Кеше сағат 07:10-да Қарағанды қалалық ауруханасында ауыр халде түскен 62 жастағы ер адам қайтыс болды. Бұл елімізде індеттен қайтыс болған үшінші адам. Дәурен Абаев ең алдымен коронавирустан қайтыс болған марқұмның отбасы мен жақындарына көңіл айтты.
Мемлекет басшысы Қ.Тоқаев халыққа Мәлімдеме жолдап, дағдарысқа қарсы шаралардың екінші пакетімен таныстырғаны белгілі. Үкімет Президент тапсырмаларын жүзеге асырудың іс-шаралар жоспарын дайындап жатқанын жеткізген Ақпарат және қоғамдық даму министрі онда мемлекеттің көмегін қалай, қай жерден және қандай тәртіппен алу керек екені нақты түсіндірілетінін атап өтті. «Тағы да қайталап айтамыз – көмекке мұқтаж барлық адамға жәрдем беріледі. Мемлекет ешкімді қамқорлықсыз қалдырмайды. Президенттің кешегі Мәлімдемесі – «Халық үніне құлақ асатын мемлекет» тұжырымдамасының табысты іске асып жатқанына және оның өміршең екеніне айқын дәлел. Себебі өздеріңіз білетіндей, Мәлімдемеде айтылған шаралар қазіргі уақытта қиындыққа кезіккен азаматтардың, кәсіпкерлердің, ауыл шаруашылығы өкілдерінің өтініш-тілектерін ескереді. Қазір біз аса күрделі уақытта тұрмыз. Сондықтан, Мемлекет басшысының Мәлімдемесі тек қана экономикалық емес, ең алдымен, идеологиялық астары бар дүние. Осындай уақытта біз көзқарасымыздың, идеямыздың, ұлтымыз бен дініміздің әртүрлі екеніне қарамастан біртұтас екенімізді түсінуіміз керек. «Біз біргеміз!» деген бос ұран емес. Ол халқымызды талай қиындықтан аман алып шыққан өмірлік ұстанымымыз», деді министр.
Бүгінде Қостанай облысынан өзге еліміздің барлық өңірінде коронавируспен ауырғандар тіркелді. Көп аймақта карантин шаралары күшейтілді. Мұндайда үйден шықпау керегін тағы да ескерткен Д.Абаев ережені дұрыс ұстанғанда ғана карантиннен тез шығуға болатынын атап өтті. «Қазір карантинді ұзарту туралы айтуға ерте. Ешкім екі апта бұрын эпидемиологиялық жағдайдың қалай болатынын нақты айта алмайды. Бірақ біз барлығына дайын болуымыз керек. Сондықтан кеше айтылған барлық шаралар – жағдай күрделеніп кетсе де тыныштық пен тұрақтылықты сақтау кепілі. Ол үшін бізде қажетті шарттардың барлығы жасалған. Мемлекет басшысының тапсырмасы, нақты жұмыс жоспары және Ұлттық қорда жиналған қаражат бар», дейді ол.
Қиын кезеңде аса маңызды жұмыс атқарып жатқан волонтерлер қызметіне ерекше тоқталған министр: «Тек Нұр-Сұлтан мен Алматы қалаларының өзінде олар мыңға жуық көмек акциясын өткізіп, 30 мың адамға жәрдем берді. 8 мыңдай отбасына азық-түлік апарды. Осы екі қаланың өзінде волонтерлер мұқтаж адамдарға 200 мыңға жуық маска таратты. Еліміздің барлық өңірінде волонтерлер дәл осылай мұқтаж адамдарға азық-түлік, дәрі, бірінші кезекте қажет заттарын апарып беруде», деді.
Сондай-ақ Президенттің дағдарысқа қарсы жоспарының орындалуы туралы есеп берген Д.Абаев қазіргі уақытта «Даму» кәсіпкерлікті дамыту қоры жобаны қайта құрылымдау туралы өтініштерді қарастырудың жеңілдетілген форматына ауысқанын жеткізді. «30 сәуірге дейін жалпы сомасы 3,5 млрд теңгеге 71 жоба қолдауға ие болады. Сыйақы мөлшерлемесінің бір бөлігін субсидиялауға өтінімдерді қарау уақыты 5 жұмыс күнінен 1 жұмыс күніне дейін қысқарды. Қазіргі уақытта 58 млрд теңгенің 250-ге жуық жобасы мақұлданды. Кепілдік құралын өзгерту туралы өтініштерді қарау тек 6 жұмыс күнін құрайды. Бұл бағытта қор 37 жобаны мақұлдады», деді ол.
Қаржы нарығын реттеу және дамыту жөніндегі агенттіктің қаулысы күшіне еніп, жеке тұлғалар үшін банк және микрокредит төлемдерінің мерзімі үш айға шегерілді. Айыппұл мен өсім болмайды. Осыны айтқан Дәурен Әскербекұлы бұл шегеру халықтың әлеуметтік осал топтарына, әлеуметтік көмек алушыларға, ресми тіркелген жұмыссыздарға берілетінін хабарлады. Оған ешқандай тексеру жүргізіп, дәлелдеудің немесе өтініш берудің керегі жоқ. Сонымен қатар осындай көмек төтенше жағдай салдарынан табысынан айырылған кәсіпкерлерге де көрсетіледі.
Бүгінде «Біргеміз» қорына 13 млрд теңге түсті. Министрдің айтуынша, қаржы ашықтығын қамтамасыз ету үшін барлық өңірде қордың өкілдіктері ашылып, сайты да іске қосылды. Ол жерде келіп түскен қаражат пен шығындар жарияланады. Тіпті чектерге дейін көрсетіледі. Қазір әр өңірде көмекке мұқтаж адамдардың тізімі жасалуда. Олар жақын уақытта қордан көмек алады.
Мемлекеттік резервтен коронавирусқа қарсы күреске үш рет, яғни 29 қаңтарда 1 млрд 609 млн теңге, 21 ақпанда 428 млн 227 мың теңге, 25 наурызда 21 млрд 430 млн 635 мың теңге бөлінді. Дәурен Абаев бұл қаражат дәрі-дәрмектер, медициналық мақсаттағы бұйымдар мен зертханалық құрал-жабдықтар, маскалар мен қолғаптар, сондай-ақ қорғаныш костюмдері мен сынақ жүйелерін сатып алуға жұмсалғанын жеткізді. Азаматтарға шұғыл медициналық көмек көрсету ұлттық орталығы арқылы эвакуациялау, қызметкерлерді жарақтандыру мен дезинфекциялық құралдарды сатып алу, т.б. шығындарға да осы қаражат пайдаланылған.
Айта кетейік, кеше кешкі ақпаратқа сүйенсек елімізде, коронавирус жұқтырғандар саны 372-ге жетті. Атап айтқанда, Нұр-Сұлтан қаласында – 184, Алматы қаласында 84 науқас анықталса, Ақмола, Атырау облыстарында 16 адамнан тіркелді. Қарағанды облысында – 14, Қызылорда облысында – 25, Алматы облысында – 9, Түркістан облысында 5 адам вирус жұқтырса, Шымкент қаласы, Жамбыл және Солтүстік Қазақстан облыстарында 3 жағдайдан тіркелді. Ал Ақтөбе облысында – 4, Шығыс Қазақстан мен Батыс Қазақстан облысында 2 науқастан анықталса, Маңғыстау, Павлодар облыстарында 1 науқастан тіркеліп отыр.
