Сақтықта қорлық жоқ

 

Тестілеу қуаты – тәулігіне 28 мың

Денсаулық сақтау министрі­нің міндетін атқарушы Ләззат Ақтаева коронавирус ин­фек­циясын қоспағанда, инфек­циялық аурулар бойынша эпиде­миялық жағдай жалпы Қазақстан Республикасы бо­йынша тұрақты екенін атап өтті. 64 инфекциялық ауру бойынша мониторинг жүргізілуде, 5 айдың қорытындысы бо­йынша 49 инфекция бойынша сырқаттанушылық төмен­деген. Биыл адамдардың оба, тырысқақ, іш сүзегі, құтыру,  дифтерия, сіреспе, қызамық және басқа да жұқпалы аурулармен сырқаттануы тіркелген жоқ. Өткен жылдың осы кезеңімен салыстырғанда сальмонеллез, қызылша, іріңді менингит, туберкулезбен сырқаттану төмендегені байқалды. А жіті вирустық гепатит (1,8 есе), ботулизм (3 есе), скарлатина 4,3 есе өсті.

Оба және басқа да табиғи-ошақтық инфекциялардың алдын алу мақсатында профилак­тикалық іс-шаралар жүргізіледі. Осы жылдың 5 айында обаға қарсы күрес ұйымдары зертха­на­лық зерттей отырып 223,1 мың шаршы шақырымды және 4 млн эктопаразиттер мен ке­мір­гіштерді тексерді, обаның 14 қоздырғышы бөлінді, бұл қоздырғыштың циркуляциясын көрсетеді. 2020 жылдың 5 айында 1 411 647 адам егілді, бұл егуге жататындар санының 92%-ын құрады. 2020 жылдың І тоқсанында республикада профилактикалық егуден 1 423 бас тарту есепке алынды, 2019 жылдың осындай кезеңімен салыстырғанда 13%-ға өскені байқалды. Бұл ретте бас тартқан адамдар арасында егілгендер саны 725-тен 309-ға дейін, 2 есе төмендеді. Бас тарту себептері бойынша ең үлкен үлес жеке сенім бойынша бас тартуға келеді және бұл жалпы бас тарту санының 52,9%-ын құрайды, діни пайымдаулар бойынша – 29%, вакцинаға сенімсіздік – 11,2%, БАҚ-тағы теріс ақпарат бойынша – 6,4%. Бас тартқандар арасында 309 адам егілді.

2020 жылдың 5 айында 2019 жылдың осындай кезеңімен салыстырғанда қызылшамен сырқаттанудың 2,8 есе төмен­деуіне қол жеткізілді. «Қызыл­шаны төмендету мақсатында 9-10 айлық балаларға қосымша вакцинация жүргізілді. 260 мыңнан астам бала егілді. Бұл осы жас тобындағы сырқаттануды 2,5 есе төмендетуге мүмкіндік берді. Бұдан басқа ауырған ересектер арасында 55%-дан астамы 20-29 жас аралығындағы топ екенін ескере отырып, осы жас тобына қызылшаға қарсы қосымша вакцинация жүргізілді, 1 759 459 адам егілді», деді Л.Ақтаева.

COVID-19-ға ПТР-тестілеу үшін 56 зертхана жұмыс істейді, тестілеу қуаты тәулігіне 28 мыңға дейін жеткізілді. Енді мұны бюджет есебінен 30 мың тестке дейін, ал мемлекеттік және жеке сектор зертханалар есебінен 35 мыңға дейін арттыру жоспарлануда. Соңғы аптада (8-14 маусым аралығында) республикада 5 485 жағдай тіркелді.  Өткен аптамен (1-7 маусым аралығында) салыстырғанда сырқаттанушылық 1,9 есе өскен (2908-ден 5485-ке дейін).

Денсаулық сақтау министр­лігінің деректері бойынша 6 айға маскаға деген қажеттілік 111,2 млн дананы құрайды.

