Жаздың соңғы күндері шығыс жұрты үшін ауқымды шараларға толы болды. Ата Заң да әспеттелді. Халықаралық бал фестивалі де өтті. Сондай-ақ, Шыңғыстайдан шығып, шырайлы да шұрайлы туған өлкесін ғұмыр бойы жырлаған, оқырманының бәрін асқақ Алтайға іңкәр еткен Оралхан Бөкейдің 70 жылдық мерейтойы да басталып кетті. Кербұғыдай қасқайып, тауқұдірет талантымен тамсандырған тұлға Өскеменнің төрінде тұғырға қонды.
Жаздың соңғы күндері шығыс жұрты үшін ауқымды шараларға толы болды. Ата Заң да әспеттелді. Халықаралық бал фестивалі де өтті. Сондай-ақ, Шыңғыстайдан шығып, шырайлы да шұрайлы туған өлкесін ғұмыр бойы жырлаған, оқырманының бәрін асқақ Алтайға іңкәр еткен Оралхан Бөкейдің 70 жылдық мерейтойы да басталып кетті. Кербұғыдай қасқайып, тауқұдірет талантымен тамсандырған тұлға Өскеменнің төрінде тұғырға қонды.
Облыс орталығының Жібек маталар комбинаты аталатын шағынаудан соңғы жылдары жедел дамып келеді. Орағаңның қалам ұстаған ойлы сәті бейнеленген ескерткіші жаңадан өсіп-өркендеп келе жатқан осы ауданда ашылды. Онда қаламгер атындағы №44 орта мектеп те бар. Яғни, ескерткіштің орын тепкен алаңқайы алдағы уақытта қала тұрғындары мен жастары, меймандары үшін сейілдейтін көрнекі орындардың біріне айналады. Ескерткіш аумағы көгалдандырылып, жарықтандырылған. Табанына тас төселіп, орындықтар қойылған.
Оралхан Бөкей ескерткішінің ашылу салтанатына еліміздің түкпір-түкпірінен келген қаламгерлер қауымы қатысты. Олардың қатарында Қабдеш Жұмаділов, Кәдірбек Сегізбай, Исраил Сапарбай, Несіпбек Айтұлы, Темірхан Медетбек, Жұмабай Шаштайұлы, Тыныштықбек Әбдікәкімов, Ұлықбек Есдәулет және тағы басқа елімізге белгілі ақын-жазушылар бар.
Салтанатты шараның басында көркемсөз сайысының жеңімпаздары Маржан Мүслімбекова мен Қаракөз Әбенова Алтай жыршысының шығармаларынан нәшіне келтіріп үзінділер оқыды.
Ескерткіштің ашылуымен құттықтаған өңір басшысы Бердібек Сапарбаев әдебиет аспанында жарық жұлдыздай жарқырап өткен Оралхан Бөкейдің орны бөлек екенін, Қазақ елін әлемге танытатын, мерейін үстем ететін санаулы дүниенің бірі әдебиет екенін атап өтті. Облыс басшысының айтуынша, жазушының мерейтойында оған арналған екі ескерткіш орнатылады. Оның бірі – Өскеменде ашылған мына монумент болса, екіншісі сөз зергерінің туған өлкесі Катонқарағайда бой көтереді.
Алматыда Оралхан Бөкеймен көрші тұрған жазушы Қабдеш Жұмаділов інісі туралы ақтарыла естелік айтты.
– Ақын-жазушыларды әспеттеп, құрмет көрсеткен елдің ғұмыры да баянды болады. Өскеменде Ленин ескерткішінің орнына Абайдың тұлғасын қойғанда ерекше қуанғанбыз. Ақынның аруағы риза болған шығар, мұндағы іс ілгері басты. Алтай жыршысы атанған Оралханмен 15 жыл көрші тұрдық. Әдебиеттегі сыйлас, пікірлес жандардың бірі еді. Мерейтой қарсаңында ашылған ескерткішін көріп, қуанып тұрмын. Қаламгерге көрсетілген құрмет – ұлтқа көрсетілген құрмет. Ескерткіш қойылған көше – Өскеменге кірер, Оралханның туған жеріне барар жол бойында екен. «Комсомолдар» аталатын осы көшенің атауын бүгін ашылған ескерткіш иесінің есімімен атаса, нұр үстіне нұр болар еді, – деді жазушы.
Орағаңның қаламгер достарының бірі Кәдірбек Сегізбайұлы да естеліктерімен бөлісті. Ақын Аслан Ғафуров арнау өлеңін оқыды. Мүсіншілер Евгений Непиянов пен Владимир Самойлов қашаған ескерткішке қаламгерлер гүл шоқтарын қойды.
Думан АНАШ,
журналист.
ӨСКЕМЕН.
