Алтыншы турда ресейлік гроссмейстер Ян Непомнящий қытайлық Дин Лижэньді 40 жүрісте жеңсе, Ресейдің тағы бір өкілі Кирилл Алексеенко нидерландық Аниш Гириға есе жіберді. Ал Александр Грищук (Ресей) пен Фабиано Каруана (АҚШ) және Ван Хао (Қытай) мен Максим Вашье-Лаграв (Франция) арасындағы бәсекеде тең есеп тіркелді.
Қазіргі кезде Ян Непомнящий жеке-дара көш бастап тұр. Оның еншісінде 4,5 ұпай бар. Ресей шахматшысынан жарты ұпай кем жиған Максим Вашье-Лаграв екінші орынды иеленуде. Ал Александр Грищук, Фабиано Каруана және Ван Хаода үш ұпайдан иемденді.
Жүлде қоры 500 мың евроны құрайтын айтулы жарыс 3 сәуірге дейін созылады. Осы турнирде жеңімпаз атанған ойыншы Норвегияның өкілі Магнус Карлсенмен әлем чемпионы атағы үшін таласы мүмкіндігіне ие болады.
