Өз қаржысына кітапхана салған

Аймақтар • 20 Қаңтар, 2020

Өз қаржысына кітапхана салған

Түркістан облысы Келес ауданының Жолбасшы ауылында ерекшелеу кітапхана оқырмандарға тұрақты қызмет көрсетіп келеді. Алақандай ауылдың рухани ордасына айналған кітапханада 7 мыңнан астам кітап қоры бар.

Ғалымжан ЕЛШІБАЙ

Қазақ әдебиеті, тарихы және ғылымның түрлі саласына қатысты еңбектерден бастап, әлемнің классик жазушыларының шығармаларын да таба аласыз.

Ерекшелеу дейтініміз, кітапхананы Гүлбала Сәрсенованың отбасы өз қаржысына салған. Ауылда бұған дейін кітапхананың жеке ғимараты болмаған. Алғашында клубтың бір бұрышын паналап, кейін мектептің тар бөлмесіне орналасқан. Кітапханашы Гүлбаланың көшкен сайын бүлінетін кітаптарға жаны ашитын. Жеке ғимарат жөніндегі ой да осы рухани азыққа жанашырлықтан туындаса керек. Отбасындағы 5 ұл-қыздың алды студент. Олардың да жағдайын, ертеңін ойлау қажет. Дегенмен отағасы Нұржан екеуі ақылдаса келіп, кітапхана салу жөнінде шешімге келеді. «Көп ойланбастан көзді жұмдым да несие алдым. Жұбайым құрылысшы. Яғни, құрылысшыларға беретін қаржыны үнемдедік. Тек қана құрылыс материалдарын сатып алдық. Мұнан гөрі өздеріңе «времянка» салып алмайсыңдар ма, деушілер де табылды. Мақсатымыздан қайтпадық. Өйткені халық рухани бай болуы керек», дейді Г.Сәрсенова сол бір күндерді еске алып.

Осылайша материалдық құндылықтан гөрі рухани жан азықты артық санаған қарапайым кітапханашы Г.Сәрсенованың отбасы ғимарат салумен қатар, қолда бар кітап қорын шашау шығармай сақтап қалды. Бүгінде Жолбасшы ауылының ғана емес, төңірегіндегі бірнеше елді мекеннің тұрғындары осы жерде кітап оқып, дүниетанымын кеңейтіп келеді. Ауыл кітапханасының бүгінде 700-дей тұрақты оқырманы бар. Жылына кітап іздеп 9 мыңдай адам келеді екен. Сондай-ақ ауыл кітапханасы көптеген мәдени іс-шараның ұйытқысы болып отыр.

Түркістан облысы