«Халық алғысы» (Індет кезіндегі ізгілік иелеріне жаңа мемлекеттік марапат тапсырылды)

змет етіп жүрген азаматтарға ерекше құрмет көрсетіліп, осынау сын сағатта елді бірлікке шақырған форумда алдымен Президент Қасым-Жомарт Тоқаев сөз бастады.

– Бүгінде әлемдегі барлық елдер, соның ішінде Қазақстан да коронавирус індетіне қарсы күрес жүргізуде. Бұл – әрине, өте ауқымды әрі күрделі жұмыс. Осыған орай мемлекет тарапынан теңдессіз шаралар қабылданды. Коронавируспен күресу үшін бюджеттен қомақты қаражат бөлінді. Тұрмысы төмен отбасыларға азық-түлік таратылды. Шағын және орта бизнес өкілдеріне бірқатар жеңілдік жасалды. Елбасының бастамасымен құрылған «Біргеміз» қорынан да көлемді қаржы бөлініп, мұқтаж жандарға нақты көмек беріліп жатыр. Бұл жұмысты Nur Otan партиясы белсенді түрде жүзеге асыруда. Осының бәрі бірлігіміздің бекемдігін көрсетеді, – деді Қасым-Жомарт Тоқаев.

Мемлекет басшысы бұл аса жұқпалы дерт азаматтарымыздың денсаулығы мен өміріне қауіп төндіріп, халықтың әл-ауқатына нұқсан келтіргенін айта келе, ең алдымен, осы кеселден қайтыс болған адамдардың туыстары мен жақындарына көңіл айтты, сондай-ақ вирус жұқтырғандардың тезірек сауығып кетуіне тілектес екенін білдірді.

– Осындай күрделі кезеңде барша жұрт жауапкершілік танытудың қаншалықты маңызды екенін түсінді деп ойлаймын. Әр адам өзінің, туыстары мен жақын адамдарының денсаулығына мұқият болуы керек. Бұл – қазіргі заман­ның талабы. Індетті жеңу – әрбір аза­мат­тың өз қолында. Бұл, ең алдымен, қара­пайым қағиданы ұстанудан басталады. Бетперде тағып жүру, тазалық сақтау және әлеуметтік қашықтықты ұстану – өте маңызды. Өйткені бұл сіздің және өзге адамдардың денсаулығы үшін аса қажет. Тағы да қайталап айтамын: «Сақ жүрсең, сау жүресің», «Сақтықта қорлық жоқ». Сондықтан азаматтарды қорғау үшін біз барлық қажетті шараларды жедел түрде қолға алдық және осы жұмысты әрі қарай жалғастыра береміз, – деді Президент.

Оның айтуынша, ауызбірлік, сабыр­лық, жанашырлық – халқымыздың дәстүр­лі құндылықтары. Дәл осы қасиет­тер бізге тарихтағы ең қиын сынақтарды ең­серуге септігін тигізді. Ел басына түс­кен қандай қиындыққа болсын қарсы тұрар бірлігіміз күшейіп келеді. «Біз біргеміз» – бұл біздің қоғамның жаңа ұраны. Осы ретте Мемлекет басшысы медицина және полиция қызметкерлеріне, әскери және мемлекеттік қызметшілерге, волонтерлер мен журналистерге, сондай-ақ қайырымдылық жасаған адамдарға ризашылық білдірді.

– Дәрігерлер, медбикелер, санитарлар мен жедел жәрдем қызметкерлері! Эпи­демиямен күресте ең ауыр жұмыс сіз­дер­ге жүктелді. Сіздер күн сайын бү­кіл елге ерік-жігердің, қайсарлықтың, ба­тыл­­дықтың ерен үлгісін көрсетіп келе­сіз­дер. Біз бұдан нағыз патриотизмді көре­­міз. Аса қиын жағдайларда ерлікке тән әрекет жасайтындарыңызды біле­мін. Пандемияның қайта өршіп, ауқы­мы кеңейе түскен кезде сіздер қор­ға­­­­ныс киім­дерінің, қажетті дәрі-дәр­мек­­­­­тер­­дің, науқастарға арналған орын­дар­дың жетіспеушілігі және басқа да қиын­дық­тармен бетпе-бет келіп отырсыздар. Біз бұл проблемаларды жақын арада шешеміз. Аталған жағдайды шұ­ғыл ретке келтіру үшін Үкіметке нақ­ты тапсырма берілді, – деді Қасым-Жомарт Тоқаев.

