Коронавирус індетінің таралу қаупі көп жағдайларда әуе қатынастары және темір жол көлігімен келетін жолаушылар арқылы туындайтыны белгілі болып отыр. Сондықтан да облыста осындай болуы мүмкін келеңсіз жәйттің алдын алу үшін оны барынша реттеудің оң шаралары алынған. Мәселенің бұлайша қойылуына Ақтөбенің тоғыз жолдың торабында орналасқаны да себепші.
Айталық Ақтөбе стансасындағы желілік полиция басқармасының басшысы Сарыбай Сәрсеновтың айтуынша бүгінгі күні Ақтөбе арқылы Алматы мен Нұр-Сұлтан қалаларына дейін қатынайтын пойыздардың жүруі тоқтатылған. Яғни бұған дейін белгіленген темір жол көліктерінің жүру кестесіне өзгерістер енгізіліп, аталған пойыздар Оңтүстік өңірлер бағыты бойынша Шу қаласына дейін барады. Ал еліміздің Солтүстік өңіріне қарай бағыт ұстағандар Бурабай курортына дейін ғана қатынай алады.
Ресейге, Белоруссия мен Украинаға және Орта Азия республикаларына халықаралық мәртебені иеленген жолаушылар пойыздары жүріп тұратын. Қазіргі күні оның бәрі де түгелдей тоқтатылды. Бүгінде Ақтөбеде небәрі 6 жұп пойыз ғана қатынайды. Соған сәйкес вокзал маңындағы барлық есіктер жабылды. Жолаушылар тек бір жерден ғана кіріп шыға алады. Пойыз тоқтағаннан соң вагондағы адамдардың бәрі санитарлық тексерулерден өтеді. Бұл тәртіптің пойыз бастықтары мен жолсеріктерге де қатысы бар.
Бүгінде Ақтөбе халықаралық әуежайында ұшақтардың гүрілдеген дауыстары естіле бермейді. Бұл маңайды да мүлгіген тыныштық басқан. Ақтөбе күніне бір рет Ақтау-Ақтөбе-Ақтау рейсі ғана қатынайды. Бұған Түркиядан келетін жүк ұшағын қосуға болады. Бұл кезде екі мемлекеттегі әуежай желісінің қызметкерлері барлық төтенше жағдайлар талаптарын сақтауы қатаң бақылауға алынған.
АҚТӨБЕ
