Адамның ақыл-парасаты, алдағыны көріп, алысты болжайтын алғыр ойлы кемеңгерлігі сын сағаттарда сыналады. Туысы бөлек бекзат тұлғалар оқыс оқиға, қиын жағдайларда асып-саспай, асқан ақылдылықпен шұғыл әрі дұрыс шешім қабылдап, жедел әрекет жасайды. Айтып келмеген алапат апат – коронавирус әлемдік пандемиясы тым тез тарап, дүние жүзін әбігерге салып, алпауыт державалардың басшылары да абыржып қалған қысылтаяңда Қазақстан Президенті Қасым-Жомарт Кемелұлы Тоқаев өзінің тумысы бөлек бекзат тұлғалығын танытып, біраз мемлекеттерден бұрын жедел әрі өте дұрыс шешім қабылдап, елімізде төтенше жағдай жариялады. Бұл аса қауіпті дерттің алдын алуға, оның кең тарамауына сенімді тосқауыл болары анық.
Өзім тұрып жатқан Алматының кіреберісіне 27 блок-бекеттің қойылуы, азық-түлік өнімдері мен дәрілік заттарды сататын орындардан басқа ірі сауда, ойын-сауық орталықтары мен сауда үйлері жұмысының тоқтатылуы, тағы басқа да шаралар халықты аса қатерлі, өте жұқпалы дерттен сақтау үшін қабылданған бірден-бір дұрыс шешім.
Жаратқан иемнің мейірімі түсіп ерекше жаратылған ақыл-парасат иелері небір қиын кезде де қиындықтан қиюын тауып, қатты шиеленген түйіндерді де тарқата алады. Соның мықты бір мысалы Қазақстан Президентінің біраз мемлекеттерден бұрын қимылдап, ертерек елімізде төтенше жағдай жариялап, оқиғаның алдын алып, уақыттан озғандығынан көрініс тапты.
Қасым-Жомарт Кемелұлы айтқандай: «Ең бастысы шыдамдылық, төзімділік танытайық».
Соломон айтқандай: «Бұл да өтеді».
Аман болайық.
Сәбит ДОСАНОВ,
Мемлекеттік сыйлықтың лауреаты