«Бүгінгі таңда 9 отандық кәсіпорынның қуаты тәулігіне 490 мың дана медициналық мас­ка шығаруға мүмкіндік бере­ді. Өндіріс көлемін ұлғай­ту мақ­сатында осы жылдың соңы­на дейін 4 жаңа кәсіпорын ашуды жоспарлап отырмыз», деді Индустрия және инфра­құрылымдық даму министрі Б.Атамқұлов аталған мәселе жөнінде. Осы жобаларды іске қосу және жұмыс істеп тұрған кәсіп­орындардың өндіріс көле­мін ұлғайту тәулігіне 1,1 млн дана маска шығаруға мүмкіндік береді. Сондай-ақ бүгінде 380 бірлік өкпені жасанды желдету аппараты өндірілді, оның ішінде 164 бірлік жөнелтуге дайын, 216 бірлік зауытта сынақтан өтуде. Қалған 200 бірлік осы жылдың шілде айының соңына дейін тапсырылады. Стационарлық аппараттарды қосымша шығару мақсатында түрік және қытай серіктестерімен өндірісті игеру жүргізілуде.

Отырыста Ауыл шаруашы­лығы министрі Сапархан Омаров елде эпизоотиялық ахуалды қамтамасыз ету жұмыстары жоспарлы түрде жүргізілу үстінде екенін айтты. «Орталық-облыс-аудан» қағидаты бо­йынша тігінен ветеринариялық бақылау заңнамалық тұрғыда қалпына келтірілді. Бұл бақы­лауға алынған өнімнің тасымалдануына бақылауды күшейтуге және өнімнің «танаптан үстел­ге дейін» қадағалануын қамта­масыз етуге мүмкіндік береді.

«Өткен жылы Қазақстан-Ресей учаскесінде 28 ветери­нарлық бақылау пункті және Қазақстан-Қырғыз учаскесінде 4 ветеринариялық бақылау пункті енгізілді. Бұл шара Қазақстан аумағын жануарлардың аса қауіпті ауруларының таралуы­нан, ветеринарлық-санита­р­лық тұрғыдан қауіпті мал шаруа­шылығы өнімдерінің әкелі­нуі­нен қорғауға мүмкіндік береді», деді министр.

Мәселені Үкімет басшысы А.Мамин қорытындылады. Оның айтуынша, коронавирус инфекциясына қатысты жағдай күрделі деңгейде қалып отыр. Соңғы екі аптада барлық өңірде науқастар саны көбейді. Мұның негізгі себебі – адамдардың сани­тар­лық талаптарды орындамауы мен бақылаудың нашар­лығы. Осыған орай Мем­ле­кет бас­шы­сының тапсырма­сы бо­йын­ша Ведомствоаралық комис­­сияның шешімімен демалыс күндері бірқатар ірі қала мен тұрғындарының саны 50 мың­нан асатын барлық өңірдің елді мекендерінде қосымша шектеу шаралары енгізілді.

«Бұл шешім жергілікті жерлерде нақты орындалуы тиіс. Әкімдіктер санитарлық нормалар мен қоғамдық орындарда әлеуметтік арақашықтықтың қатаң сақталуына ерекше назар аударуы керек. Денсаулық сақтау министрлігіне өңірлер­дің әкімдіктерімен бірлесіп, коронавирус инфекциясының тара­луына қарсы күрес бойын­ша жаңа шаралар кешенін дайын­дау­­ды тапсырамын. Әрбір өңір­дегі жағдайды ескере отырып, іске асырылып жатқан шара­лар­­ды түзету бойынша жедел шара­лар қабылдансын», деді А.Мамин. 

Премьер-Министр жеке қорғану құралдарының отандық өндірісін ұлғайту және олардың халық үшін қолжетімді бо­луын қамтамасыз ету шараларын қабылдауды, жасанды тыныс алу аппараттары мен жеке қорға­ныш құралдарының жеткілікті қорын қалыптастыруды, оның мемлекеттік материалдық резервте болуын қамтамасыз етуді тапсырды. Әкімдіктерге ірі кәсіпорындардың өз жұмыс­керлерін жеке қорғаныш құрал­дарымен қамтамасыз ету мәсе­лесін пысықтау, Ауыл шаруа­шылығы министрлігіне әртүрлі инфекциялардың таралуына жол бермеу үшін профилактикалық санитарлық-ветеринарлық іс-шаралардың орындалуын қатаң бақылау тапсырылды. 

Үкімет басшысы халықты жыл сайынғы иммундау жоспарын орындауды және коронавирус инфекциясына қатысты қазіргі жағдайды ескере отырып, іс-қимыл алгоритмін жандандыруды тапсырды.

 

Машина жасау саласы қарқынды дамуда

Үкімет отырысында Қазақ­станда машина жасауды дамыту мәселесі қаралды.

