Елімізде Бірыңғай астық холдингі құрылды. Жаңа құрылымның диқандар үшін пайдасы қандай? Холдингтің басты мақсаты не? Бұрын диқандар «Азық-түлік корпорациясы» АҚ астықты өткізіп, қабылданған баға бойынша есеп айырысатын. Астықтан түсетін пайда корпорацияның қалтасына кетіп отырды. Енді, холдинг өнімді сатқаннан кейін табысты шаруалармен бөлісетін болады. Холдинг құрамына кіру үшін шаруашылықтардан ешбір қаржылық немесе мүліктік жарна талап етілмейді. Көктемгі егіс науқанына қаржылай көмек алу кезінде қолдау көрсетіледі. Осындай жаңалықтарды облыс диқандары қалай қабылдады, жалпы, алдағы астық жинау науқанына дайындық барысы қалай жүргізілуде? Бүгінде өңірде астық қабылдайтын орын жетіспейді. Диқандар күзде астық сақтайтын жер болмай қала ма деп отыр.
Елімізде Бірыңғай астық холдингі құрылды. Жаңа құрылымның диқандар үшін пайдасы қандай? Холдингтің басты мақсаты не? Бұрын диқандар «Азық-түлік корпорациясы» АҚ астықты өткізіп, қабылданған баға бойынша есеп айырысатын. Астықтан түсетін пайда корпорацияның қалтасына кетіп отырды. Енді, холдинг өнімді сатқаннан кейін табысты шаруалармен бөлісетін болады. Холдинг құрамына кіру үшін шаруашылықтардан ешбір қаржылық немесе мүліктік жарна талап етілмейді. Көктемгі егіс науқанына қаржылай көмек алу кезінде қолдау көрсетіледі. Осындай жаңалықтарды облыс диқандары қалай қабылдады, жалпы, алдағы астық жинау науқанына дайындық барысы қалай жүргізілуде? Бүгінде өңірде астық қабылдайтын орын жетіспейді. Диқандар күзде астық сақтайтын жер болмай қала ма деп отыр.
«Егемен Қазақстанның» облыстағы тілшісі Фарида Бықай облыстық ауыл шаруашылығы басқармасының бастығы Жанат Шұғаевқа:
– Сіз бұған не дейсіз?
– Холдингтің құрылуы диқандардың жаз бойы маңдай терін төгіп еңбектенген еңбегінің ақталуына үлкен көмек деп ойлаймын. Ал биыл облыстағы жиналатын астықты алқап көлемі 854 мың гектарды құрап отыр. Жаз жауын-шашынды болды. Егіннің пісіп-жетілуіне, әрине, ауа райының қолайсыздығы әсер етеді. Биылғы жазда Ертіс өзенінің суы молынан жайылды. Қазір шаруалар қысқы жем-шөпті дайындауда. Жалпы, 1582 мың гектар алқаптан шөп жиналады. Соның ішінде 232 мың гектарды жайылма алқабы құрайды. Орта есеппен гектарына 6,8 центнер шөп жиналуда. Мәселен, Лебяжі ауданы 500 гектар жайылманы орып, 800 тонна шөп жинаған. Жоспар бойынша биыл шаруалар 1 миллион 215 мың тонна шөп жинап, 2 жылдық азық қорын әзірлеуі тиіс. Арзандатылған 4 мың тонна жанар-жағармай шаруаларға таратылды. Дизель отыны нарықтағы бағадан 21 пайызға арзан. Астықты жинау науқаны диқандарға оңай емес. Ылғалдың көптігінен егінді кептіру қажет. Ол үшін қосымша жанар-жағармай жеткілікті бөлу жөнінде ұсыныс та жасалды. Жанар-жағармай демекші, астық жинау науқанына өңірімізге бөлінген арзан бағалы дизельді отын ауыл-ауылға дер кезінде жеткізілуде. Облыста 101 көкөніс сақтайтын қойма жаңа өнімді қабылдауға әзір. Олардың 67 пайызы заманауи технологиялармен жабдықталған. Жиын-терін жұмыстарына шығатын техникалар дайын. Еліміздегі қаржы институттары арқылы лизингке техника сатып алу тетіктері де жан-жақты түсіндірілуде.
Жергілікті элеваторлар және Қалқаман кентінде орналасқан элеватор өңір шаруаларының астықтарын қабылдауға әзірлік жұмыстарын жүргізуде. Облыста 10 элеватор мен сыйымдығы 450,3 мың тонна болатын астық қамбасы бар. Сонымен бірге, ауылшаруашылық тауарларын өндірушілердің астықтарын сақтауға арналған сыйымдылығы 692,2 мың тонна болатын 469 қойма бар. Алдын ала жасалған болжамдар бойынша, орташа есеппен облыс диқандары бір гектардан 10-12 центнерден дәнді дақыл алмақшы.
Павлодар облысы.