зеленскиймен әңгімесінен туындап отыр. Дональд Трамптың айтуынша, бұрынғы вице-президент Байденнің ұлы Хантер Байден Украинадағы бірнеше заң бұзушылыққа қатысқан. Нақты айтқанда, президент оны 2014-2019 жылдар арасында украиналық Burisma компаниясының директорлар кеңесінің құрамында жүріп пара алды деп есептейді. Бұған негіз жоқ емес. Өйткені дәл осы кезде Джо Байден Президент әкімшілігінде Украина бойынша әкімшілік басшысы болып қызмет атқарған-ды. Оның Украина құқық қорғау қызметкерлерінің жұмыстан босатылуына қатысы барын Конгрестегі республикашылар да айтып жүрген.
Өзіне тағылған айыптармен Дональд Трамп келіспейді. Президент Өкілдер палатасының төрағасы Нэнси Пелосиге хат жолдады. Онда тағылған айыптардың мүмкін еместігін айтып, Пелосиді Америка демократиясына соғыс ашты деп кінәлайды.
Жоғарыда айтып өткеніміздей, АҚШ тарихында бұған дейін екі президентке импичмент жарияланған. Өкілдер палатасы 1868 жылы Эндрю Джонсонға, 1998 жылы Билл Клинтонға қатысты іс қозғаған. Дегенмен, Сенат екі президентті де ақтап шыққан болатын. Негізінде президент сайлауы жақындаған кезде импичмент жариялау мемлекеттегі демократтар үшін де қауіпті. Өйткені Дональд Трампты қолдайтын аймақтардың Конгрестегі демократтардың қайта сайлануын қиындатуы мүмкін. Мұндай стратегияны қолдануының себебі көбіне әлі де түсініксіз болып отыр.
Елдегі жағдайға қатысты халық та екіге жарылғандай. Өткен аптада Washington Post пен ABC жүргізген сауалдамаларының нәтижесін жариялады. Қатысушылардың 49 пайызы импичментті қолдап, Трамп билік басынан кетсін десе, респонденттердің 46 пайызы тағылған айыптармен келіспейді. Джордж Вашингтон университетіндегі саяси менеджмент бағдарламасының директоры, профессор Тодд Белт өз сұхбатында сенаторлардың көбі Дональд Трампты қолдайтынын айта келе, импичмент жарияланбайды деп болжам жасайды. Ал конгрессмен Дэвид Скисиллин «Егер президент жауапкершілікке тартылмаса, Сенаттағы әріптестерім өз міндеттерін орындамаса, онда бұл жағдай демократиямызға қауіп төнгенін білдіреді», деді.
