Аймақтар • 08 Мамыр, 2020

Алматыдан Түркістанға көмек жүгін артқан көліктер жолға шықты

220 рет
көрсетілді
1 мин
оқу үшін

Оңтүстік тұрғындарының басына айдың аман, күннің жылы кезінде түскен тауқымет халықты қатты алаңдатып қана қоймай, еліміздің әр түкпірінен көмек пен қолдау көрсетіліп жатыр. Мұндай кезде алматылықтар да қол қусырып отырмастан, бүгін Түркістан облысы Мақтарал ауданына 70 мың тоннадан астам гуманитарлық жүк артқан көліктерін аттандырды.

Алматыдан Түркістанға көмек жүгін артқан көліктер жолға шықты

Түркістан облысы Мақтарал ауданында төтенше жағдайдың жариялануына байланысты ҚР Президенті Қ.К.Тоқаевтың бұйрығымен су тасқынынан зардап шеккендерге жан-жақты көмек көрсетуде бірқатар шаралар қабылданып жатқаны белгілі.

Алматы қаласының әкімі, «Nur Otan» партиясының қалалық филиалының төрағасы Бақытжан Сағынтаевтың бұйрығымен соңғы күндері біраз гуманитарлық көмек жиналды. Бұл  бастамаға партияның депутаттық фракция мүшелері – депутаттар, қатардағы партия мүшелері мен барлық көмектескісі келетін азаматтар да үн қатты.

Бүгін БАҚ өкілдерінің қатысуымен «BizBirgemiz» акциясының аясында Алматы қаласының әкімдігі және «Nur Otan» партиясының қалалық филиалы гуманитарлық көмекті оңтүстікке қарай шығарып салды.