Тегін такси болу да – оңай шаруа емес. Біріншіден – астыңдағы көлігіңді «жұмысқа саласың». Көлік сумен жүрмейді, бензин құю керек. Ол – екі. Тегін дегенді пайдаланып қалғысы келіп, бей-берекет хабарласа беретін, разы болудың орнына бұлданатын, құрмет қылудың орнына міндет қылатын адамдар тағы бар. Оларға сабыр ету керек. Ол – үш. 9 сағатқа жуық уақытың кетеді. Оны төрт деп қойыңыз.
Рамазан да, Мейрамбек те байлығын қайда қоярын білмегесін, тегін қызмет жасап жүрген жоқ. Ниеттері – елдің батасын алу, қасиетті айға құрмет, сол арқылы Алланың разылығына бөлену. Әйтпесе біреуі – қарапайым мұғалім, бірі – аудандағы театрдың әртісі.
– Сауапты істеріңізді жазайық! – дегенімізде екеуі де ат-тондарын ала қашты. Бірақ ел жастардың жақсылығын білсін, үлгі алсын деген оймен жариялап, жаздық. Аттарын атамауға да болар еді, бірақ Мейрамбек пен Рамазанның Оразадағы жақсылығын жарты Жымпиты біледі екен.
Егер жігіттерге разы болып, істеріне жәрдем берем десеңіздер, күндік жанармайларын құйып беруге болады. Себебі, олар оразаның аяғына дейін қызмет қылмақ.
Бауыржан ШИРМЕДИНҰЛЫ
Батыс Қазақстан облысы,
Сырым ауданы