Мемлекет басшысы Қазақстандағы әрбір 100 мың адамға шаққанда 80-нен аса азаматтың дертке шалдыққанын және мұның әлемдік статистика бо­йынша орташа көрсеткіш екенін айтты. Науқастар сапалы ем қабылдап жатыр. Бір топ медицина қызметкері жанкешті еңбектері үшін мемлекеттік орден-медальдармен марапатталды.

Сонымен қатар Қасым-Жомарт Тоқаев елдегі тәртіп сақшыларына аса маңызды міндет жүктеліп отырғанын айтып, құқық қорғау органдарының жұмысын да жоғары бағалады.

– Қоғамдағы тұрақтылық пен тыныш­тық полицияның мінсіз қызметі­не байланысты. Бүгінде карантин шараларының сақталуын қадағалап, бекеттерде қызмет етіп келесіздер. Бұл оңай жұмыс емес. Тіпті, қоғам өкілдері тарапынан сынға ұшы­раған кездеріңіз де болды. Әрине, кәсі­би тұрғыдан біліксіздік танытқан поли­ция қызметкерлері де жоқ емес. Осын­дай жекелеген жағдайлар бүкіл құқық қорғау органдарының беделіне зиян келтіреді. Дегенмен тәртіп сақшы­лары­ның басым бөлігі – адал қызмет етіп жатқан азаматтар. Мұны ешкім жоққа шығара алмайды. Осы ретте, Ішкі істер органдарының барлық қызмет­керлерін кәсіби мерекелерімен – Поли­ция күнімен шын жүректен құттық­таймын, – деді Мемлекет басшысы.

Президент мемлекеттік қызметші­лерді және ақ халатты абзал жандарды да төл мерекелерімен құттықтап, Отан ал­дын­дағы сертке берік болғандары үшін бар­шасына алғыс жаудырды. Сондай-ақ ол бұл қатарда әскери қызметкерлер, ерік­тілер, мемлекеттік қызметшілер, қайы­рым­­ды­лық ұйымдарының өкілдері, жур­нали­с­тер және басқа да белсенді азамат­тары­­мыз зор құрметке лайық екенін, бар­лығы бейбіт күннің батырлары екенін атап өтті.

Мемлекет басшысының айтуынша, Төтенше жағдай режімін тоқтатқаннан кейін азаматтарымыз босаңсып кеткен, қауіп-қатерді елемеген, медициналық тәртіп пен ескертулерді сақтамаған, тіпті, кейбір адамдар мұндай ауру жоқ деген қауесетке сенген. Сондықтан Үкімет карантин шараларын қайта күшейтті. Бірақ бұл көңіл күйді түсіріп, сарыуайымға са­лынуға себеп емес. Қасым-Жомарт Тоқаев еліміз толыққанды, қалыпты тіршілігін жалғастыра беру керек деп санайды.

– Бүкіл әлемдегі адамдар карантин кезінде отбасыларымен арадағы қарым-қатынасты қалай бекіте түскені, балаларына көп көңіл бөліп, олардың проблемалары мен алаңдаушылығына уақыт арнағаны туралы өз тәжірибелерімен бөлісуде. Суретшілер, музыканттар, ақын-жазушылар карантин уақытында шығармашылықпен өнімді айналысқан­дарын айтуда. Яғни әрбір қиындықтың өз қайыры болады. Әрбір дағдарыс жаңа мүмкіндіктерге жол ашады. Біз бұл дағ­дарысты бірлесе отырып мін­детті түрде жеңеміз, одан рухымызды шың­дап, дү­ниеге деген көзқарасымызды өз­гер­тіп шығамыз, – деді Президент.

Мемлекет басшысы Қасым-Жомарт Тоқаев «BIZ BIRGEMIZ» атты жал­пы­ұлттық онлайн форумы аясында коро­навирусқа қарсы күресте алдыңғы шепте жүріп, ерлік көрсеткен бірқатар азаматқа «Халық алғысы» арнаулы медалін тап­­сыру­ды ұйғарды. Бұл – осындай қиын-қыстау уақытта аянбай еңбек еткен аза­мат­­тарға арналған жаңа мемлекеттік марапат.

Сонымен қатар Президент елордада пандемиямен күрестегі азамат­тары­мыздың ерлігін мәңгі есте сақтау үшін ескерткіш орнатылатынын айтты.

