Елбасы Нұрсұлтан Назарбаев агроөнеркәсіп кешені алдына мал санын арттыру, таяу жылдарда экспортқа шығарылатын ет көлемін 60 мың тоннаға жеткізу міндетін қойып отыр. Сондықтан да елімізде ауыл шаруашылығын 2020 жылдарға дейінгі кезеңде дамытудың кешенді бағдарламасы жасалып, жүзеге асырыла бастады. Мұндай міндеттердің мал тұқымын асылдандырмайынша, салада малдәрігерлік қызметті жақсартпайынша мүмкін еместігі түсінікті.
Елбасы Нұрсұлтан Назарбаев агроөнеркәсіп кешені алдына мал санын арттыру, таяу жылдарда экспортқа шығарылатын ет көлемін 60 мың тоннаға жеткізу міндетін қойып отыр. Сондықтан да елімізде ауыл шаруашылығын 2020 жылдарға дейінгі кезеңде дамытудың кешенді бағдарламасы жасалып, жүзеге асырыла бастады. Мұндай міндеттердің мал тұқымын асылдандырмайынша, салада малдәрігерлік қызметті жақсартпайынша мүмкін еместігі түсінікті.Үкімет соңғы жылдары бұл бағытта кешенді жұмыстар жүргізіп, қаржылай қолдау көрсетуді қолға алды. Еліміз егемендік алғаннан кейін ауыл шаруашылығының ажары тайып, ветеринариялық қызметтің кенжелеп қалғаны да шындық. Мемлекет басшысы Қазақстан Республикасы Тәуелсіздігінің 20 жылдығына арналған агроөнеркәсіп кешені қызметкерлерінің форумында сөйлеген сөзінде еліміздегі ветеринариялық қызметтің қазіргі жай-күйіне кеңінен тоқталып, салада алдында тұрған міндеттерді белгілеп, түйінді мәселелерді шешуге бірқатар тапсырмалар берген болатын. Республикада ветеринариялық қауіпсіздікті қамтамасыз ету мақсатында «Ветеринария туралы» заңға біраз өзгерістер мен толықтырулар енгізілгені мәлім. Осындай өзгерістердің нәтижесінде ауылдық жерде малдәрігерлік қызмет сапасын арттыру үшін мамандарға коммуналдық төлемнен жеңілдіктер берілді, олар тұрғын үй алуға және салуға жеңілдетілген өсіммен несие алатын әлеуметтік сала мамандарының санатына жатқызылды, ауылға барған мал мамандарына көтермеақы төленетін болды. Осындай тұрмыстық игіліктер ынталандырған жас мамандар ауылдық жерлерге бара бастады. Өткен жылы Елбасының «Дипломмен – ауылға!» жобасы бойынша 13 жас маман ауылдық округтерде жұмысқа орналасты. Бұл үрдіс биыл да жалғасын тауып, осыншама жас түлектер ауылдық жерлерге баруды ұйғарып отырған көрінеді.
Енді биылдан бастап аудандық және ауылдық жерлердегі республикалық бюджет есебінен жаңадан құрылған ветеринариялық ұйымдарды құрал-жабдықтармен жарақтандыру басталды. Жақында ғана ашылған «Анди» ЖШС-інде облыстың аудандық және ауылдық округтеріндегі ветеринария ұйымдарына автокөліктерді салтанатты тапсыру шарасы өткізілді.
Қалалық, аудандық және ауылдық округтердің ветеринария кәсіпорындары өкілдеріне су жаңа автокөліктердің кілтін облыс әкімінің орынбасары Марат Тағымов тапсырды. Ол қызметтік көлік иелерін құттықтап сөз сөйледі. Елбасының саланы дамытуға айрықша көңіл бөліп отырғанын тілге тиек ете келіп, мұндай игіліктердің ветеринариялық қауіпсіздікті қамтамасыз етуге алғышарт жасайтынын айтты. Өз жұмыстарын жаңаша жүргізіп, мал ауруларының алдын алу, болдырмау жолында, мал өнімдерінің сапасын арттыру бағытында мол қайтарыммен еңбек етуге тілектестігін білдірді.
Салтанатты сәтте ветеринариялық стансаларға 13 «Джип» және дәрілеу қондырғысы орнатылған осыншама «УАЗ», ауылдық округтердегі осындай пунктерге 137 «Нива» автокөліктері табыс етілді.
– Осы автомобильдерді қоса есептегенде 60 түрлі малдәрігерлік құрал-жабдықтар сатып алуға 588 миллион теңгеге жуық қаржы бөлінді. Соның 40-тан астам құрал-жабдығын қазірдің өзінде алып болдық. Малдәрігерлік стансаларға аудан орталығынан жеке қызметтік ғимарат, ал, пунктерге бөлме бөлінетін болды. Олар ветеринариялық құрал-жабдықтармен толық жарақтандырылады. Осының барлығы сайып келгенде, облыстағы мал шаруашылығын дамытуға серпін беретін үрдіс, – дейді облыстық ауыл шаруашылығы басқармасы ветеринария бөлімінің жетекшісі Асанхан Жұмашұлы.
Бұдан басқа қазір облыстың төрт ауданында бес ветеринариялық зертхананың құрылыс-монтаж жұмыстары аяқталып қалды. Олар да осы заманғы озық зертханалық құрал-жабдықтармен жарақтандырылып, жақын күндері пайдалануға беріледі деп күтілуде.
Сатыбалды СӘУІРБАЙ,
«Егемен Қазақстан».
Ақтөбе облысы.
