Парламент Сенаты Халықаралық қатынастар, қорғаныс және қауіпсіздік комитетінің төрағасы Икрам Адырбеков Грузияның Қазақстандағы елшісі Зураб Патарадземен кездесті, деп хабарлады осы палатаның баспасөз қызметі.
Парламент Сенаты Халықаралық қатынастар, қорғаныс және қауіпсіздік комитетінің төрағасы Икрам Адырбеков Грузияның Қазақстандағы елшісі Зураб Патарадземен кездесті, деп хабарлады осы палатаның баспасөз қызметі.
Кездесуде Қазақстан мен Грузияның өзара ауқымды іс-қимылы, оның ішінде екі елдің заң шығару органдары арасындағы ықпалдастық мәселелері талқыланды. И.Адырбеков жоғары деңгейдегі саяси үнқатысу және экономикалық ынтымақтастықтың зор әлеуетін атап өтті.
З.Патарадзе екіжақты өзара іс-қимылдың жағдайы және Астанадағы Грузия елшілігінің ағымдағы қызметі туралы хабардар етті. Грузин тарапы парламентаралық байланыстарды, әсіресе, ынтымақтастық жөніндегі парламенттік топтар деңгейінде үдетуге әзір, деді дипломат.
Жүздесушілер кедендік әкімшілендіру, көлік, туризм, мемлекеттік органдар арасындағы тәжірибе алмасу және мәдени-гуманитарлық салалардағы өзара іс-қимыл мәселелеріне егжей-тегжейлі тоқталды.
З.Патарадзе биылғы қазан айының соңында өтетін президенттік сайлау қарсаңындағы Грузияның әлеуметтік-экономикалық дамуы және ішкі саяси жағдайы туралы әңгімеледі.
Кездесуге сондай-ақ, Сенаттың Қаржы және бюджет комитетінің хатшысы Ертарғын Астаев қатысты.