Бұдан кейін онлайн форумды еліміз­дің өңірлерінен тамашалап отырған бейбіт күннің батырлары да сөз алып, бірлігіміз бекем болса, бұл бәлекетті де жеңетінімізге сендірді. Алдымен Нұр-Сұлтан қаласынан Ұлттық ғылыми кардиохирургия орталығы кардиохирургия бөлімінің меңгерушісі Тимур Лесбеков ортаға шықты.

– Кардиохирургияда 15 жыл жұмыс істеп жүріп, мен көптеген жақсылық, бақыт­ты сәттерді көрдім, бірақ өкініш­ке қарай, қайғылы сәттерге де куә бол­дым. Алайда бүгінгі таңда осы панде­мия­ның қорқынышты жағдайын көзбен көріп, сезінгеніміз өмір бойы өшпес із қалдырды. Өкініштісі, бұл коронавирус жас-кәрі демей, бәріне зардабын тигізіп жатыр. Бүгін таңертең өз әріптесіме жансақтау жүйесін орнаттым. Бұл – өте қорқынышты. Маған сеніңіз, біз үнемі жұмыста болып, отбасымызды көр­мей­тініміз үшін алаңдаудан бұ­рын, бұл вирустың шекараны білмей­тінен қорқамыз. Бақытымызға орай, науқас­тардың көрер жарығы бар немесе үміт­сіз деп бөліп жатқан жоқпыз. Бар­лы­ғын бірдей емдеуге тырысудамыз. Корона­вируспен күрес арқылы едәуір тәжірибе мен құрал-жабдықтар жинақ­талды және ең бастысы, вирусты жеңу мүмкіндігі бар. Мұнда бір ғана дәрі­гер­лердің еңбегі жеткіліксіз. Тұтас халық­тың бірігуі маңызды. Корона­вирус­пен күрес – әр адамның міндеті. Осылай ғана қатерлі ауруды жеңе аламыз, – деді дәрігер.

Сонымен қатар Петропавл қаласы­нан учаскелік полиция инспекторы Ста­нис­лав Олефиренко, Алматы қаласы­нан волон­тер Жәнібек Сұлтанай, «Хабар 24» теле­арнасының Нұр-Сұл­тан қа­ла­сындағы тілшісі Марк Брюш­ко, Төтенше жағдайға байланысты шетел­дегі оқуын тастап, елге оралған Диана Тоқтарқызы сөз сөйледі.

Онлайн форумның негізгі алаңында Президент Әкімшілігі Басшысының бірінші орынбасары Дәурен Абаев, Ақпарат және қоғамдық даму министрі Аида Балаева, Денсаулық сақтау ми­нистрі­нің міндетін атқарушы Алек­сей Цой, Ішкі істер министрінің орынб­асары Алексей Калайчиди және Мем­лекет­тік қызмет істері агенттігің төрағасы Анар Жайылғанова «Халық алғысы» меда­лін бірқатар азаматқа табыстады. Олар – Ұлттық ғылыми кардиохирургия ор­талығы бөлімшесінің басшысы Тимур Лесбеков, «Nomad ММА» рес­пуб­­­­ли­калық федерациясының прези­денті Гаджи Гаджиев, Ұлттық волонтер­лер желі­сінің төрағасы Вера Ким, Мейі­рім­­ді­лер клубының жетекшісі Гүл­­мира Әбді­рашева, меценат, қоғам қайрат­кері Оралбек Ботбай, Биологиялық қауіп­сіз­дік мәселелері ғылыми-зерттеу институтының бас директоры Күнсұлу Закария, Бас әскери клиникалық госпитальдің нейрохирург дәрігері Ержан Рысқалиев, Нұр-Сұлтан қаласы Полиция департаментінің инспекторы Артур Ботабеков, елордалық волонтер Абзалбек Сұлтанбек, ғалым, кәсіпкер Әмір Қуат және «Jas Otan» жас­тар қанатының сарапшысы Аян Хафиз.

Бұған қоса дәл осы уақытта еліміздің басқа өңірлеріндегі азаматтар да қатар марапатталды. Жалпы, пандемиямен күресте елеулі еңбек етіп, жемісті жұ­мыс істегені үшін республика бойынша түрлі саланың 343 маманы алғысқа бөле­ніп, арнаулы медальды кеудесінде жар­қырат­ты. Олардың арасында 60 дәрігер, 39 по­лицей, 30 әскери қызметші, 41 волонтер, 34 меценат, 38 мәдениет және білім өкіл­дері, 25 БАҚ қызметкері бар.