Бүгінде Ертіс өзенінде мұз қатуы мен мұз кептелісінің орын алуына байланысты өзендегі судың деңгейі көтерілген. Осының салдарынан Восточный, Мирный кенттерінің және Түйемойнақ аралының тұрғын алаптарын су басу қаупі туындапты. Ал Түйемойнақ аралындағы тұрғын үйдің ауласын су алған. Осы үйде тұратын 8 адам, оның ішінде 3 бала қауіпсіз жерге шығарылды.
Шығыс Қазақстан облысының ТЖД және полиция қызметкерлері аталған елді мекендерде тұратын тұрғындарды су басу қаупі туралы алдын ала хабардар етіп және су тасқыны жағдайы кезіндегі алғашқы жұмыстарды жүргізді. Сонымен қатар құтқарушылар өзен жағасында тәулік бойы бақылау бекеттерін қою арқылы тұрақты мониторинг өткізді (Восточный кентінде және Түйемойнақ аралында). Азық-түлікпен қамтамасыз етілген алты эвакуациялау пункті ұйымдастырылды. ТЖ департаментінде азаматтық қорғау органдарының іс-қимылдарын үйлестіру үшін жедел штаб құрылды.
Қазіргі уақытта Ертіс өзенінің су деңгейі төмендеуде. 455 см сыни белгідегі судың нақты деңгейі 445 см-ді құрайды. Жағдай бақылауда.
Ал 2019 жылғы 1-5 желтоқсан аралығында температураның жоғарылауына (+2-ден +10 градусқа дейін) және мұз қатпарының әлсіз болуына байланысты Сырдария өзенінің гидрологиялық бекеттерінде су деңгейінің көтерілуі орын алды. Қазіргі уақытта су деңгейі төмендеуде.
Бұл ретте Сырдария гидрологиялық бекеті Қараұзақ тармағындағы судың нақты деңгейі 695 см 13 қаңтарда сағат 18.00-де судың деңгейі 2 см төмендеді, қауіпті белгі – 665 см, сыни белгі – 770 см деп хабарлады. Жақын маңдағы Жосалы елді мекеніне дейінгі қашықтық – 300 м.
Сырдария – Жосалы бекетінде судың нақты деңгейі 678 см (өзгеріссіз) құрайды. Қауіпті белгі – 680 см, сыни 720 см. Жосалы елді мекеніне дейінгі қашықтық – 200 м. Аталған бекеттерде ТЖ басқармасының және жергілікті атқарушы органдардың қызметкерлері су деңгейіне мониторинг жүргізуде.
