Күні кеше Ұлттық баскетбол қауымдастығының (ҰБҚ) өнер көрсетіп жүрген Кевин Дюранттың коронавирус дертіне шалдыққаны белгілі болды. Бұл ойыншыға біз бекер тоқталып отырған жоқпыз. 31 жастағы «Бруклин Нетс» клубының шабуылшысы біраз жылдан бері әлемдегі ең үздік баскетболшылардың санатында. Дюрант – ҰБҚ-ның (2017, 2018) екі дүркін жеңімпазы және төрт рет (2010, 2011, 2012, 2014) сол жарыстың ең нәтижелі ойыншысы атанды. Лондон мен Рио Олимпиадаларында бас жүлдені олжалап, 2010 жылғы әлем чемпионатында топ жарды. 10 мәрте ҰБҚ-ның «Жұлдыздар матчында» өнер көрсету құрметіне бөленіп, екі рет (2012, 2019) ең құнды ойыншы болып танылды. Оның бойы – 206 сантиметр, салмағы – 109 кило.
Кейбір дерек көздеріне сенсек, даңқты Кевин Дюранттан бөлек, «Бруклин Нетстің» тағы үш ойыншысы короновирус дертін жұқтырған көрінеді. Алайда олардың есімдері әлі аталған жоқ.
