Руханият • 20 Мамыр, 2020

Ескерусіз жүрген таптырмас мамандандық

620 рет
көрсетілді
4 мин
оқу үшін

Бүгінде мұрап дегеніңіз елеу­сіздеу кәсіп көрін­ген­мен, егін шаруашылығы са­ласында таптырмас ма­манға айналып тұр. Өйт­ке­ні егістіктен мол өнім алу – сол мұрап тарапынан таны­тылар ерекше бап пен күтім арқылы ғана мүмкін болмақ.

Ескерусіз жүрген таптырмас мамандандық

Кезінде картоп өсіру бойынша толағай табысқа қол жеткізген мұраптар Мүсірепбек Бектаев пен Антонина Манченко Социалистік Еңбек Ері атанды. Міне, бүгінде солардың ізін басып, тәлімін алған Үсіпбек Бегалиевтың осы салада болып жұмыс істеп келе жатқанына 40 жыл болыпты.

Жуырда Жуалыға жолым түсіп, «Зылиха» шаруа қожа­лы­ғы­ның егіс алқабына бардым.

– Мен 1956 жылы Түктібай ауы­лында дүниеге келдім. Осын­дағы М.Әуезов атындағы орта мек­тепті бітіре салып, ең­бек­ке ара­ластым, – деп бастады әңгі­ме­сін байырғы су мұрабы.

– Еңбек жолыңызды кім болып бастадыңыз? – дедім сөзін бөліп.

– Сушы болдым. Сен біле­сің бе, менің кімдерден тәлім алғанымды? – деді сұқ саусағын безеп. – Еңбек Ері Мүсірепбек Бектаев, атақты сушылар Әбзел­бек Татеков, Иван Шмиттер мені еңбекке баулыды! Әсіресе Мүсірепбек атаның қамқорлығы ерекше еді. Көп нәрсе үйретті. Содан бері сушымын. Шынымды айтсам, егістікті бір күн суармасам, ауырып қаламын. Кей жылдары осыны қояйын, басқа жұмысқа ауысайын дедім. Бірақ егін суару жұмысына қалай қайта шығып кеткенімді өзім де сезбей қаламын.

«Бурный» кеңшарында еңбек жолын бастаған Үсіпбек шар­уа­шылық тарағанға дейін қы­зыл­ша, жүгері, картоп суару ісімен айналысқан екен. Ең­бек­те­гі жетістіктері жетерлік. Өзі звено жетекшісі болған тоқ­са­­ныншы жылдарда алдыңғы тол­қын ағаларының ерлігін бір емес, бірнеше рет қайталапты. Кар­топтың әр гектарынан 300-350, кей алқаптардан 400 центнерге дейін өнім жинаған кездері болыпты. Бірақ бұл еңбегі сол тұс­тағы басшылық тарапынан еленбей, ескерусіз қалып қой­ған. Кеңшар тарап кеткен соң інілері Керімқұл мен Нұржігіт бас­таған іске қолдау көрсетіп, картоп шаруашылығын дамытуға бір кісідей атсалысыпты. Сол 2000 жылдан бері қарай осында тапжылмай мұрап болып жұмыс істейді. Жаңа техноло­гия енгізіліп, картоп сұрпы жаңа­лан­ған тұста өнімділік 400-450 центнерге дейін артыпты. Қазір де ол суар­ған алқаптар гектарына 300 центнерге дейін өнім беруде.

– Аллаға шүкір, жағдайымыз жақсы. Қос інім үнемі қарайласып тұрады. Жалпы осы ісіме көңілім то­лады. Егістікті суарып, мол өнім жинап, бауырларымның тір­­лігінің алға басқаны, олар бас­қар­ған шаруашылықтың ауданда іргелі қожалыққа айналғаны мен үшін бақыт. Осы күніме, еткен еңбегіме тәубе, шүкіршілік етемін, – дейді Үсіпбек аға.

Бүгінде Үсіпбек Бегалиев жұбайы Нұрила екеуі үш ұл, бір қыз тәрбиелеп өсіріп, оларды өмір көшіне қосып, он алты немере сүйіп отыр. Мұраптың үлкен ұлы өзімен бірге егін суарумен айна­лысып жүр. Енді ол өзі бүге-шүгесіне дейін жетік білетін, еңбек ерлерінен үйренген кәсібін ұлы­на үйретуде.

Ағаның әңгімесінен еңбек адамының өз ісіне деген сүйіс­пен­шілігін аңғарып, ша­быт­­танып қайттым. Оның еңбе­гі шынында ұстаздары жеткен биікпен тең. Тек бүгінгі уақытта қатардағы қа­ра­пайым еңбеккердің ылғи да еске­русіз қалып қоя беретіні бол­маса...

 

Марат ҚҰЛИБАЕВ

 

Жамбыл облысы,

Жуалы ауданы