Әлем • 27 Ақпан, 2020

Коронавирус тараған елдерге бармаған абзал

1281 рет
көрсетілді
3 мин
оқу үшін

Қытайдан таралған коронавирус бүгінде 38 елге таралып, 80 мыңнан астам адамға жұқты. Қазіргі кезде індет өршіп тұрған елдердің қатарында Қытайдан бөлек Оңтүстік Корея, Жапония, Италия және Иран қатарлы мемлекеттер бар. Соған байланысты елімізде сақтық шаралары жалғасып жатыр. Кеше Қазақстанның Бас мемлекеттік санитарлық дәрігері Жандарбек Бекшиннің қаулысымен ауру асқынған елдердің тізімі жарияланды.

Коронавирус тараған елдерге бармаған абзал

Президент жанындағы Орталық коммуникациялар қызметінде өткен баспасөз мәслихатында бас санитар қауіпті елдерден келген азаматтар 1 наурыздан бастап үй карантиніне оқшауланатынын айтты. Атап айтқанда, қауіптілігі жағынан бірінші санатқа Қытай Халық Республикасы (Гон­конг, Тайвань, Макао), Оңтүстік Ко­рея, Жапония, Италия және Иран қатар­лы мемлекеттер мен аймақтар енсе, Син­га­пур, Таиланд, Малайзия қатарлы елдер қауіп­тілігі жағынан екінші санатқа жатқызы­лып отыр. Ал үшінші санаттағы елдер – Вьет­нам, Германия, Аустралия, АҚШ, БАӘ, Канада.

Сондай-ақ Қазақстан Оңтүстік Корея мен Иранға әуе рейстерін азайтатын болады. «Біз кей елмен әуе қатынасын азайтатын бо­ламыз. Олардың арасында, қауіптілігі жа­ғы­­нан бірінші санатқа енген Оңтүстік Корея бар. Бұл елде біздің 34 мың азаматы­мыз бар. Біз 1 наурызға дейін барлық азама­ты­мызға елге қайтып келуге мүмкіндік бере­міз. Ол үшін бұл елге апта сайын 9 рейс, яғ­ни 7 рейс Алматыдан, 2 рейс Нұр-Сұл­тан­­нан ұшады. Ал 1 наурыздан кейін Оң­түстік Кореяға әуе тасымалы 3 рейске дейін қысқарады. Иран бойынша жағ­дай әлде­қайда жеңіл, себебі онда біздің 170-ке жуық азаматымыз бар. Олар 1 нау­рыз­ға де­йін қайтып келуі тиіс. Себебі, одан кейін Иран Ислам Республикасымен әуе қаты­­насы тоқтатылады. Ал Жапонияда 180 қазақ­­стан­дық бар. Жапонияға аптасына екі рет рейс ұшады. Жолаушылар ағыны аз бол­ған­дық­тан, әзірге еш қиындық жоқ. Түркия, Пәкіс­тан, Оман, Ауғанстан сынды елдер Иран­мен әуе қатынасын уақытша шектеген еді. Өзге мемлекеттер бойынша шектеу қою мәсе­лесін қарастырып жатырмыз», деді Ж.Бекшин.

Дүниежүзілік денсаулық сақтау ұйы­мының ресми сайтында корона­вирусқа қатысты соңғы ақпаратты жариялап отыратын арнайы бет ашылған болатын. Соңғы жа­рия­лан­ған ақпаратқа сүйенсек, әлемде індет жұқ­тырғандардың саны 80 980 адамға жет­­кен. Оның ең көбі Қытайда тіркелген. Яғ­ни 78 190 адам коронавирус жұқ­тырып, 2 718-і көз жұмған. Ал індет Оң­түс­тік Кореяда 1146 адамға жұғып, 11 адам қайтыс болған. Ита­лия мен Иранда да жағдай мәз емес. Ита­лияда дертке шалдыққан 322 адамның 11-і бақилық болса, Иранда жұқтырғандар саны 95 адамға жетіп, оның 15-і көз жұмған.