Сол себепті ЮНЕСКО Дүниежүзілік білім коалициясын ұйымдастырмақ, бұл қашықтан оқытудың озық тәжірибелерін кеңейтуге және келешек ұрпақтың сапалы білім алуына барлық қолжетімділікті қамтамасыз етеді.
«Еліміз қашықтан оқытуға дайын ба?» деген сияқты сауалдар көпшілік ата-аналардың көкейінде жүрген мәселе. Біріншіден, елорданың өзінде атын атап, түсін түстемесек те бірсыпыра мектеп үш ауысымды жүйеде оқиды. Ал басқа аймақтардағы мектептердің әлеуеті одан да мүшкіл. Екіншіден, елімізде 180 мыңнан астам оқушыны қашықтан оқытуға қауқарымыз жете ме?! Үшіншіден, педагог және IT мамандарының тапшылығы. Мысалы, бір пән мұғалімі бір сыныптың 25-30 баласын қамтуы тиіс. Енді, есептеп көріңіз, бір сыныптан 25 баланы он сыныпқа көбейтсек, бір тәулікте мұғалім 250 балаға онлайн режімінде сабақ оқытуда. Ал ғаламтор желісі айтарлықтай мәз емес.
Нұр-Сұлтан қаласындағы №61 орта мектебінде лаборант қызметін атқарушы Әйгерім Бейсенбайқызы: «Жұмыла көтерген, жүк жеңіл» дегендей ұжым болып барынша бұл жүйеге дайындық жұмыстарын жүргізудеміз. Бұл тұста мектеп басшылығы аз қамтылған және көп балалы отбасыларына компьютерлер мен планшеттер (олардың наушниктерімен бірге) таратуда. Оның басы-қасында өзім де жүрмін», дейді.
Қалай айтсақ та, ата-аналар бұл жүйеге моральдық тұрғыдан болса да дайын болуы керек. Себебі оқушының бәрі қазір ата-анасының жанында.
Елордадағы мектептің жартысынан астамы Zoom платформасына көшсе, ал Алматы қаласындағы бірталай мектеп Daryn.online, Classroom жүйесін қолдануда. Кей мектептер «Балапан» телеарнасында өтетін сабақтардың кестесін алып та үлгерген. Бір мектептер «Еларна» телеарнасымен тікелей байланысқа шықпақ. Шынында бұл іс мұғалім мен ата-ана бірлесіп жұмыс істегенде ғана толық жүзеге асады. Екі жаққа да жүктелер жауапкершілік зор. Ендеше алдағы күнді жақсы үмітпен, жайдары жарқын жүзбен қарсы алайық!.
Айым Болатқызы