Алайда, неге екені белгісіз, жаңағы айтқан техникалардың төпелеп қар жауса, боран соқса болды, жетіспейтіндігі белгілі болады да шығады. Бұл оқиға биыл да айнымай қайталанды. Жағдайдың осылайша қалыптасқанына наразы болған жұрт қазіргі уақытта әлеуметтік желіде атқарушы билікті аямай сынап жатыр.
Жуырда болған алай-түлей боран көшелер мен жолдарды жауып тастады да, бұл саладағы кемшіліктердің бетін ашты. Мұны облыс әкімі Жеңіс Қасымбектің өзі де мойындады.
– Соңғы соққан боран біраз мәселенің бетін ашты: техниканың жеткіліксіз екенін көрсетті. Республикалық маңыздағы жолдар бойынша, әсіресе Қарағанды – Теміртау учаскесіндегі жағдайға байланысты шағымдар өте көп. Павлодар бағытында да солай. Балқашқа баратын жолды жабуға тура келді. Облыс орталығы бойынша да шағымдар жеткілікті. Негізі, бұл саладағы қызметтің жұмыс істейтінін көріп отырмыз. Бірақ тұрғындар тарапынан шағымдар үсті-үстіне түсуде: қар жолдың шетіне үйіле салады, жаяу жүргіншілер жолдары тазартылмайды. Сол себепті адамдар жол бойымен жүреді де, осыдан келіп апаттық жағдайлар туындайды, – деді ол аппарат жиынында.
Көшелері мен жолдары қалың қардың құшағында қалған Қарағандыда қар тазалау жұмыстарымен алты компания айналысады екен. Олардың төртеуі мердігерлік болса, қалғаны – коммуналдық кәсіпорындар. Кешегі күні қар тазалауға 200-ге жуық техника жұмылдырылған. Бүгінде мұның өзі аздық етіп отыр. Облыс орталығының басты даңғылдары тазаланғанымен, шеткерірек көшелер мен жеке меншік үйлер орналасқан секторлардағы қарды сыртқа шығару ісінде олқылық бар. Әсіресе жеке секторлардағы жағдай алаңдатады. Мұндағы тау-тау болып үйіліп қалған қарды қазір сыртқа шығармаса, көктемде жағдай тіпті ушығып кетуі мүмкін. Бүтіндей шағын аудандарды қарғын су алу қаупі бар. Яғни, бұл аталған мәселелердің түйіні қосымша техника күшін алғанда ғана шешіледі деген пікір айтады қала басшылығы.
Кеншілер астанасындағы жағдай осылай болғанда, облыстың өзге қалалары мен аудан орталықтарындағы және ауылдардағы жағдай қандай десеңізші?!
Ал синоптиктердің болжауынша, Қарағанды облысы бойынша наурыз айына дейін боран мен бұрқасын мол болатын көрінеді.
Қарағанды облысы
