Жиынды ашқан Мемлекеттік хатшы Абайдың 175 жылдығы мен әл-Фарабидің 1150 жылдығын мерекелеудің бастапқы салтанатты рәсімдері Нұр-Сұлтан мен Алматы қалаларында басталғанына назар аударды.
«Ұлы тұлғалардың мерейтойлары өткен айда салтанатты жағдайда ашылды. Атап айтсақ, 21 қаңтарда Нұр-Сұлтан қаласындағы «Астана Опера» театрында Абайдың 175 жылдық мерейтойы өзіндік мазмұнымен, сондай-ақ 29 қаңтарда Алматы қаласындағы Әл-Фараби атындағы Қазақ ұлттық университетінде өткен жиында әл-Фарабидің 1150 жылдық мерейтойын тойлау басталды», деді Қ.Көшербаев.
Мемлекеттік хатшы ұлы ойшылдар Абай мен әл-Фарабидің ұлағатты мұраларын зерделей келе, олардың ізгілік идеяларының түпкі негізі елдің бірлігі мен ынтымағымен үндесетініне тағы да көз жеткеніне тоқталды.
Комиссия отырысында Мемлекет басшысы Қасым-Жомарт Тоқаевтың халыққа Жолдауы мен «Абай және XXI ғасырдағы Қазақстан» атты мақаласында жаңа міндеттерге, соның ішінде мерейтойлық іс-шаралар бағдарлары нақты белгіленуіне ерекше екпін берді. Мемлекеттік комиссия мүшелері мен мемлекеттік органдар Абай мен әл-Фарабидің рухани мұраларын насихаттау барысында зиялы қауым мен отандастарымыздың бұқаралық ақпарат құралдарында кеңінен жарияланған пікірлері мен ұсыныстарын ескеруі тиіс.
«Біздің ендігі мақсатымыз Мемлекет басшысы Қасым-Жомарт Тоқаевтың халыққа Жолдауында атап өткеніндей, әл-Фарабидің 1150 жылдық, Абай Құнанбайұлының 175 жылдық мерейтойларын, ғұлама тұлғаларымыздың еңбектерін халық арасында ысырапшылдыққа жол бермей кеңінен дәріптеуіміз керек. Мемлекет басшысының таяуда жарық көрген «Абай және XXI ғасырдағы Қазақстан» атты мақаласында белгіленген келелі міндеттерге орай, мемлекеттік комиссия жұмысының жауапкершілігі одан әрі арта түсті деп ойлаймын. Аталған мақалаға баспасөз бетінде үн қосқан зиялы қауым өкілдері мен отандастарымыздан Абай мұрасын насихаттауға байланысты көптеген ұсыныс келіп түсті. Жұртшылықтың бұл ұсынысын барша орталық және жергілікті атқарушы органдар жұмыс барысында қаперге алуы тиіс», деді Қ.Көшербаев.
Жиында мерейтойды өткізудің жалпы республикалық жоспарлары оңтайландырылып бекітілгені, қазіргі таңда оның жүзеге асырылып жатқаны айтылды. Сондай-ақ Қ.Көшербаев өткен аптада Қордай ауданында орын алған жағдайға байланысты қайтыс болғандардың отбасыларына және туған-туыстарына көңіл айтып, ерен тірлікті, егемен бірлікті, татулықты ту еткен халқымыздың ынтымақ-бірлігінен айрылмауын тіледі. Осы орайда, Абай мен Әбу Насыр әл-Фарабидің де ұрпаққа мұра етіп қалдырған жауһар ойларының түпкі негізі елдің бірлігін сақтауға арналғанын еске салып өтті.
«Абай «Адамзаттың бәрін сүй, бауырым деп» аманатын айтса, әл-Фараби «Нағыз бақытқа кенелтетін іс адамдарды бір-біріне көмектесу үшін біріктіретін қала – қайырымды қала. Ал бақытқа жету жолында бір-біріне қол ұшын беретін қоғам – қайырымды қоғам» деп өсиетін қалдырған», деді Мемлекеттік хатшы.
Отырыста Мәдениет және спорт министрі Ақтоты Райымқұлованың, Білім және ғылым министрі Асхат Аймағамбетовтің, Сыртқы істер министрі Мұхтар Тілеубердінің, Л.Н.Гумилев атындағы Еуразия ұлттық университетінің ректоры Ерлан Сыдықовтың, Әл-Фараби атындағы Қазақ ұлттық университетінің ректоры Ғалымқайыр Мұтановтың есептері тыңдалды.
Жиын соңында орталық және жергілікті атқарушы органдарға мерейтойлық іс-шараларды өткізуде ысырапшылдыққа жол бермеу, оларды жоғары идеялық және нақты құндылықтармен қамтамасыз ету жөнінде тапсырмалар берілді.
