Баяндама барысында Бас санитар карантиндік шараларды сақтаудың маңызына тоқталып, індет жағдайы әлемде әлі де тұрақсыз болып отырғанын алға тартты.
«Қазақстанда коронавирустық инфекцияны жұқтырудың 604 жағдайы тіркелген. Оның ішінде республикалық маңызы бар қалаларда: Нұр-Сұлтан – 219, Алматы қаласында – 116, Шымкент қаласында – 14 жағдай. Өңірлерде: Қарағанды облысы – 48, Қызылорда облысы – 37, Атырау облысы – 29, Түркістан облысы – 28, Жамбыл облысы – 29, Солтүстік Қазақстан облысы – 25, Ақмола облысы – 23, Ақтөбе облысы – 11, Алматы облысы – 10, Шығыс Қазақстан облысы – 6, Маңғыстау облысы – 5, Батыс Қазақстан облысы – 2, Павлодар облысы – 1, Қостанай облысы – 1. Солардың ішінде 122 науқас сырттан келген, 351-ден астам жұқтыру жағдайы адамдармен қарым-қатынас кезінде орын алған. Бүгінде 45 науқас шығарылды. Олардың 24-і Нұр-Сұлтан қаласынан, 21-і Алматы қаласынан. Қазіргі уақытта коронавирустан 6 адам қайтыс болды. Ақмола облысында 2 адам, Нұр-Сұлтан, Шымкент қалаларында, Қарағанды және Түркістан облыстарында 1 жағдайдан тіркелді. Жалпы алғанда барлығы 17 мыңнан астам бір-бірімен байланыста болған тұлғалар тіркелген, 10 мыңнан астам азамат үй карантинінде. Бүгінгі таңда жұқтырудың 85%-ы жеңіл және симптомсыз ағымға ие, 11,5%-ы «ауырлығы орташа» деп бағаланды, 16 пациенттің жағдайы «ауыр» деп бағаланды», деді ол.
Бас санитарлық дәрігер енгізілген бақылау-шектеу шаралары инфекцияның таралу қарқынын төмендететінін ерекше атап өтті.
«Бүгінгі таңда енгізілген шектеу шаралары инфекцияның таралуын азайтты. 27 наурыздан бастап Нұр-Сұлтан қаласындағы індетті жұқтырудың дерегі 5 сәуірде 60 жағдайдан 0 жағдайға дейін, Алматыда күн сайынғы өсім 15-тен 6 жағдайға дейін төмендеді», деді бас санитар.
Сонымен қатар Айжан Есмағамбетова Қызылорда, Қарағанды, Түркістан, Атырау облыстарында сырқаттанудың жоғары өсімі тіркелгендіктен, аталған өңірлерде қосымша шектеу шараларын енгізу қажеттігін атап өтті.
