Қала әкімінің орынбасары Тәжібек Мұсаевтың айтуынша, әкімдік бұған дейін өтініш берген 16 отбасына қолдарынан келетін кәсібін ашуға жәрдемдескен екен. Олардың біразына өндірістік, құрылысқа қажетті құралдар, жемшөп қоспаларын шығаратын шағын цех ашуға мүмкіндік жасаған. Республика бойынша Айжани Адайқызының бастамасымен жүзеге асып жатқан «Менің кәсібім» жобасына қала тұрғындары ризалығын білдіріп отыр.
Отанасы Құрбанкүл Абдуллаеваның үйінде бұған дейін екі ешкі бар екен. Тәулігіне үш литр сүт беретін асыл тұқымды ешкі асырау қалалықтарға қолайлы болып отыр. Жемшөбі сиырдан арзанға түскенімен қоймай, көптеген ауруға ем ешкі сүтін көрші-көлемге сатып табыс табады екен. Бес баласы бар отбасының иесі де жұмыссыз. Оған қала әкімінің орынбасары «Жасыл аймақ» бағдарламасы бойынша жұмыс тауып беруге уәде етті.
Айта кетерлігі ешкі сүті сүйек сырқырағанда, буын ауырғанда шипа. Бүгінде ғалымдар ешкі сүтінің емдік және аурулардың алдын алуда, әсіресе, қаназдыққа, тағамдық аллергияда, туберкулезде, асқазан, ішек-қарын жолдары ауруларында, диабетте, диатезде, ағзаның қорғаныс қызметін арттыруда, ағзадан ауыр металдардың тұздары мен радионуклидтерді шығаруда және көздің нашар көруінде пайдалы деген қорытынды жасады. Ешкі сүтінде кальций, магний, фосфор, марганец, мыс, А, В1, С және Д дәрумендері, аскорбин қышқылы бар. Сиыр сүтіне қарағанда ешкі сүтінде В12 дәруменінің құрамына кіретін кобальт мөлшері 6 есе көп, ал калийдің жоғары мөлшері жүрек-қантамыр жүйесінің қызметіне оңтайлы әсер етеді. Сиыр сүтіндегі темірге қарағанда ешкі сүтінің темірі жақсы сіңеді.
Ғалымдар ешкі сүтінің әсіресе қаназдықтың алдын алуда аса маңызды екенін айтады. Түркістандағы көп балалы аналардың дені қаназдықтан зардап шегеді. Балаларды қоректендіруде сиыр сүтіне қарағанда ақ ешкі сүті пайдалырақ келетінін де айта кету керек. Әрине, бала үшін ана сүтіне жететін тағам жоқ, бірақ жасанды немесе аралас қоректендіруде ақ ешкі сүті ана сүтін алмастыра алады, оны 6 айдан асқан балаларға қосымша қорек ретінде пайдалануға болады.
Ескендір ЕРТАЙ
Түркістан облысы
