Білім және ғылым министрі Асхат Аймағамбетовтің сөзіне қарағанда, кейбір мұғалімдер есеп бөлімі тарапынан жалақы асырылып не болмаса кем беріледі деп жатады. «Осы орайда, педагогтердің жалақысын есептеу мәселесі өзекті болып отыр. Бұл ретте облыстық білім басқармалары мен аудандық білім бөлімдерінің басшыларына сәйкесінше тапсырмалар берілді. Ұстаздар өздеріне тиесілі жалақыны дұрыс алулары керек», деді А.Аймағамбетов.
Директорлар жалақысы артады
2019 жылғы 31 желтоқсанда Мемлекет басшысы Қ.Тоқаев «Педагог мәртебесі туралы» заңға қол қойған болатын. 2020 жылдан бастап заңды іске асыру кезеңіне көшу басталды. Жалпы заңнамалық құжат 21 баптан тұрады. Құжат жарты миллионнан астам педагогтің мүддесін қамтамасыз етеді. Заң нормалары мектепке дейінгі, орта, кәсіптік және техникалық білім беру, қосымша білім беру, мамандандырылған, арнайы білім беру ұйымдарының, әдістемелік кабинеттердің педагогтеріне қатысты.
Осы орайда солтүстік және орталық өңірлерде директорлар мен олардың орынбасарлары тапшы екені белгілі болып отыр. «Директорлар үшін жай ғана мұғалім болып істеген ыңғайлы. Директорлардың жауапкершілігі жоғары және қағазбастылық көп, балалармен жұмыс істеу деңгейі де өзгеше. Бар мәселе – ынталандыруда, яғни директорлардың айлығы мұғалімдердің айлығынан төмен. Бұл ретте жалақыны 2 есеге арттыру директорлар мен олардың орынбасарларына да қатысты болмақ. Ендігі кезекте директорлар өз шеберліктеріне байланысты санаттарға бөлініп, өз жалақыларын 2 есеге, яғни 100 пайызға арттыру мүмкіндігіне ие. Директорларды да қолдайтын боламыз», дейді ведомство басшысы.
Болашақ педагогтер үшін шекті балл жоғарылайды
Бүгінгі таңда ең үздік мектеп түлектерінің арасында мұғалім мамандығы айтарлықтай сұранысқа ие емес. Осы ретте талапкерлер тарапынан педагогикалық бағыттар сирек таңдалады.
«Еліміз бойынша мұғалім тапшылығы 5 мың адамды құрайды. Бүгінгі таңда 145 мың студент педагог мамандықтары бойынша оқиды. Жыл сайын педагогикалық бағыттағы жоғары оқу орындарын 40 мың түлек тәмамдағанмен, педагог тапшылығы сақталып отыр. Неге? Біріншіден, түлектер мектепке жұмыс істеуге барғылары келмейді, екіншіден ынталандыру төмен», деді Асхат Аймағамбетов.
Ведомство басшысының айтуынша, талапкерлерді педагогикалық мамандықтарға тарту үшін былтыр министрлік бірқатар нақты шаралар қабылдады. Мәселен, 2019 жылы педагогикалық мамандықтарға түсу үшін шекті балл 60 балға дейін өсті (бұрын 50 балдан кем емес болатын). Ендігі кезекте 2020 жылы шекті балды 70 балға дейін арттыру жоспарлануда.
