Мемлекеттік комиссияның отырысында коронавирус инфек­циясының таралуына жол бермеу мақсатында қатаң шектеу шараларын енгізу мәслелері, арнайы іс-қимыл жоспарлары қаралды. Аталған жоспарда азаматтар мен бизнестің мүдделері толық ескерілген. Бұл туралы Орталық коммуникациялар қызметі алаңында өткен баспасөз жиынында Премьер-Министрдің орынбасары Ералы Тоғжанов кеңінен айтып берді.

Оның айтуынша, бағыттар санын өсірмей, өңірлер арасындағы әуе қатынасы бұрынғы деңгейде сақталады. Темір жол арқылы жолаушылар тасымалы қысқарады. Қалалар арасындағы жолаушылар автобусы қатынасын уақытша тоқтату ескерілген. Өңірлер арасында жеке көлікпен сапарлауға рұқсат етіледі. Уақыт бойынша шектеулерді ескере отырып, қоғамдық көліктің жұмысы сақталады. Сондай-ақ қалаға кіріп-шығу үшін ешқандай анық­таманың қажеті жоқ. Қалалар мен өңірлер арасында блок-бекеттер орнатылмайды. Бірақ өңірлер арасында қатынайтын жолаушылар автобусы тоқтатылады. Жалпы шектеу шаралары туралы Мемлекеттік комиссияның отырысында толық мағлұмат берілді.

– Белгіленген 14 күндік карантин бойынша мониторинг жүргізіліп, қорытындылар шы­­­ға­­рылады. Нәтиже бермеген жағдайда шектеу шаралары бойынша қосымша шешімдер қабылданады. Карантиндік режім мен бекітілген санитарлық-эпиде­миялық талаптарды бұзғаны үшін жеке тұлғалар 30 АЕК (83 340 теңге), ал кәсіпкерлік субъек­тілері 230 АЕК (638 940 теңге) көлемінде әкімшілік жауапкершілікке тартылады. Тиісті нормативтік-құқықтық акті осы аптада қабылданады, – деді
Е.Тоғжанов.

Сондай-ақ ол күн тәртібінде тұрған негізгі мәселе – меди­циналық мекемелердің КВИ-мен ауырғандарды емдеуге арнал­ған жатын орын санын артты­ру екенін айтты. Мемлекет бас­шысының тапсырмасына орай, шіл­де айының соңына дейін инфекциялық, провизорлық орын саны 50%-ға өсіп, 28 мыңнан 42 мыңға дейін жеткізіледі. Тамыз айына дейін ПТР-тестермен қамту тәулігіне 30 мыңнан 39 мыңға жеткізіледі. Барлық медицина мекемелеріне техникалық қажет заттар алынып жатыр. Бұл бағытта жұмыс тоқтаған емес.

– Қазір әлеуметтік желілерде неше түрлі емдеу жолдарын көріп алып, осыған байланысты дәрі-дәрмек сұрап жатқан азаматтар аз емес. Бірақ та емдеу жолдарын ауру нақты анықталғаннан кейін тек қана дәрігер айтуы мүмкін. 70 мыңға жуық дәрі-дәрмекті жарты сағаттың ішінде алып кеткен жағдай да болды. Сондықтан құқық қорғау органдарына арнайы тапсырма берілді. Бүкіл азаматтардан сұрайтынымыз, мұны сауда-саттыққа айналдырғысы келетіндер де жоқ емес. Осындай жағдай белгілі болғанда бізге тез арада ақпарат беруді өтінеміз, – деді Үкімет басшысының орынбасары.

Ералы Тоғжанов вирустың кең таралуына халықтың ескертулерге немқұрайлы қарап, құлақ аспағаны себеп болғанын айтты.

– Әлем бойынша бұл індетті 10 миллионнан астам адам жұқтырып, 500 мыңнан астамы қайтыс болса да, біздің ел ты­ғылып, той тойлап, бетперде киюді әлі де ұят санайтындар жоқ емес. Мысалға, артқы есіктен кіріп қыз ұзату, аулаға той жасау, құдалық өткізу, ас беру, туған күн тойлау сияқты басқа да іс-шаралар толып жатыр. Оған көптеген азамат куә. Осындай шараның соңында кемінде 20-дан аса адам ауруханаға түсіп, қаза болып жатқандар да мәлім. Мемлекет басшысы айтқандай, қазір – той тойлайтын емес, ой ойлайтын кезең. Біз – бір халықпыз. Олай болса, жауапкершілігіміз де бір. «Жақыныңа жанашыр бол!» деп бүкіл БАҚ арқылы айтылып жатқан ескерту – сіз бен бізге арналған үндеу. Ең алдымен жеке басымыздың жауапкершілігі, отбасымыздың алдындағы және қоғам алдындағы жауапкершілік болу қажет, – деді Е.Тоғжанов.

