Мемлекет басшысы айтқан «Біз біргеміз!» сөзінің астарындағы атан түйеге жүк боларлық мол мағына жалпақ жұрттың бойындағы сенімді нығайта түсуде. Бекем бірлікке не жетсін, шіркін! Облыс орталығындағы «Новопэк» компаниясының дәл осы шақта шаруасын ыңғайлап, өз жұмысшыларымен қоса жұмыссыз қалғандарға да қайырымы тиіп жатуы жылы сөзге әбден лайықты іс. Кәсіпорын өндіріс көлемін кеңейту арқылы тағы да 100 адамды жұмысқа алмақшы.
–Өз жұмысшыларымыздың ішінде баспанасыз жүргендерді жаңа жатақханамызға орналастырмақшымыз. Кәсіпорынның 500 жұмысшысына сәл де болса демеу боларлық азық-түлік корзинасы табыс етілді. Алдағы уақытта жалақыны да тәп-тәуір көбейтпекшіміз,–дейді компанияның бас директоры Рүстем Усманов.
Жаңа жұмысқа орналасқан тігін цехының операторы алдымен тәжірибеден өткізіледі. Бірінші айда оған 60 мың теңге жалақы төленеді. Екінші айда істеген жұмысына еңбекақыға қосымша 30 мың теңге төлеу қарастырған. Үшінші айда өз табысына 15 мың теңге үстемеленеді. Одан әрі атқарған жұмысына сәйкес жалақы алады. Жалақы мөлшері 80 мың теңгеден кем емес. Міне, осылайша әрбір мамандық бойынша өз тапқан табысының үстіне үстемеақы төлеу көзделіп отыр. Мәселен, тігіншілер алғашқы айдағы үйрену кезінде 60 мың теңге еңбекақы алады. Екінші айдан бастап атқарған жұмысына сәйкес жалақы төленеді. Бұл жерге тіпті мамандығы жоқ адамдар да жұмысқа орналаса алады. Олар қосалқы жұмысшы ретінде. Еңбекақылары да тәп-тәуір. 90 мың теңге шамасында. Кәсіпорын аумағында қауіпсіздік шаралары мұқият қолға алынған.
Көкшетау қаласы
