Атырау облысының әкімдігі Ауған соғысы ардагерлерінің жесірлеріне қамқорлық көрсетуге кәсіпорындарды тартуды қолға алды. Осыған орай, облыс әкімінің орынбасары Шыңғыс Мұқан мен әлеуетті кәсіпорындар басшылары Ауған соғысы ардагерлерінің жесірлеріне көмек көрсету үшін арнайы меморандумға қол қойды.
Атырау облысының әкімдігі Ауған соғысы ардагерлерінің жесірлеріне қамқорлық көрсетуге кәсіпорындарды тартуды қолға алды. Осыған орай, облыс әкімінің орынбасары Шыңғыс Мұқан мен әлеуетті кәсіпорындар басшылары Ауған соғысы ардагерлерінің жесірлеріне көмек көрсету үшін арнайы меморандумға қол қойды.
– Ауған соғысы ардагерлерінің жесірлеріне, отбасыларына көмек көрсетуге бірқатар кәсіпкерлерге ұсыныс жасаған едік. Сөйтіп, әр мекемеге бір отбасыдан бекіттік. Компаниялар біздің ұсынысымызға қолдау танытты, – деді Шыңғыс Мұқан. – Өңірдегі соғыс ардагерлеріне қамқорлық жүйелі түрде көрсетіліп, осы мақсат үшін жергілікті бюджеттен қомақты қаражат бөлініп келеді. Соның ішінде 500-ден астам Ауған соғысы ардагерлерінің әрбіріне ай сайын көмек ретінде коммуналдық қызметтерге 3158 теңге көлемінде өтемақы төленеді. Облыс әкімі Б.Ізмұхамбетовтің тапсырмасымен қыркүйек айынан бастап, оның мөлшері 10 мың теңгеге өсіріледі. Оған жергілікті бюджеттен қосымша 12,2 млн. теңге қаржы бөлініп отыр.
Бизнестің әлеуметтік жауапкершілігі шеңберінде алты отбасына демеушілік көрсету үшін меморандумға «Нефтестройсервис», «Сенімді құрылыс», «Алем групп Қазақстан», «Enertech», «Тойес», «Рина Сервисес Эс-пи-Эй» ЖШС өкілдері қол қойды. Енді бұл кәсіпорындар өздеріне бекітілген отбасыларға демеушілік жасауды бастамақ.
Бұдан бөлек Ауғанстанда қаза тапқан интернационалист жауынгерлерге арналған ескерткішті Атырау қаласының орталық саябағына орнату көзделіп отыр. Ескерткіштің саяси мағына беретін ерекшеліктері бар. Біріншіден, жоғарғы алаңдағы 10 баспа – 10 жылға созылған (1979-1989ж.ж.) соғысты білдіреді. Екіншіден, ақ арка силуэті, биіктігі 9 метрді құрайтын бітеу жар – Ауғанстандағы шың-шатқалдардың жиегін, Кеңес әскерлері жанын пида еткен елдің мекенжай символын білдіреді. Үшіншіден, қорғаныс шеңберіндегі екі әскердің қола мүсіні – жат елде қалып қойған жігіттердің тағдырын бейнелейді. Төртіншіден, декоративтік жарда хабар-ошарсыз кеткен және қаза тапқандардың аттары көрсетілген қола жазбалар, сонымен қатар, қазақ және орыс тілдеріндегі интернационалист жауынгерлердің аттарына ескерткіш таңба қарастырылған.
Жолдасбек ШӨПЕҒҰЛ,
«Егемен Қазақстан».
Атырау облысы.