Оны әзірлеуге бизнес өкілдері де мүдделі
Алматыда ұлттық экспорттық стратегияны (ҰЭС) талқылау жөніндегі дөңгелек үстел өтті. Бұл шараға бизнес-қауымдастықтардың өкілдері мен тауар өндірушілер қатысуға мүмкіндік алды. Осынау басқосу «KAZNEX INVEST» экспорт және инвестициялар ұлттық агенттігінің ҰЭС-тың негізгі әзірлеушісі ретінде Қазақстан қалаларында өткізуге жоспарланған кездесулер топтамасындағы алғашқысы деп айтуға болады.
Оны әзірлеуге бизнес өкілдері де мүдделі
Алматыда ұлттық экспорттық стратегияны (ҰЭС) талқылау жөніндегі дөңгелек үстел өтті. Бұл шараға бизнес-қауымдастықтардың өкілдері мен тауар өндірушілер қатысуға мүмкіндік алды. Осынау басқосу «KAZNEX INVEST» экспорт және инвестициялар ұлттық агенттігінің ҰЭС-тың негізгі әзірлеушісі ретінде Қазақстан қалаларында өткізуге жоспарланған кездесулер топтамасындағы алғашқысы деп айтуға болады.
Сонымен «KAZNEX INVEST» мемлекеттік органдар мен бизнес-қауымдастық өкілдерімен бірлесе отырып, Қазақстанның 2020 жылға дейінгі ұлттық экспорттық стратегиясын әзірлеуге кірісті.
Бұл құжаттың қажеттілігі Индустрияландыру картасына сәйкес тауарлардың ауқымды өндірісінің күтіліп отырғанына байланысты болып отыр. Стратегияның негізгі мақсаты – экспортты қолдаудың жалпыұлттық жүйесін қалыптастыру, оның нәтижесі шикізаттық емес экспорт үлесінің артуы, оны географиялық және тауарлық әртараптандыру болмақ. Бұл өнімнің қосымша құнын арттыруға және ел экономикасының интернационалдануын арттыруға бағытталған жаңа индустрияландыру бағдарламасының (ҮИИДМБ) екінші бес жылдығындағы негізгі басымдықтармен өзара тығыз байланысты.
Бизнес-қауымдастықты ұлттық экспорттық стратегия жөнінде ауқымды түрде ақпараттандыру үшін «KAZNEX INVEST» агенттігі қалалық әкімдіктердің қолдау көрсетуімен өңірлерде кездесулер өткізеді. Алматылық экспорттаушылармен өткен дөңгелек үстел бизнесмендердің ұсыныстарына құлақ асуды және ҰЭС-ты әзірлеу кезінде оларды ескеруді көздейтін ақпараттық-пікірталас жұмысының басын бастап берді.
– Біз Ресей, Қырғызстан, Өзбекстан, Тәжікстан, Әзербайжан секілді ТМД елдеріне экспорттаймыз. Осы ретте Ресейге өнімді экспорттау үлкен мәселе болып табылады, бірінші кезекте, бұл көп уақытты алатын және шығынды қажет ететін аккредитациямен байланысты қиындық. Екінші мәселе – қаржыландыру, бұған ресейлік банктер ынталы емес. Осыған байланысты экспорттаушылардың қаржыландырылуын кідіртуге болмайтын салалық құрылымдарды нақты белгілеп алу қажет. Бірінші кезекте, экспортқа шығатын, сондай-ақ, республиканың экономикасы мен ІЖӨ-ге әсер ететін көлік құрастыру осындай салаға жатады. Одан қалды, экспортшыларға салықтық жеңілдіктер мен артықшылықтарды беру қажет, – деді «Alageum group» ЖШС бас директоры Нұржан Ыстыбаев.
Аталмыш көлік құрастырушы компаниядан кейін сөз алған фармацевтикалық компания өкілі Валентина Полукарова:
– Қазіргі таңда біздің компания Қырғызстан, Ауғанстан нарықтарына белсенді түрде шығып отыр. KAZNEX INVEST-тің қолдау көрсетуімен Ауғанстан өкілдері Алматыға сапармен келмек, оның барысында біз серіктестерге өзіміздің өнімімізді, өндірістік үрдісімізді таныстыратын боламыз. Сонымен қатар, бізде Ресейдің фармацевтикалық нарығына шығу бойынша айтарлықтай үлкен жоспарымыз бар. Алайда, бүгінгі күні бұл қиын мәселе болып отыр. Осыған орай біздің өнімімізді жаңа нарықтарға ілгерілету бойынша сервистік қолдау алу қажет деп есептейміз, – деді.
Сонымен ұлттық экспорттық стратегияны әзірлеу жөніндегі сараптау тобының бизнес-қауымдастық өкілдерімен кездесуі биылғы жылдың қазан-қараша айларында Шымкент, Орал және Павлодар қалаларында жалғасатын болады.
Айнаш ЕСАЛИ,
«Егемен Қазақстан».
АЛМАТЫ.
