Шахмат: Үміткерлер турнирінің жетінші туры артта қалды

Спорт • 26 Наурыз, 2020

Шахмат: Үміткерлер турнирінің жетінші туры артта қалды

21 рет көрсетілді

Бұл күндері шахматтан Ресейдің Екатеринбург қаласында өтіп жатқан Үміткерлер турнирінің жетінші туры аяқталды.

Осыған дейін жеке-дара көш бастап келген 29 жастағы ресейлік гроссмейстер Ян Непомнящий жетінші турда өзінің құрдасы франциялық Максим Вашье-Лагравтан ұтылып қалды. Ал Фабиано Каруана (АҚШ) мен Ван Хао (Қытай), Дин Лижэнь (Қытай) мен Кирилл Алексеенко (Ресей) және Аниш Гири (Нидерланд) мен Александр Грищук (Ресей) арасындағы кездесулерде тең есеп тіркелді. Өте шиеленісті бәсекеде Ян Непомнящийді ұтқаннан кейін Максим Вашье-Лаграв басты қарсыласын қуып жетті. 4,5 ұпайдан олжалаған қос шахматшы бірінші және екінші орындарды өзара бөлісуде. Фабиано Каруана, Аниш Гири, Ван Хао және Александр Грищук 3,5 үпайдан иеленді. Ал көш соңында қалып қойған Дин Лижэнь мен Кирилл Алексеенконың қоржынында 2,5 ұпайдан бар,

Жүлде қоры 500 мың евроны құрайтын айтулы жарыс 3 сәуірге дейін созылады. Осы турнирде топ жарған ойыншы Норвегияның өкілі Магнус Карлсенмен әлем чемпионы атағы үшін шеберлік байқасу мүмкіндігіне ие болады.