«Самұрық-Қазына» ҰӘК» АҚ Басқарма төрағасы Ахметжан Есімовтің айтуынша, қор соңғы жылдары Қазақстандағы қайырымдылық бағдарламаларының ең ірі донорына айналды. Атап айтқанда, оның қайырымдылық мақсатқа бөлген қаражатының көлемі соңғы 5 жылда 60 миллиард теңгеден асып, ұзын саны 1 миллионнан астам адамды қамтыды.
– Меморандум аясында бірқатар әлеуметтік жобаларды жүзеге асыру жоспарлануда. Тұңғыш Президент – Елбасының бастамасы «Қамқорлық» бағдарламасы іске қосылады. Осындай бағдарламаларды жүзеге асыру арқылы «Самұрық-Қазына» қоры ауыр жағдайға тап болған адамдардың мәселелерін шешуге елеулі үлесін қосатынына сенімдімін, – деді А.Есімов.
Ұлттық әл-ауқат қорының басшысы «Қамқорлық» бағдарламасы бизнестің, мемлекеттің және үкіметтік емес ұйымдардың үшжақты ынтымақтастығының жарқын үлгісі екенін айтты. Бұл бағдарлама сал ауруына душар болған балаларды оңалту, инклюзивті қолдау кабинеттері мен материалдық-техникалық жабдықтау бағыттары бойынша әлеуметтік мәселелерді шешуді қарастырады.
Тұңғыш Президент Қоры 171 маманды оқытып, аталған орталықтарды ашу үшін 49 арнайы маманның біліктілігін арттырмақ. Жергілікті атқарушы органдар тиісті үй-жай дайындайды. Жаңа оңалту орталықтары мен инклюзивті қолдау кабинеттері ауруханалар, емханалар және жалпы білім беретін мектептер базасында ашылады.
– Біздің жұмыс тобымыз барлық аймақты аралап, оңалту орталықтары мен инклюзивті кабинеттер орналасатын елді мекендерді анықтады. Олар 8 облыста жұмыс істеп тұрған ауруханалар, емханалар және жалпы білім беретін мектептер базасында ашылады. Алғашқы кезеңге қажетті мамандар, жабдықтар тізімі анықталды. Мамандарды даярлау және қайта даярлау бағдарламалары әзірленді. Елбасы алдымызға осы жылы оңалту орталықтарын ашу міндетін қойды. Әрине бұл үлкен жұмыс, – деді Қазақстанның Тұңғыш Президенті – Елбасы Қорының атқарушы директоры Ә.Исекешев.
Ә.Исекешев бұл істе қолдау білдірген «Самұрық-Қазына» компаниясына алғысын білдіріп, ерекше қажеттіліктері бар балалар алдағы уақытта да назардан тыс қалмайтынын айтты.