Өз кезегінде Денсаулық сақтау министрі Алексей Цой еліміздегі эпидемиялық ахуалға тоқталып, іске асырылып жатқан шаралардан хабардар етті. Оның айтуынша, коронавирус жұқтыру күдігі болған адамдарға, індетті жеңіл немесе белгісі жоқ күйде көтеретін азаматтарға көшпелі бригадалар амбулаториялық кө­мек көрсетеді. Осы күнге дейін 380 бригада құрылыпты. Олар­дың санын 3 мыңға жеткізу көзделіп отыр. 1 шілдеден бастап көшпелі бригадалардың қызметі үшін арнайы тариф белгіленді. Ал емханаларға тіркелген халық учаскелік дәрігерлерден кон­сультациялық көмек ала береді. Емханаға анықтама бойынша барғандарға карантиндік филь­трлер арқылы қызмет көрсетіледі.

– Жедел жәрдем көліктерінің жетіспеуі мәселесін қысқа мерзім ішінде әкімдіктермен бірігіп шешеміз. Медициналық емес ұйымдардың есебінен осы мәселе ретке келтіріледі. Республикалық бюджеттен қазірдің өзінде 807 жедел жәрдем көлігі сатып алынды. Шілде айында бұл көлік­тердің алғашқы партиясы –Нұр-Сұлтанға 14, Солтүстік Қазақ­станға 18-і жеткізіледі. Ал кадрлық жетіспеушілікті шешу үшін медициналық колледж­дердің түлектері, яғни 112 адам жұмысқа тартылып жатыр. Жергілікті атқарушы органдарға әртүрлі ресурс арқылы қосымша корона-такси шығару туралы ұсыныс берілді. Күн сайын рес­публикада ауысым бойынша 1400 көшпелі бригада шығады. Шақырылатын орынға шығудың орташа тәуліктік көрсеткіші кейінгі екі аптада 30 мыңнан асып кетті. Бұл – қалыпты жүктемеден екі есе көп, – деді А.Цой.

Сондай-ақ ол COVID-19 пациент­теріне стационарлық көмек көрсету құрылымы өзгер­тіліп жатқанын атап өтті. 13 мың төсектік-орын бар карантиндік стационарлар провизорлық және инфекциялық емхана болып жасақталуда. Мемлекет басшысының тапсырмасымен төсектік-орындардың саны 50 мыңға көбейтіледі. Кейінгі үш күннің ішінде коронавирус жұқтырған азаматтар үшін қосымша 1,5 мың төсектік-орын жасақталды. Ал КВИ жұқтырғаны жөнінде күдігі бар азаматтарға 5 мың провизорлық төсектік-орын әзірленді. Бүгінгі таңда 333 медициналық ұйымда 20 мың инфекциялық төсектік-орын бар. Оның көбіне пневмониямен түскендер жатқызылып жатыр.

– Өкпені жасанды желдетудің 3 мыңға тарта аппараты бар стационарларда қосымша 987 аппарат сатып алынады. Сонымен қатар осындай аппараттың тағы 1 мыңын сатып алу көзделуде. Одан бөлек оксигено-терапиямен тұрақты түрде қамту үшін 4 мың оттегі концентраторын сатып алу жоспарланған. Жалпы, коронавирус инфекциясы бо­йынша науқастарды толығымен қамту үшін стационарларда құны 138,8 млн теңгеге 59 дәрі-дәрмек түрі сатып алынды. 2 шілдедегі жағдай бойынша өңірлердегі меди­циналық ұйымдар 27 мың науқасқа арналған вирусқа қарсы препараттармен қамтылған. Бұған қоса 15 шілдеге дейін тағы 28 мың науқасқа арналған дәрі-дәрмекті әкелу көзделіп отыр, – деді министр.

Қалай дегенмен шетін жағдай­ды қадағалап, елдің тұтастығы мен амандығы үшін шұғыл шаралар қолға алынып жатыр. Сондықтан халқымыз селсоқтық танытпай, індетпен күресте алдыңғы шепте қызмет етіп жүрген азаматтардың еңбегін бағалап, қауіпсіздік шараларына баса мән бергені аса маңызды.