Машина жасау саласы­ның дамуы туралы Индустрия және инфрақұрылымдық даму министрі Б.Атамқұлов, мұнай-газ саласындағы машина жасау туралы Энергетика министрі Н.Ноғаев, саланың өңірлер­де дамуы туралы Қарағанды облысының әкімі Ж.Қасымбек, Қос­танай облысының әкімі А.Мұ­хамбетов баяндады. Сон­дай-ақ Қазақстан машина жасау­шылар одағының төрағасы М.Пі­шембаев және бизнес өкілдері  баяндама жасады.

Машина жасау – еліміздің өңдеу өнеркәсібінің негізгі драйверлері. Биылғы 5 айдың қорытындысы бойынша эко­но­микадағы құлдырауға қара­мастан, машина жасау саласында өндіріс көлемі 535 млрд теңгені құрады, бұл өткен жылғы көрсеткіштен 18,5%-ға жоға­ры. Қазіргі таңда Қазақстанда машин­а жасау саласында 3 мыңға жуық кәсіпорын жұмыс істей­ді, олар әртүрлі өнімдерді – бөл­шектерден бастап дәлдігі жоға­ры техникалар шығаруға дейін игерді. Осылайша мұнай-газ, ме­таллургия және аграрлық өне­р­кәсіп секілді экономиканың негіз­гі секторларының қажетті­лігін қамтамасыз етуде. Сала секторларына байланысты жергіліктендіру деңгейі 35%-дан 95%-ға дейін құрайды.

Үкімет басшысы машина жасаудағы жергілікті қамтуды ұлғайтудың маңыздылығын атап өтті. «Елдегі автопарктің 70%-ының қызмет ету мер­зімі айтарлықтай асып кет­кенін назарға алсақ, бұл өте маңыз­ды. Оны жаңарту отан­дық кәсіп­орындардың қуатын жүктеу­ге, жаңа жұмыс орындарын ашу­ға, өндірісте және жолдарда қауіп­сіздікті қамтамасыз етуге, елде экологияны жақ­сар­туға мүм­кіндік береді», деді А. Мамин.

Премьер-Министр Жоғары Еуразиялық экономикалық кеңестің шешіміне сәйкес, моторлы көлік құралдары өн­ді­рі­сін жергіліктендіру деңге­йін кемінде 50%-ға жеткізу керек екенін атап өтті. Осыған орай, автоөндірушілердің өз міндеттемелерін орындауын бақылауға алу қажет. Индустрия және инфрақұрылымдық даму министрлігіне жергіліктендіруді, өндіріс көлемін арттырып, машина жасау өнімдерінің экспортын кеңейтуді, сондай-ақ Ауыл шаруашылығы министрлігі­мен бірлесіп, бір ай мерзімде ауыл шаруашылығы техникасы паркін жаңарту бойынша нақты ұсыныстар әзірлеуді тапсырды.

А.Мамин қазіргі уақыт­та Қазақстанда ауыл шаруа­шылығы техникасы паркінің 70%-ы тозғанын, пайдалану мер­зімі өткенін атап өтті. Қазақ­станның азық-түлік хабы ретіне қалыптасуын ескере отырып, ауыл шаруашылығы техникасы паркін жаңарту – маңызды міндеттердің бірі. Ол үшін жаңа перспективалы өндірістерді құру мақсатында елге инвестициялар мен серіктестер тарту қажет. Бұдан өзге, ауыл шаруа­шылығы техникасын жаңар­ту кезінде өз өндірісі есебінен еңбек өнімділігі жақсарып, ауыл шаруашылығы өндірісі артады.

Премьер-Министр энергетика және индустрия ми­нистр­ліктеріне мұнай-газ жаб­дықтарын өндіретін компанияларды тарту, отандық машина жасау кәсіпорындарының ірі мұнай-газ операторларының сатып алуларына қол жеткізуін кеңей­ту, сондай-ақ саладағы жүйе­лі кедергілерді жою жөнін­дегі кешенді шаралар бойын­ша ұсыныстар дайындауды тапсырды.

Үкімет басшысы бәсекеге қабілетті жоғары технологиялық өнімді отандық экспорттаушылар үшін жаңа қолдау шарала­рын көрсету мүмкіндігін пысық­тауды, сондай-ақ Президент Қ.Тоқаевтың тапсырмасын орындау аясында осы жылдың 1 шілдесіне дейін Өнеркәсіпті дамыту қорын құруды тапсырды.